GALAASIA 3 - KARÚK-PËRIM KAWALU Nouveau Testament

Pëmob tsi ulua oo tsi uwak

¹ Cay bañaan Galaasia bafuur! Yën fäl ind un? Ind ban pibana biki tsi këkës ind bi Yeesu Këristu rieŋa bi di kruus.

² Ko wi rin wi n ŋal wun pëme tsi uleka ind: Undo përo ko wi ulua tsu wi ka wun nda yank Uwejats Nasien-batsi, ane undo nda cikëndën përim uwak-a?

³ Nda ro um a nda ci ink bafuur, ind ban kurëna biki tsi Uwejats Nasien-batsi, a inkri, ndu tuamanaan tsi uliaf-a?

⁴ Ane unoor wi nda miira wink bëlieng aci-un kaats wi bëkat-a? Uci u ci ank, kaats bëkat.

⁵ Ni ka wël ind unk Uwejats, a nuu roond bawitsa tsi pëncuaf ind, ka ro bawitsa undo nda mob tsi përo ko wi ulua tsu wi, ane undo nda mob tsi pëcikëndën përim uwak-a?

⁶ Unk di Abraam wak run tsi Nasien-batsi, a ko wan tsuul a na wina na ci namabal.

⁷ Nda ka pëme ne bañaan uwak, ci bukun babuk Abraam.

⁸ Bëpican acar apiban Nasien-batsi kë tsu ban cits biki Bajudeu pëci bamabal, tsi undo uwak bukul, a na cakës aleents Abraam upetsan uwar wi, aja: “Tsi uwi, tsi ngëcaak bëlieng kë beeniraana tsun.”

⁹ Unk, ba uwak biki bë beenira ni Abraam, niints uwak.

¹⁰ Par, ban ci bukunk bëlieng baro ko wi ulua tsu wi, bë ci tsi bëjuats. Par iink picana-run: “Na mobatsi-ba këmob aliincan tsi ngëko ngan picana ngi bëlieng di ulibëru ulua, pa puu ro ko wi nga ja wi, aci tsi bëjuats.”

¹¹ Nin ñaan di ka tsua pëci namabal tsi bërun Nasien-batsi, undo amob tsi ulua; umënts wan aci ko un jënts wi, par namabal ka kaana ubiira tsi uwak.

¹² Wul ulua pënënatsi di uwak; maa ñaan na mobi tsi ngëko ulua, ka kaana ubiira tsi ngul.

¹³ Këristu aweelësi nja di bëjuats ulua, bi na tsu bi beenul bërierul na ci bëjuats tsi pëlas nja. Par iink picana run: “Na laantee-ba këlaanta di pëmul, aci bëjuats.”

¹⁴ Ko wan aci pa ngëko ngëwar Abraam pëband di ban cits biki Bajudeu, tsi Yeesu Këristu; pa tsi uwak, nja kë yank Uwejats u watsana wi.

Utsua ni uwatsan Nasien-batsi

¹⁵ Batsaar ni nji, mán ñakan pi ñaan-najin. Aja karuk-përim rolaa uwar, ŋal bi u ci bi ñaan-najin do un kul, ñaan kaats pëgar kul, nin pëlak ulon ko tsi kul.

¹⁶ Maa, Abraam wëlaun ngëwatsan, nul ni kajërul. Bëpica n jaats: “Ni ijërul” pí ka ñakanaan ijër icumal, maa aci pí ka ñakanaan kajër kaloole rin; aja: “Ni kajëru” un ci wi Këristu.

¹⁷ Utsaag nji ci wun wi: Karo-pëloole ki Nasien-batsi niiran ki ba uwal ujon, ulua ubi wi, bi upar bi ngëwaanu ngëseent ngëbaakër ni ngëntaaja ngëwaants, yëlants pëgar kul, nin pëjaa atsu uwatsan a kaats bëkat.

¹⁸ Par, uci bërukanda kë biini tsi ulua, bul katse ka biini tsi uwatsan; maa Nasien-batsi awëlëna Abraam bëtseendul tsi uwatsan.

¹⁹ A ulua ci pa we? Wul atsua undo kaguus-ko, te ubi kajër ka watsana kunk, a ngëwaanju pibanaan umënts wan tsi kañan natsu-manteelar.

²⁰ A natsu-manteelar di ka ci ni naloole rin, maa Nasien-batsi aci naloole.

²¹ Ane ulua anatsara pëkaman ngëwatsan Nasien-batsi-a? Nin-a! Par uci ulua ro wëlaa, uyëlan wi pëwël ubiira, tsi ucär, bëmabal abi ka pënë-ni tsi ulua.

²² Maa, Bëpican atsu ngëko bëlieng tsi utsia ujuban, pa tsi undo uwak tsi Yeesu Këristu, ba uwak biki ka wëlaa uwatsan.

²³ Maa uwak aruka ka bi, a ngë ro tana arica tsi ulua, a ngë ro ka lip uwak un ka wi pii pibanaa.

²⁴ Unk, ulua ruka wun ci najukan nja te ubi Këristu, pa ja ka tsua pëci bamabal tsi undo uwak.

²⁵ Maa, bi uwak baandi bi, inkri katse ci najukan tsij-ni jaun.

²⁶ Par ind bëlieng nda ci babuk Nasien-batsi, tsi undo uwak ind tsi Këristu Yeesu;

²⁷ par ind bëlieng ba mijana biki tsi Këristu, Këristu ni nda ruka un tiema.

²⁸ Unk, katse ka Najudeu nin nagërek; katse ka naluek nin nafacal; katse ka niints nin ŋaats; par ind bëlieng nda ci baloole tsi Këristu Yeesu.

²⁹ A uci nda ci biki Këristu, nda ci kajër Abraam, barukanda, bi Nasien-batsi watsan bi ja.