GALAASIA 2 - KARÚK-PËRIM KAWALU Nouveau Testament

Pol ni balon bapostolu

¹ Bi u par bi ngëwaanu untaaja ni ngëbaakër, a n kaka kata a n tsëp Jerusalem ni Barnabas, a n tsëpand buts Tiitu.

² Man kata n tsëp, undo upiban wi pibana wi. A n piban bukul Upetsan-uwar wi ja wi doon koo leents ban cits biki Bajudeu, a n peena ban tsua bukunk pëci bawiak, pa pëtuk nji përits ci pan kaats pi bëkat.

³ Maa, nul Tiitu nan ci ni nji, ŋal bi na ci bi nagërek, tsuaatsa pëwela kambac.

⁴ Ko wan aci undo balon batsup ban ja biki bu tsaar ni inja, a ba niaji tsi pëncuaf inja, pa pëjuunkats pëfac pi ngë ka pi tsi Këristu Yeesu, bu ka kakani njatsi pëluek.

⁵ A wund niiranats bukul ko wan, ŋal uwal uloole, unk pa ucär Upetsan-uwar pëci tsi pëncuaf ind.

⁶ Maa tsi uleka ban tsua bukunk pëci bawiak, bu kaats ko wi ba lakin wi. A ko wi ba ro wank ci tsi ulon uwal, fieranatsin; Nasien-batsi di ka teenëna bënaam ñaan-najin.

⁷ Maa, a ba win bi wëla bi Upetsan-uwar, pa pëleents wul bawelaatsa-kambac, bi Per wëla bunk wul pa pëleents bawela-kambac;

⁸ par na leemp unk bi Per, a na tsuul pëci Napostolu bawela-kambac, nul leemp un buts bi nji, a na tsuin pëci Napostolu ban cits biki Bajudeu.

⁹ Bi Jakob ni Seefas ni Joŋ yëkëran bi bëtseend bi wëlaa bi, bukul ban tsua biki pëci icap, a ba wëlin iñan manteelar, nji ni Barnabas, pa wund pëtsëp pa ban cits biki Bajudeu, a bukul bu ka tsëp pa bawela-kambac.

¹⁰ A ba ja wund rin, wund puu les baranj; a u ci buts ko wi tambandar wi përo.

Pol aleentsar Per di Antiookia

¹¹ Maa bi Seefas bi bi di Antiookia, a n mabular ni nul a n pokul, par nul alac.

¹² Par, balon tsi biki Jakob yëli biki aruka ka baandi, a na ro ka riala tsëloole ni ban cits biki Bajudeu; maa bi ba baandi bi, a na kika alaayatsa ban cits biki Bajudeu, par a lal bawela-kambac.

¹³ A Bajudeu banduka bukunk niaj buts tsi kanguungu Per; a utsu te Barnabas bërierul, wëtandar aniaj tsi kanguungu bukul.

¹⁴ Maa, bi win bi ngi bu kë ro ngi mabats tsi ucär un ci wi tsi Upetsan-uwar, a nja Seefas tsi pëncuaf bañaan bëlieng: “Uci m ci Najudeu a kë yandaar pi ban cits biki Bajudeu, a m yandaarats pi Najudeu, we ka wun a kë tsu ban cits biki Bajudeu, puu yandaar pi Bajudeu?”

Pëbuer Bajudeu ni ban cits biki Bajudeu aciina tsi uwak rin

¹⁵ Wund, wund abëka Bajudeu, a wund cits bajuban tsi ban cits biki Bajudeu.

¹⁶ Wund ame ne, cits përo ko wi ulua tsu wi ka tsu wun ñaan pëci namabal, maa pëka uwak tsi Këristu Yeesu ka tsu pun ñaan pëci namabal; a wund wak buts tsi Këristu Yeesu, pa wund pëtsua bamabal, tsi undo uwak wund tsi Këristu; cits pëjaa përo ko wi ulua tsu wi, tsu wund wun pëci bamabal, par përo ko wi ulua tsu wi di ka tsu ñaan pëci namabal.

¹⁷ Maa, uci wund kë tsas pëtsua bamabal tsi Këristu, a wund wina bërier wund wund ci buts bajuban, umënts wan ka tsu wun Këristu pëci naleempar ujuban-a? Nin a!

¹⁸ Par uci kaka ci tsi pënatsan ngëko ngi do ngi cok, man piban bërierin ci narika-ro ko wi ulua ja wi.

¹⁹ Par nji, tsi uleka ulua, man cats tsi ulua, undo nji puu yafënts tsi Nasien-batsi. Man dieŋa di kruus ni Këristu.

²⁰ Nji man yafënts, maa katse ci nji ka n yafënts un, aci Këristu ka yafëntsun di nji; a ubiira wi n ciina wink inkri tsi uliaf, mán tsijëna wul tsi uwak wi n ka wi tsi Abuk Nasien-batsi, nul na ŋalini, a na wël beenul bërierul undo nji.

²¹ I tsuuts bëtseend Nasien-batsi kakaats bëkat; par uci ulua ka tsu wun ñaan pëci namabal, unk pëcäts Këristu kaats bëkat.