GALAASIA 1 - KARÚK-PËRIM KAWALU Nouveau Testament

Kawël-mboos kajuundë-ni

¹ Pol, Napostolu, cits bañaan-bajin tsuul bukun, nin cits nalon ñaan, maa Yeesu Këristu ni Nasien-batsi, Asin, nul na natsaniuli di bacäts.

² Batsaar ninjabëlieng ban ci biki ni nji, wund apicandëri iriisia i ci yi di Galaasia.

³ Pëfac Nasien-batsi Asin, ni pi Yeesu Këristu Ajugnjapa ciin tsi ind;

⁴ nul na wëli beenul undo ngëjubani njatsi uŋal Nasien-batsi Asini njapa pëpënani nja tsi uwal un ntsari wi, u waraatsa wink.

⁵ Përëmb pa wëlaanul sandëndën. Ameen!

Upetsan-uwar aci uloole rin

⁶ Man pikra bi nda car bink awëtan nandui indi tsi bëtseend Këristu, a nda butar ulon Upetsan-uwar.

⁷ Wul cits ulon Upetsan-uwar, maa, aka balon bañaan ban ci biki tsi pëlënkan ind, a ba ŋal pëcík Upetsan-uwar Këristu.

⁸ Maa, ŋal wund oo ulon uwaanju pëni wun batsi ee leents ind ulon Upetsan-uwar un pats wi ni wi wund leents ind wink, u ciin Anaatema.

⁹ Bi wund ja ind bunk ba, inkri má n jaind kak: uci ñaan leents ind ulon Upetsan-uwar un pats wi ni wi nda niiran wink ba, na ciin Anaatema.

¹⁰ Inkri, ane mán tsas këtsas bañaan-bajin pëcikëndënin, oo Nasien-batsi? Oo mán tsas këtsas bañaan-bajin pëlilandërin-a? Uci wama ka tsas bañaan-bajin pëlilandërin, i bitse ka ci naleempar Këristu.

Bi Pol ci bi Napostolu ja

¹¹ Batsaar ni nji, mán leents ind ne, Upetsan-uwar wi ndë leents wink, pënënatsi di ñaan-najin,

¹² par nji yankënats wul di ñaan, nin nalon ñaan jukanatsin wul; maa, aci Yeesu Këristu pibanin un wul.

¹³ Par nda te ngi ndo ngi ka ro uwal ujon, bi do bi ci ri bëga Bajudeu; bi noor-nooran bi Ngëriisia Nasien-batsi, a n dë tsas pëba ni ngul.

¹⁴ Man do pe bacumal tsi ngëraan nji ni bañaan-ucaak nji pëmob tsi bëga Bajudeu, a nja doon ka yëkandar ngëndimaan basin nji mak.

¹⁵ Maa bi u líl bi Nasien-batsi, nul nan patsanini ki wam ki di pëpës anin nji, a na ruin tsi bëtseendul,

¹⁶ pa pëpiban Abukul tsi nji, pa nji pëleents përim ulekaul tsi pëncuaf ban cits biki Bajudeu. Ucar umënts, i yeparats ñaan,

¹⁷ te i kataatsa Jerusalem pa pëyepar ban cakësin bukunk pëci bapostolu, maa a n pën a tsëp pëboos Araabia, a n kaka witsee Damaasku.

¹⁸ A uu par ngëwaanu ngëwaants, din a n pën a n tsëp Jerusalem, pa pii winar ni Seefas, a n tsoar ni nul a do ngënu untaaja ni kañan;

¹⁹ a i winats nin nalon tsi bapostolu, ucits ba Jakob, nan tsaari ni Ajug.

²⁰ Maa, uleka ko wi picandëri ind wi, nji ka leents ink tsi bërun Nasien-batsi; tsupats.

²¹ A uu ba, a n tsëp këboos Siiria, ni ki Siliisia.

²² Iriisia Judeeya i ci yi tsi Këristu, meetsin.

²³ Bu te rin u jakaa: “Nan do unk ka noor-noorani njainkri aci tsi pëleents uleka uwak wi na ro wi natsara pëcok.”

²⁴ A ba rëmban Nasien-batsi tsi undo nji.