EFEESU 3 - KARÚK-PËRIM KAWALU Nouveau Testament

Uleemp Pol tsi ban cits biki Bajudeu

¹ Wul ka wun, nji Pol, nan ci narica tsi Yeesu Këristu pa ind ban cits biki Bajudeu,

² uci nda te pëlesar bëtseend Nasien-batsi bi na wëlin bi pa pëleemp tsi ind,

³ par aci Nasien-batsi tsuin un pëme undoots wi mea, bi ndo bi picandar ind ba irim in kës yi ko.

⁴ Ulayir ind yul, ndë yëlan pëme uwar balipal nji, tsi wi Këristu undoots wi mea.

⁵ Undo undoots wink mea, wul tsi uwal jon, babuk bañaan-bajin wëlaatsa pëme wul, bi Uwejats Nasien-batsi piban bink wul bapostoluul ni bayëliaul bayëman, inkri.

⁶ A wul, undoots wi mea ci wun wi: tsi Upetsan-uwar, ban cits biki Bajudeu abof tsi bërukanda bëloole bun, a ba bof tsi uliaf uloole wun, ni uwatsana uloole wun tsi Këristu.

⁷ A nji a nduka n ci naleemp tsi Upetsan-uwar, tsi utseend Nasien-batsi wi n wëla wi unk, pa përo uleemp tsi pëyëlanul.

⁸ Nji nan pei pëci naties tsi bayëman bëlieng, bëtseend bëmënts bi awëlain pa nji pëleents tsi ban cits biki Bajudeu Upetsan-uwar përëmb Këristu pa yëlanaatsa pi bëjaaka;

⁹ ni pëpiban ko un ci wi uleemp undoots wi mea, a tsi ngëwal bëlieng u beka tsi Nasien-batsi nul na leempi ngëko bëlieng.

¹⁰ Unk msien, ni myëlan man ci mi di batsi ka meena tsi Ngëriisia kameko Nasien-batsi kan patsëlar ki,

¹¹ tsi ko wi na wejats wi përo, un dits wi ka ba, wi na roona wi tsi Këristu Yeesu Ajug nja.

¹² A tsi uwak, ngë kaana tsi Yeesu bëyeentsal ni uwats pëband di Nasien-batsi.

¹³ Wul ka wun ndu ñaan ind, ngëwaas ind tsë catsar ngënoor ngi n ci ngi tsi pëpar-na tsi uleka ind, par aci përëmb ind.

Bëŋal Këristu

¹⁴ Undo ko umënts wi ka wun n kuuj ijuul tsi bërun Asin.

¹⁵ tsi nul tsi pëbuka pan ci pi-ba këci di batsi oo tsi utsia kaana tsun katim;

¹⁶ pa tsi bëka përëmbul, Uwejatsul ka wël ñaan nametsu di ind, uyëlan ni pëyëlan.

¹⁷ A tsi undo uwak, Këristu na ciin di ngëwaas ind pa ndë jab ibuul ndë liinc tsi bëŋal.

¹⁸ Unk ind ni bayëman bëlieng, ndë yëlan pëme ko un ci wi uwaanar, ko un ci wi uyampar, ko un ci wi uwandar, ni ko un ci wi unatsar;

¹⁹ ni pëme bëŋal Këristu ban par bi ume un ciwi-ba këci, pa ind pëwëla nda kësan te ndë cum Nasien-batsi.

²⁰ Përëmb pa ciin pa nan kai pëyëlan përo ngëko bëlieng na paran ngi ngë yep ngi, oo ngi ngë wejats ngi, bi pëyëlanul kë leemp bi tsi nja;

²¹ tsi ngëraan bëlieng, përëmb pa wëlënaanul tsi Ngëriisia ni tsi Këristu Yeesu pa sandëndën. Ameen!