BAYEBËREU 5 - KARÚK-PËRIM KAWALU Nouveau Testament

¹ Par, nan pei pëci nawiak-bajakan, aja na roon në rataa tsi bañaan-bajin, në tsua pëciir bukul tsi ngi Nasien-batsi, pa nuu wël ngëko bëtseend, nuu roand ijakan, pa ngëjuban.

² A na yëlan pëyëkar bameets-ko ipës, ni ban ci biki tsi pëniam, par nul buts, bërafal ajëkul.

³ A tsi undo bërafal, ka wun na ka përo ijakan pa ngëjuban; cits rin pa bañaan-ucaak, maa pa beenul buts.

⁴ Ñaan di ka wëlar pëlas urispiitu pëmënts pi, maa Nasien-batsi ka ruul un, bi Aaron ruaa bunk.

⁵ Unk, Këristu buts wëlarats përëmb, tsi uleka përuka ci nan pei pëci nawiak-bajakan. Maa na wëluli pul, aci nanjaul unk: “Wi, m ci Abuk nji; nji, ntsari man buku.”

⁶ A tsi tsëlon tsëko kak, a na ja: “M ci najakan pa sandëndën, tsi bënekëlar ni Melkisedek.”

⁷ Nul Yeesu, uwal wi na wam wunk tsi umundu wi, a uja ni mliandar, ni mŋand, nuu ñaan, nuu rugar na yëlan unk pëbueranul tsi pëcäts. A na niiranaa, undo alënk Nasien-batsi.

⁸ Ŋal bi na ci bunk Abuk, ajukëna përo ko unjaka wi tsi unoor wi na noor wi.

⁹ A uwal wi na tsua wi nan bai pëci nawar, a na ruka ci nan kaanee pëbuer pan dits pi ka ba, pa bañaan bëlieng biki kando biki ko wi na ja wi,

¹⁰ undo Nasien-batsi atsuul nan pei pëci nawiak-bajakan, tsi bënekëlar ni Melkisedek.

Ujuatsal wi kan baandë-ni wi na wëtani uwak

¹¹ Tsi uleka ko umënts wun, wund aka ngëcumal ngi wund kë ja ngi, maa pëpac ko wi nga ja wi añats, par nda ruka ci batsuunk tsi pëme ko wi irim pac wi.

¹² Par, nda bi ka ro ci bajukan, ki këlum, maa nda wama fier ñaan pëjukan ind ngëko ngëcak-cakan, ngi irim Nasien-batsi. Ind wama bikink afier mtaw, cits bariala butambal bi nda fier bun.

¹³ Na wamee ba ka buat, kaats ume tsi përim bëmabal, par aci napäts-naluunt.

¹⁴ Maa bariala bëtambal aci pa ban jëŋ biki, ban ja biki ba roon, bu kë ro ko wi ka wakëtsan wi ngëwejats bukul pëpatsës uwar, ni uwutsëtsuel.