BAYEBËREU 12 - KARÚK-PËRIM KAWALU Nouveau Testament

Pëliincandër tsi uwal mteenamana

¹ Unk n ja buts, bi bamaatir fay nja bink pi kasa kawiak, nda ju ngë wëtan ko un ci wi-ba këci wi ka wocan wi ñaan, nja ka wëtanaand ujuban, wul un car wi pëfaiyar tsi ñaan. A ni umiira, nda ju ngë ci tsi pëtuk pan tsua nja pi tsi bërun.

² Nda ju ngë jutsan këkës tsi najuund uwak a na ciind natsu wul u ba pëci uwar, nul Yeesu. Abër ulílan un tsuaul wi tsi bërun, a na miira a cäts tsi kruus, tsuuts mkaw ko; a na tsoar tsi kariir pëtsoari Nasien-batsi pi pësien.

³ Nda wejatsi-e namënts un na miiree tsi pënatsara pi bajuban natsaraul pank; unk pa unoor pii rits pe ind, ngëwaas ind pii rits ba.

⁴ Tsi ukam wi nda ci wi tsi pëkaman ujuban, nda netse liincandar te pëñaak ind tulaa,

⁵ a nda fin përim kaliinc-liincan ngëwaas pa n jaka ind pi, pi nda ci babuk: “Abuk nji, tsë be bi Ajug kë cikësu bi; a uwaasu tsë ba, uwal wi na ci wi tsi pëleentsaru.

⁶ Par, Ajug aja na roon në cikës ni na ŋal unk, në lumbaj ni na niirani-ba këniiran na ci abukul.”

⁷ Nda miiraan pëkusa. Nasien-batsi a tsij ind pi babuk. Par, napäts naom ni asin dits un ka kus?

⁸ Maa uci nda kusaatsa pëkusa pi bañaan bëlieng kë kusa pi, ci wun nda ci babuk utsand, nda cits babuk tsi ucär.

⁹ Te, ngë ka basin nja tsi umundu wi, a bu kë cikës nja a ngë rimban aatsum bukul. Andes Asin nja ka nkaana ngëwejats, ngë kaats pëfets përimul nja ka ka ubiira a?

¹⁰ Par basin nja ro uwal uties tsi pëcikës nja bi ba wejats bi; maa Nasien-batsi ka cikës nja pa bëkat nja unk nja ka bof tsi uyëmanul.

¹¹ Pëcikësa pan ci pi-ba këci, aja pa roon tsi uwal umënts wun di ka naam ko u líl wi, maa un juats wi. Maa tsi bërun, pë bëkar biki pa kus biki, ko un tsiji wi pëfac ni bëmabal.

¹² Wul ka wun, nda katan iñan i wëtandar yi, ni ijuul i labuts yi.

¹³ Nda roori iyots ind iga icol, najënk tsë ci nalab, maa na yësan.

Pëmob tsi pëfac, ni tsi ubiira un jënts wi

¹⁴ Nda tsasan pëfac pëci tsi ind ni bañaan bëlieng, ndë tsasand puu ci ni ubiira ujëntsal; par ucits ba ubiira ujëntsal, nin ñaan di ka win Ajug.

¹⁵ Nda katan ibats, pa ñaan tsë pënandar tsi bëtseend Nasien-batsi, ni pa kabuul kapíiral tsë jabi, kul tsë tsiji mangusëlër a bacumal ka butana mul.

¹⁶ Nda katandi ibats pa naro ngëko katúk-ufuts tsë ci, nin narispitaarats ko Nasien-batsi pi Esau, nul na waapi ngan ka ngi pëci ngiicul, ngi bajan, undo pëlat pëloole baŋ pi bariala.

¹⁷ Nda me koon, tsi bërun, uwal wi na ŋal wunk pëyank bëbeenir tsi uleka bërukanda, a na pënanaa. Par kaats bi nu ro bi pa pëyaar ibats, ŋal bi na tsasëna bi ka ja ngëwar kamënts kun mŋand.

Ko wi untunda Sinai patsëlaraan wi ni untunda Sion

¹⁸ Nda wokats ko wi kan këraraa wi a uu yëk bërua, ni tsi urëmëntsar ko, ni tsi karëm, ni tsi ukëk.

¹⁹ Nin nda wokats uleentsar uluur, ni tsi uleentsar irim njaka yi; a ban te biki uleentsar yul kë rugar përim pëlon tsë jakaa bukul kak.

²⁰ Par bu yëlaants pëmiira ko un tsua wi: “Ŋal ank uci un jar kërara wun untunda, u tapaa ilaak te u cats.”

²¹ Un pibanaa wi alënkan mak, te Moises ja: “Man lal mak, a ndu lënk.”

²² Maa nda baandi tsi Untunda Sion, tsi përaasa Nasien-batsi nayësal, Jerusalem batsi, tsi ngëwaanju ngëmiil bupinaats nga júk ngi tsi karo ufesta.

²³ Nda baandi tsi bëjúk ijan, bukul ban picana biki itim di batsi. Nda baandi tsi Nasien-batsi, nawat bañaan bëlieng pëleents, tsi ngëwejats bamabal, bukul ban tsua biki a ba ba pëci bawar,

²⁴ tsi Yeesu, nul Natsu-manteelar nan tsij-ni karo-pëloole kawalu, ni tsi pëñaak pan gura pi, pul pan pe pi pëñaak Abel pëñakan uwar.

²⁵ Nda katan ibats, ind përits pok pëte nan ci tsi pëñakan. Par uci bi ba buerats bunk, uwal wi ba pok wunk pëte nan cari leents bukul tsi umundu, andes n ja, ngë ri ka buer buts uci ngë letësa nan car ink koo leentsi nja di batsi.

²⁶ Tsi uwal umënts wun, përimul asiints-siintsan utsia, maa nul inkri awatsan aja: “Uyaas uloole kak, cits utsia rin wi ndu n siints-siintsan wun, maa batsi buts.”

²⁷ Irim yi uyaas uloole kak apiban ne, ngëko ngan yëlana ngi pësiints-siintsana ka pënanaa, ngul nga leempa ngi këleempa. Unk ko u yëlanaatsa wi pësiints-siintsana ka mob tsi pëci.

²⁸ Wul ka wun, bi n ja kë yank bink pësien pa yëlanaatsa pi pësiints-siintsana, nda ju ngë mob ngë liincan bëtseend bëmënts bi. Tsi bul nja kë leempar Nasien-batsi ni bëro bi nuu lílandër bi, ni puu ro ko un jaka wi, ni puu lënkul.

²⁹ Par, Nasien-batsi nja aci bërua bi kan tër bi.