3 JOŊ 1 - KARÚK-PËRIM KAWALU Nouveau Testament

Kawël-mboos kajuundë-ni

¹ Najëŋal, pa Gaayu, nul na ŋalee, ni n ŋali ucär.

² Wi na ŋalee, ma ŋal wi pëci uwar tsi ngëko bëlieng, ni wi pëci ni pëyës bi uwaasu ci bi uwar.

³ Par ma lílan mak, uwal wi ba tsaar ni nja baandi wi, a ba leents ucär un ci wi tsi wi; ni bi kë yandaar bi tsi ucär.

⁴ Nji, in kaa ts ulílan un pe wi wan, pëte upäts nji ci tsi ucär.

Joŋ a tseend Gaayu ibats pa na tambandër

⁵ Wi na ŋalee, tambandër tsi përo ank ni uwak pa biki ngë tsaar biki, bi ba ci bi ba tsooŋ.

⁶ Bu leents di Ngëriisia uleka bëŋalu. Kë ro uwar pa pëñuatsani bukul tsi bëga tsi ko wi Nasien-batsi ŋal wi.

⁷ Par aci-undo Katim Këristu ka wun ba pën a bu kaats ko wi ba yank wi di ban cits biki Bajudeu.

⁸ Unk n ja, ngë ka puu welan bañaan pi bamënts biki, pa n ja pëci ban bof biki ni bukul tsi ucär.

Diotrefes ni Demeetriu

⁹ Man picandëri Ngëriisia ko ulon ko uties; maa Diotrefes ni ka ŋali pëci nacak tsi bukul, welanats wund.

¹⁰ Wul ka wun, uci n bi n baandi rul, ka lesësul uleempul wi na ro wi, bi na jaar wund bi irim i waraatsa yi. A tsañats tsi ko wan din, nul bërierul apok pëwelan batsaar ni inja; a ba ŋal biki pëwelan bukul, na pok bukul, a na ruak bukul di Ngëriisia.

¹¹ Wi na ŋalee, tsë fets ko u waraatsa wi, maa u wara wi. Ñaan ni kandoi uwar, aci ni Nasien-batsi. A ñaan ni kandoi ko u waraatsa wi, winats Nasien-batsi.

¹² A Demeetriu, bañaan bëlieng ka ja uwar tsi ulekaul. Ucar, wul bërier wul leents wun ko uwar wi na ro wi. A wund buts, wund ka leents ko uwar wi na ro wi; a wi m me ko wi wund kë leents wi ci ucär.

Kawël-mboos katuamë-ni

¹³ Man ka ngëko ngëcumal pa pëpicandëriu, maa in ŋalats përo ko wan tsi untíint ni kalúng.

¹⁴ Man aac du n winu tsi ko un ucar wi, nja ka mabulër ngë ñakan.

¹⁵ Pëfac pa ciin ni wi. Ifetsar aleeniu; leeni ifetsar, ñaan ni katimul.