2 TIMOTEU 1 - KARÚK-PËRIM KAWALU Nouveau Testament

Kawël-mboos kajuundë-ni

¹ Pol, Napostolu Këristu Yeesu, tsi uŋal Nasien-batsi, undo kawatsana ubiira un ci wi tsi Këristu Yeesu,

² pa Timoteu, napäts nji ni n ŋali: Bëtseend ba wëlaanu ni kayëk-ipës, ni pëfac, pëpën-ni tsi Nasien-batsi, Asin nja ni tsi Këristu Yeesu, Ajug nja.

Pol atseend Timoteu ibats, pa na liincandar

³ Ma n ja Nasien-batsi baran, nul ni n ci tsi pëleempar, pi batiem-batiem nji, ni ume-kabats ujëntsal, uwal wnja wi n doon koo n lesu tsi bëñaan nji, bërëm ni pënak.

⁴ Ma n ja n les mŋandu, ka ŋal mak pëwinu, pa ka cum ni ulílan;

⁵ a n lesand uwak un ci wi di wi; kanguungu cits tsi wul. Wul, aro ci bërun di atiemu ŋaats, Lois, a u bi ci buts di aninu Ënis. A n baaraan pëfiaar u ci buts di wi.

⁶ Wul ka wun n du lesanu, wamban utseend Nasien-batsi ban ci bunk tsi wi, uwal wi n pafu wunk iñan nji.

⁷ Par, cits uwejats bëlal wi Nasien-batsi wël nja wun, maa uwejats kayëlan-ko, ni bëŋal, ni butsëkal.

⁸ Bi u ci bank, cats kawa puu leents ko wi m ciina wi tsi uleka Ajug; a te cats kawa tsi uleka nji, bi n dica bink, undoul. Maa, nooran ni nji pa Upetsan-uwar, tsi puu sëtsaraan pëyëlan Nasien-batsi,

⁹ nul nan buerani njai, a na rui nja ni karua kayëman. Cits undo ngi ngë ro ngi, maa aci-undo utsaag wi na tsaag wi bërierul, ni undo bëtseend bi ngë wëla bi tsi Këristu Yeesu, te ngëwal netse ro ci;

¹⁰ inkri, tsi upibandari Nabueran nja Këristu Yeesu, a bëtseend bëmënts bi pibanaa. Nul cok un uyëlan pëcäts, a tsi Upetsan-uwar a na cil ani pëyës ni karika-cats.

¹¹ Undo Upetsan-uwar wi, ka wun n tsua pëci naleents-përim, ni Napostolu, ni najukan.

¹² A wul ka wun n ci tsi unoor tsi ngëmënts ngi. Maa nji kawaraatsa ngul, par man me ni n tsuuni uwak, a n fiaar koon na yëlan pëwaay ko wi n gaangana wi, te Unu umënts wan.

¹³ Teenëni irim iwar i n leents yunk a m te; liincandari ni uwak ni bëŋal tsi Këristu Yeesu.

¹⁴ tsi bëtsënk Uwejats-ujënts, wul un ci wi di nja waayan bëgaang bëwar.

¹⁵ Bi m me bunk, ban ciina biki bëlieng Aasia, bu fatsin ufets, ŋal Figeelu, ni Ermoogenes.

¹⁶ Ajug na yëkari bañaan kato Onesiforu ipës. Par, arëmb puu juabutsanin uwaas, a te kawaraatsa bi n dica bink;

¹⁷ maa ubaandiul wun di Rooma, a na tsasin mak te na winin.

¹⁸ Ajug na tseendanul pëyëkara ipës tsi bërun Ajug, tsi Unu umënts wan. A te m pe pëme ngi na roorin ngi bëlieng di Efeesu.