2 TESALONIKA 2 - KARÚK-PËRIM KAWALU Nouveau Testament

Upibandari Ajug

¹ Batsaar ni wund, inkri tsi uleka pëbi Ajug nja Yeesu Këristu, ni nja pëjúk tsi nul, wund añaan ind këñaan ko wi:

² Ngëwejats ind tsë car pëgusëlër, nin ngëwaas ind tsë nats kënats, undo aka përim ank pa leents pi u meaatsa wi, oo ko jaka wun ank, oo aka uletar un jaka wi apënë-ni tsi wund ank, a nga tsu ind pëja ne Unu Ajug abaandi.

³ Ñaan tsë raac ind koon këraac tsi kafal; par kawëtan-uwak ka baandi kun ucak, Kanfetsats-ngëtsua ka pibandari, nul Kambukara-pëniam,

⁴ nul nakaman na natsaree pëkaman ko wi jaka wi ba këjaka Nasien-batsi, oo wi kan jintëlaana wi; a nuu riang beenul a në tsënkëna ka tsoar bërierul di kato-kayëman Nasien-batsi, në tsu beenul aci Nasien-batsi.

⁵ Mando ka n leents ind ngëmënts ngun, uwal wi n wama wi ndo ci ni ind; nda lesats-a?

⁶ Inkri, nda me ko u mobul wi, pa tsi uwalul në rura pibanee.

⁷ Par undoots wunk mea, wi kafetsats-ngëtsua, aci ba tsi uleemp. Maa aka këka na mobi wul inkri, aa në tsënkëna ka pënana tsi pëncuaf.

⁸ Din Kanfetsats-ngëtsua ka pibanee, nul ni Yeesu, Ajug, kë fiŋi ni ufuts mtumul, në ba ni nul ni ufietsar pëbiul.

⁹ Bëro Useetaani ka tsiji bun ubaandari Kanfetsats-ngëtsua; a tsi kafal buu ro ngëkoraar ngan ci ngi ba këci, ngi bawitsa, ni ngi ngëpibanaani, ni ngi ngëko ngan pikra n ngi.

¹⁰ Bul, buu roond ngëkoraar manfalar bëlieng tsi kamabats, pëniaman iyeen bukul, par bë niiraants bëŋal ucär din bu ka buerana.

¹¹ Wul ka wun Nasien-batsi kë wëtani bukul uyëlan wi ka niaman wi ñaan, bu ka wak ko un cits wi ucär.

¹² Din bañaan bëlieng ba uwakats biki tsi ucär ka lacana, bukul balílan tsi kamabats.

Pëliincandër tsi uwak

¹³ Batsaar ni wund, ind biki Ajug ŋal biki, wund aka pëbaran Nasien-batsi tsi uleka ind, tsi ngëwal bëlieng. Par ki ujuundi, Nasien-batsi aratar ind pëbuer. Nul aparanaan ko wan tsi Uwejats wi ka yëman wi, ni tsi pëwak tsi ucär.

¹⁴ Undo ko umënts wun, a na ruuni ind Upetsan-uwar wund, ind pëbof tsi përëmb Ajug nja Yeesu Këristu.

¹⁵ Batsaar ni wund, bi u ci bank, nda liincandari, ndë mob tsi ngëdimaan ngi nda jukana ngi; uci ank tsi ko wi wund jukan ind wi ni mtum, oo tsi uletar wund.

¹⁶ Ajug nja Yeesu Këristu bërierul, ni Asin nja Nasien-batsi, nul na ŋalnjai, a tsi bëtseend a na wël nja ka liinc-liincana ngëwaas kan dits ki ka ba, a na wëland nja uwats u wara wi.

¹⁷ Na liinc-liincani ind ngëwaas, në tsu ind pëliinc tsi përo ko un ciwi-ba këci uwar, ni tsi përim pan ci pi-ba këci pëwar.