2 TESALONIKA 1 - KARÚK-PËRIM KAWALU Nouveau Testament

Kawël-mboos kajuundë-ni

¹ Pol, ni Silwaanu, ni Timoteu, pa Ngëriisia bañaan Tesalonika, ngul ngan ci ngi tsi Nasien-batsi, Asini njani tsi Yeesu Këristu, Ajug.

² Bëtseend ba wëlaan ind ni pëfac, pëpën-ni tsi Nasien-batsi, Asin, ni tsi Yeesu Këristu, Ajug.

Kawata-pëleents, uwitsee Këristu

³ Batsaar ni wund, wund aka pëbaran Nasien-batsi tsi uleka ind, sandëndën; te aci ko u mab wi, par uwak ind aci tsi pë watsësar mak, a bëŋal bi nda ŋalëlar bi kë pelëk këpelëk tsi kara ñaan tsi ind bëlieng.

⁴ Wul ka wun wund ja wund roon, wund kë píc tsi iriisia Nasien-batsi, undo mtambandar ind ni undo uwak ind, tsi pënoor-noorana pi nda ciina pi bëlieng, ni tsi pëteenamana.

⁵ Ngul apiban kawat-pëleents ki Nasien-batsi kë wat ki ci kamabal. Unk ngul, ngë tsu ind pëtsënkan pëci biki pësien Nasien-batsi, pul pi nda ci pi tsi pënoorar.

⁶ Par, aci ko u mab wi tsi Nasien-batsi, ban tsu ind biki tsi unoor, në kakan bukul unoor.

⁷ A ind ban tsua biki tsi unoor, në wël ind pënaakësa ni wund. A upibandari Yeesu, Ajug, upëniul batsi ni ngëwaanju pëyëlanul,

⁸ di bametsu kandiamënt bërua, në lukan ba meets biki Nasien-batsi, ni ban fetsats biki përim Upetsan-uwar Ajug nja Yeesu.

⁹ Pëlukana pi bu kë lukana pi, ka ci bukul pëcokaa uloole, ba lawan urostu Ajug ni përëmb pëyëlanul.

¹⁰ Ka bi tsi unu umënts pii rëmbana tsi bañaanul bayëman, ba uwak biki bëlieng ka riangul tsi ngëwaas bukul. Te ind nda bof, par nda wak ko wi wund maatir wi a wund leents ind.

¹¹ Wul ka wun buts, wund ci tsi pëñaandar ind tsi ngëwal bëlieng. Unk Nasien-batsinjaka tsu ind ndë wina nda tsënkan pëbof tsi karuaul, ni tsi pëyëlanul në ba përo uwar wi nda ŋal wi ba këŋal, ni ko wi uwak ind kë ro wi.

¹² Katim Ajugnja Yeesu ka ci kan dëmbana ki tsi ind, ind buts ndë ci ban dëmbana biki tsi nul, u mab ni bëtseend Nasien-batsinjabi Yeesu Këristu, Ajug.