2 PER 3 - KARÚK-PËRIM KAWALU Nouveau Testament

Ubiiri Ajug

¹ Bamiñ ba ŋala biki, wi ci wun uletar utëbantsan wi n du n picar ind wi. tsi ngul ngëtëb, man ci tsi pëlesan ind ngëko ngi, pa pëwamb ngëwejats ind ngëjëntsal;

² pa ind pëles irim i bayëlia bayëman ro yi leents, ndë lesand irim utsua Ajug, nul Nabueran, i bapostolu ind kë jukan yi.

³ Ucak ko, nda ka pëme ne, tsi ngënu ngëtuami, bariat-ko ka cili bu kë yandaar tsi karí-ko bukul bërier bukul,

⁴ bu kë ja: “Uwatsan pëbiul aci tsum-i? Par ki basin nja cäts ki a ngëko wama wam bëlieng bi nga ro bi ci, ki ujuundi kaleemp umundu.”

⁵ Bariat-ko bamënts biki, bu fin batsi ni utsia ro ci ba ki uwal ujon, a utsia pënë-ni di mlik undo përim Nasien-batsi.

⁶ A umundu ujon umënts wun bi fuera mlik, a u baan.

⁷ Maa batsi ni utsia ngul ngan ci ngink inkri, përim Nasien-batsi pëloole pëmënts pun, ayecis ngul pa bërua, a pa gaangar ngul Unu kawat-pëleents, ni pëniam bameets-nasien-batsi.

⁸ Maa bamiñ ba ŋala biki, aka ulon ko wi nda kaats wi pëfin: Pa Ajug, unu uloole aci pi ngëwaanu umiil; a ngëwaanu umiil ci pi unu uloole.

⁹ Ajug di ka jonand uwatsanul, bi balon kë wejats bi tsi ibats, nuu jonand; maa aja na roon nuu miira ind këmiira ind, a ŋalats nin naloole pëniam, maa bañaan bëlieng pëyaar ibats.

¹⁰ Maa, Unu Ajug ka baandi pi nakiej. tsi unu umënts wun, batsi ka niaman ni uleentsar uwiak; ngëko ngan ci ngi di batsi ka yëk nga gara. Utsia ni ngëko ngan ci ngi bëlieng tsi wul, ka yëkëraa.

¹¹ Bi ngëko ngi ka bink pëgaraa bëlieng, uwom ukoraar bañaan wi nda ka un pëci? Nda ka puu yandaar tsi bëjëntsal, ni tsi pëlënk Nasien-batsi,

¹² nduu lip, ndë cësara Unu Nasien-batsi pëbaandi; unu wi batsi kë tëra wi ba gara, ngëko ngan ci ngi di bul ka yuuy.

¹³ Maa n ja, tsi ko wi na ja wi di uwatsanul, nja ka lip batsi buwalu ni utsia uwalu, di bëmabal ciina ri.

¹⁴ Wul ka wun, bamiñ ba ŋala biki, bi nda ci bink tsi pëlip ngëko ngëmënts ngi, nda tambandari pa nul pëwin nda ci tsi pëfac, nda rits ka basal, ndë ci ban dits biki ka leentsara.

¹⁵ Nda mean ne, umiira wi Ajug kë miira wi, aci pa pëbuer ind; unk di natsaar ni nja Pol picandar ind run buts, ni kameko ki na wëla ki.

¹⁶ Bi na ñakanaan bi ngëko ngi, unk buts di na wakëtsa run përo di ngëletarul bëlieng; tsi ngul, aka ngëlon ngëko ngan ñats ngi pëme ko wi nga pac wi. Ngul ngi bameets-ko ni baliincats tsi uwak, ja ngun ba roon bu kë cík, pi bu kë cík pi Bëpican, pa pëniam bukul bërier bukul.

¹⁷ Bi u ci bank, bamiñ ba ŋala biki, bi nda car bink ame ngëko ngëmënts ngi, nda rukan ibats; ind tsë wët bameets-ngëtsua, ba tsëpand ind di mtsopi bukul, a ndii yër tsi uwak ind wi nda natsëna wi.

¹⁸ Maa nda wiakaan tsi bëtseend ni tsi ume Yeesu Këristu Ajug nja Nabueran. Nul na wëlaan përëmb inkri, pa sandëndën. Ameen!