2 PER 1 - KARÚK-PËRIM KAWALU Nouveau Testament

Kawël-mboos kajuundë-ni

¹ Simon Per naleemp, a na ciind Napostolu Yeesu Këristu, pa ban tsënkan bukunk uwak un ka wi bëkat pi wiic nja tsi bëmabal Nasien-batsi nja, ni Yeesu Këristu Nabueran.

² Bëtseend ba watsësaan ind ni pëfac, ndë cum ni ume Nasien-batsi, ni wi Yeesu, Ajug inja.

Ko wi nawak tsi Yeesu ka wi përo

³ Pëyëlan Nasien-batsi awël nja ngë ko bëlieng, ngi kan tsu nja ngi pëka ubiira ni puu lënk Nasien-batsi, ni pëtsu nja pëme uwar nan duuri nja unk përëmbul ni kawara-uwaasul.

⁴ tsi ngëko ngëmënts ngi, tsi na watsanaani njatsun ngëwatsan ngëwiak, ngan ka ngi bëkat, pa undo ngul, ndë ruka ci ban bof biki tsi bëci Nasien-batsi, ndë bueri tsi kacok, ni karí-ko kan ci ki tsi umundu.

⁵ Undo ko umënts wi, nda tambandari ndë watsës karo-uwar tsi ruets uwak ind; tsi ruets karo-uwar, ndë watsës ume;

⁶ tsi ruets ume, ndë watsës kayëlan ngëliaf ind; tsi ruets kayëlan ngëliaf ind, ndë watsës pëliincandër; tsi ruets pëliincandër, ndë watsës pëlënk Nasien-batsi;

⁷ tsi ruets pëlënk Nasien-batsi, ndë watsës butsaar; tsi ruets butsaar, ndë watsës bëŋal.

⁸ Par uci ngëko ngëmënts ngi ci di ind, a nguu watsësar, ngë tsu ind përits ci barika-ro ko, ni ban dits biki ka buk mbuk, tsi ume Yeesu Këristu Ajug inja.

⁹ Maa nan kaatsi ngëko ngëmënts ngi, aci nafël-këkës; ka win nga woki ngi rin, në fin kajëntsana ngëjubanul ngi uwal ujon.

¹⁰ Wul ka wun, batsaar ni nji, nda tambandari kara bëyaas tsi puu piban nda ci ban duee biki, a nda rataa; uci nda ro ank, nda katse ka yër yaas.

¹¹ Par, unk ri ndu wëla run bëga buwaanal, pa pëniaj Pësien Ajug nja pan dits pi ka ba, nul Yeesu Këristu Nabueran.

¹² Undo ko umënts wi ka wun n yecis, pa puu lesës ind ngëko ngëmënts ngi, ŋal bi nda me bink ngul, a nda mob aliincan tsi ucär wi ngë ciina wink.

¹³ Maa bi n wama bink a n ci tsi unkundan wi, ma win u ci ko u mab wi, nji puu lesës ind ngëko ngi.

¹⁴ Ma me ne, man wokan ba pëwëtan unkundan nji, bi Yeesu Këristu Ajug nja pibanin bi.

¹⁵ Maa, mán tambandar pëtsënk ind, pa ŋal upën nji, ndë mob tsi puu les ngul.

Ngëpibanaani përëmb Këristu

¹⁶ Bi wund kë leents ind bi uleka pëyëlan ni ubiiri Yeesu Këristu Ajug nja wund fetsats itëtan i ñaan-najin jaj yi këjaj, maa wund aci bamaatir biki bërier wund, a wund win përëmbul ni këkës wund.

¹⁷ Par ayank urispiitu ni përëmb, di Nasien-batsi, Asin; bi përim pëni bi di Përëmb Batsi abi pa nul, a pa ja: “Ni ci-un Abuk nji na ŋalee, man lílandërul mak.”

¹⁸ Maa, përim pan pëni pank batsi, wund ate pul bërier wund, bi wund ci bi ni nul di untunda uyëman.

¹⁹ Unk, ngë pe këpe pëwak përim bayëlia; a nda ro uwar bi nda me bink pul, par pul aci pi ulamp ka fiets wun di tsëko tsan dëmënts tsi, te unu ka tsënkëna ka fac, upesaj kafa-unu ka fietsi di ngëwaas ind.

²⁰ Nda mean bërun ko wi: Kaats përim pi bayëlia leents pi di Bëpican, a pa pënë-ni tsi ume ñaan-najin;

²¹ par yaas a përim pi bayëlia leents pi ka pënë-ni tsi uŋal ñaan-najin, maa Uwejats-ujënts tsu wun bañaan a ba ñakan uleka Nasien-batsi.