2 KORINTU 11 - KARÚK-PËRIM KAWALU Nouveau Testament

Bapostolu batsup

¹ Uci nda roon iink yëlan pëmiireen, ka ñakanaan ind uñakan bëfuur ko uties! Maa, nda miireen!

² Par pëlaaŋaraan pi n laaŋaraan ind pi apënë-ni di Nasien-batsi. Par man cueban ind ayën ind naloole, un ci wi Këristu; pi nampëli na meetsi niints najënts.

³ Maa, man lënkar ngëwejats ind përits coka, ndë pën ka lawan kafac-uwaas kan ci ki tsi Këristu; bi uko-pëtsats fal bunk Eewa ni maniamëlan.

⁴ Par ind, nalon ñaan bi ee leents ind uleka Yeesu mlon man patsi mi ni mi wund leents ind mi, oo uci nda niiran ulon uwejats un pats wi ni wi nda ro wi yank, oo Upetsan-uwar un pats wi ni wi nda ro wi niiran ba; ñaan namënts un ndë lílandërul uwar.

⁵ Par man wejats a nja, kaats ko wi n peena wi pëtiesëts tsi bapostolu ban pats bakank.

⁶ Ŋal bi n cits bi nayël uñakan, in cits wël tsi ume; tsi ucär, wund apiban ind ngëmënts ngun tsi ko un jënts wi, tsi ngëko bëlieng.

⁷ Bi n welan bi been nji bërierin pa ind përëmbanaa, a n leents ind Upetsan-uwar Nasien-batsi te in yepats bëluk, ane man do këro ujuban-a?

⁸ Man yanki bëluk tsi ilon iriisia pa pëleempar ind.

⁹ A uwal wi n ci wi di ind, a n fier, maa in yankats ko ñaan; par batsaar ni nja ban pënë-ni biki Masedoonia tsënki bukun tsi ko wi n katsan wi. A tsi ngëko bëlieng, a n miira; a n miira përits ci ko un dits wi pa ind.

¹⁰ A bi ucär Këristu ci bi tsi nji, përëmb pi di ka laaŋain di këboos Akaaya.

¹¹ We ka wun? Par nji n ŋalats ind-a? Nasien-batsi ame wul!

¹² Maa ko wi ndu ndo wi, mán wama ka ndo wul pa përíc bëga biki kan tsas biki bëro, pëjaka bu liing ni wund tsi ko wi bu kë bëndan wi iyeen bukul.

¹³ Bamënts bakan bë ci bapostolu batsup, baleemp baniamëlan ba witsësar biki bërier bukul anaam bapostolu Këristu.

¹⁴ A ko wan pikranats, par ŋal Useetaani bërier wul awitsësar anaam uwaanju ufac.

¹⁵ Maa cits ko u ñats wi, pa baleemp wul, pëwitsësar ba naam baleemp bëmabal; utuami bukul ka ci pi ngëleemp bukul.

Unoor Pol

¹⁶ Má n ja bëyaas bëcints kak, ñaan tsë tsuin pëci nafuur; maa uci ñaan wejats ank, na tsuin pëci nafuur pa nji pëbëndan been nji buts ko uties.

¹⁷ Ko wi n ñakan wi, i ñakanats wul tsi undo Ajug; maa anaam pi man fuur, tsi uwats umënts wi, ka wun n du n bëndan been nji.

¹⁸ A bi bacumal kë bëndan bunk iyeen bukul tsi pëyëlan uyamats, nji buts mán bëndan been nji.

¹⁹ A ind bi nda ci bi balipal, wul ka wun ndu miira bafuur ni uwejats uwar.

²⁰ Ind, nda niiran ind pëtsua baluek, ind puu rea, ind puu caana ngëko, ind puu riangara icak, ind puu waŋaa iñan di imbakats.

²¹ Man kawa pëja ko wan, wund aka bërafal mak! Nji man ñakan pi nafuur, ko u yeentsa wi pëjaa, nji buts man yeents.

²² Bukul bë ci Bayebëreu a? Nji buts! Bu ci baisrael a? Nji buts! Bu pënë-ni tsi kajër Abraam a? Nji buts!

²³ Mán ñakan pi in kaats uwejats. Bu ci baleempar Këristu-a? Nji man pe bukul! Tsi uleemp u ñats wi, man pe bukul! Tsi përica, man pe bukul! Tsi këlumbanj ki n lumbanjaa ki, jaakaats! Tsi pëjuatsan te a ndu n tsas pëcäts, ngëyaas ngëcumal!

²⁴ Ngëyaas kañan, Bajudeu alumbanjin këlumbanj ngëntaaja ngëbaakër nga ndukësangi pëloole;

²⁵ ngëyaas ngëwaants, a n kobaa ni pëndog. Uyaas uloole, a n tapaa ilaak; ngëyaas ngëwaants, tsi pëtula di bërëk. A n paran bërëm buloole ni pënak pëloole tsi uriabatsar ngëmaroŋ.

²⁶ tsi iyaas icumal i n do yi, a n ci tsi ijuats tsi ibulaŋ, ijuats tsi bakiej, ijuats tsi biki uraasa nji, ijuats tsi ban cits biki Bajudeu ijuats tsi përaasa, ijuats tsi ulaalats, ijuats tsi bërëk, ijuats tsi ba witsësar biki ci pi batsaar ni nja.

²⁷ tsi uleemp u ñats wi, ni tsi karika-ŋooy ngëyaas ngëcumal, ni ubon ni ulof. tsi kabër-mlik ngëyaas ngëcumal, ni ujoonts ni karanj iŋi-bëtiem.

²⁸ Ni ngëlon ngëko di ulaay, ngi kan fieranin ngi, unu un ci wi, ni pëfierand iriisia bëlieng.

²⁹ Yën ci-un nan dafi, a nji n dafac? Yën ci-un na yëri, ni uwaas nji ditsi ka yëkarul?

³⁰ Uci n ka pëbëndan been nji, ka bëndanaan been nji tsi ko un ci wi bërafal nji.

³¹ Nasien-batsi, Asin Yeesu Ajug ni ka n jaaree-ngëwar pa sandëndën ame n tsupats.

³² Uwal wi n ci wi di Damaasku, nanekar nasien ni ka n jakee Aretas, tsu përaasa pa waayaa, pa nul pëmobin.

³³ Maa, a n welanee tsi pëcaa a n cilanee di ruets pëlënk tsi ujaneela pa utsia, a n buer tsi iñanul.