2 KORINTU 10 - KARÚK-PËRIM KAWALU Nouveau Testament

Pol anatsar pëleents bi na tsënkan bi pëci Napostolu.

¹ Nji Pol bërierin, man buara ind tsi kajuab-uwaas Këristu ni tsi karo-uwarul, nji nan tienkëtsani been nji uwal wi n ci wi tsi pëncuaf ind, maa a n yëkan tsi uleka ind, uwal wi n lawan wi.

² Inkri, man ñaan ind këñaan, ind tsë tsuin pëñakanaan ind ni uyëlan u ci nji rul; bi n yecis bi pëñakanaan biki kan ja biki bëro wund aci bëro ngi ngëwejats ñaan-najin.

³ Ŋal bi wund kë yandaar bi tsi uyamats, maa cits bi uyamats ŋal bi, bi wund kë kamanaan bun.

⁴ Par iŋi i wund kë kamanaan yi, cits i uyamats; maa pëyëlan yul apënë-ni tsi Nasien-batsi, pa pëcok ilënk-iwaayaraani. Wund ka gar-garan ngëtsaag ngan cits ngi ngëcar,

⁵ ni mdiangar ma ci mi ba këci a muu natsara pëcok ume Nasien-batsi; wund ka tsu ngëtsaag bañaan bëlieng ngan cikëndën Këristu, ngë niiranul.

⁶ A uwal wi nda baar wi pëniiran ko un tsua wi, wund ka baar buts pëtucan baroots ko un tsua wi.

⁷ Nduu teena ngëko tsi bënaamar ngul a? Uci ñaan watsar aja aci ni Këristu, na wejatsi bërierul kak, në me bi na ci bunk ni Këristu, wund buts wund aci biki Këristu.

⁸ A ŋal bi n píc bi ko uties tsi undo pëyëlan pi Ajug wël wund pi, in cits tsi mkaw; par aci pa pëliinc-liincan ind, cits pa pëcok ind.

⁹ Nji n ŋalats pëjaa man tsu ind bëlal tsi ngëletar nji.

¹⁰ Par bë ja: “Ngëletarul a tsij pëyëlan ni uyëlan; maa uwal wi na ci wi ni nja di ka ka uyëlan nin përimul kaats bëkat.”

¹¹ Ñaan nan jai ko wan aka pëme uwar, ko wi wund ci wi tsi ngëletar ngi wund pican ngi, uwal wi wund ci wi di tsëko tsëlaw, unk di wund kë ci run tsi ngëko ngi wund kë ro ngi, uwal wi wund ci wi ni ind.

¹² Par wund yeentsats pëniib iyeen wund, oo pëliingan yul ni balon biki kan bëndan biki iyeen bukul bërier bukul. Maa bukul, bu fuur, a bu kë niib iyeen bukul bërier bukul, bu kë naaman yul tsi kaniibi bukul.

¹³ Maa wund, wund ri ka bëndan iyeen wund wund paran kaniibi, maa wund ka liing tsi kaniibi kamabal ki Nasien-batsi wël wund ki, pa wund pëbaandi te di ind.

¹⁴ Par wund par-paranats iniibi wund, pi wund baandatsi te di ind, maa wund acakës abaandi bërun te di ind ni Upetsan-uwar Këristu.

¹⁵ Wund ri ka bëndan iyeen wund tsi ko un cits wi kaniibi ki Nasien-batsi tsu wund ki, wund ri ka bëndan iyeen wund tsi uleemp wi balon do wi ba; maa wund awats ne u ci uwak tsi pëwiaka, wund kë pe këpe pëwiaka tsi pëncuaf ind, tsi kaniibi kan tsua ki,

¹⁶ pa wund pëleents Upetsan-uwar ka paran ngëcaak ind; nin wund ri ka bëndan iyeen wund tsi ngëleemp ngi balon do ngi.

¹⁷ Ni kan dëmbandari, na rëmbandaraani tsi Ajug.

¹⁸ Par cits ni kan dëmbandari bërierul ka niirana un, maa ni Nasien-batsi dëmbani.