1 TESALONIKA 5 - KARÚK-PËRIM KAWALU Nouveau Testament

Nda yecisëri pa unu Ajug

¹ Inkri, tsi uleka ngëwal ni icël, ind batsaar ni wund nda fierats pëpicandara.

² Par ind bërier ind, nda ba pëme Unu Ajug kë baandi pi nakiej, bërëm.

³ Uwal wi bañaan kë ci wi tsi pëja: “Pëfac aci, a ngëwaas bañaan tsoar” din tsi ucar umënts wun kacok ka yërëni bukul, pi urear uliaf-kabuk tsi ŋaats naseemp. Nin bë ri ka buer koon këbuer.

⁴ Maa ind, batsaar ni wund, nda cits tsi karëm, pëjaa unu umënts apúuts ind pi nakiej.

⁵ Par ind bëlieng, nda ci babuk ufac, babuk pënak: ngë cits nin biki bërëm, nin biki karëm.

⁶ Bi u ci bank, n ja tsë ŋooy pi ban duka bukunk; maa nda jun ngë mob tsi kawaay, nja kë liingëlan ko.

⁷ Par, biki ka ŋooy biki, bu ka ŋooyëna bërëm; a biki kan kuj biki, bu ka kujëna bërëm.

⁸ Maa n ja ban ci biki biki pënak, nda ju ngë ci baliingëlën-ko, ngë waa kaŋí-ukam kakundëni bëjinc, ki uwak ni bëŋal, nja ka wura kaŋí-ukam kakundëni been, ki uwats pëbuer.

⁹ Par Nasien-batsi tsuurats nja uriabul pëbaandëni nja maa atsuur nja pëyank pëbuer tsi Ajug nja Yeesu Këristu,

¹⁰ nul nan cätsarinjai, pa ngë ci ank tsi kawaay, oo ngë ci ank tsi bëŋooy, nja kë ci ni nul, tsëloole.

¹¹ Wul ka wun, nda liinc-liincandari ngëwaas, nduu tsënkëlar, bi nda ci bunk ba tsi përo.

Ngan tsua ngi përoa ni kawël-mboos katuam-in

¹² Batsaar ni wund, wund añaan ind, nda ru kaan karëmban biki ka leemp biki mak tsi pëncuaf ind, bukul biki ka waay ind biki tsi Ajug, a bu kë leentsar ind uci nda lac.

¹³ Nda wëlan bukul urispiitu mak, tsi bëŋal, undo uleemp bukul. Nan ci tsi ind nuu yandaar tsi pëfac ni bacintsul.

¹⁴ A wund kë buara ind, ind batsaar ni wund, nda leentsari batsuunk-uleemp, nda liinc-liincani ngëwaas baraf-katsëb, nda tsënkan ban ci biki barafal, nda miiraan bañaan bëlieng.

¹⁵ Nda katan ibats, ñaan tsë lukan uwutsëtsuel wi na rolaa wi. Maa tsi ngëwal bëlieng nda tsasan puu rolar uwar, ni puu ro wul bañaan bëlieng.

¹⁶ Nda lílani tsi ngëwal bëlieng.

¹⁷ Nda ñaanan, ind tsë wëtan.

¹⁸ Nda barani tsi ko un ci wi-ba këci, par umënts wun aci uŋal Nasien-batsi pa ind, tsi Këristu Yeesu.

¹⁹ Ind tsë jimb Uwejats Nasien-batsi.

²⁰ Ind tsë be irim bayëlia.

²¹ Nda yëkërani ko un ci wi-ba këci, ndë mob tsi u wara wi.

²² Nda randan ko un ci wi-ba këci u waraatsa wi.

²³ Nasien-batsi pëfac, bërierul na jëntsani ind cës; a uwejats ind u gaangaan ni uwaas, ni uliaf tsi kakaats-ulaci, te ubiri Ajug nja Yeesu Këristu.

²⁴ Nandui ind unk aci na mobi tsi përim; a nul kee ro un wul.

²⁵ Batsaar ni wund, nda ñaandëri wund.

²⁶ Nda leeni biki ngë tsaar biki bëlieng, ni mawunkëlër man jënts mi.

²⁷ Man buara ind tsi Ajug, pa uletar wi pëjuka tsi biki ngë tsaar biki bëlieng.

²⁸ Bëtseend Ajug nja Yeesu Këristu, ba ciin ni ind.