1 TESALONIKA 4 - KARÚK-PËRIM KAWALU Nouveau Testament

Ubiira wi Nasien-batsi kë lílandër wi

¹ Pa pëtuamës, ind batsaar ni wund, wund ajukan ind bi nda ka bi puu yandaar pa Nasien-batsi pëlilandër ind. Te, unk di nda ci run tsi përo. Maa wund añaan ind këñaan a wund kë tseend ind ibats tsi Yeesu Ajug, nda moban tsi përo ank nda pean kak.

² Par, nda me ngëtsua ngi wund wël ind ngi, ngan pënë-ni ngi tsi Yeesu, Ajug.

³ Par uŋal Nasien-batsi, aci ubiira ind pëci ujëntsal. Nda randan ngëko katúk-ufuts,

⁴ kara ñaan tsi ind, në me bi nuu tsij bi uliaful tsi bëjëntsal ni tsi urispiitu.

⁵ Nul tsë ci tsi përi ngëko katúk-ufuts, bi ban cits biki Bajudeu kë ro bi, bukul ba meets biki Nasien-batsi.

⁶ A tsi umënts wun, ñaan tsë ro ko wi ka lacanul wi tsi uleka acintsul, oo përeanaanul. Par, Ajug ka lukan ngëmënts ngun bëlieng, bi wund car bunk aleents ind, a wund piban ind.

⁷ Par, Nasien-batsi ruurëts nja pëci tsi mtsopi, maa pëci tsi bëjëntsal.

⁸ Unk, nan bëri ko wan, cits ñaan-najin ni na bër un, maa Nasien-batsi ni na bër un, nul ni ka wëli indi Uwejatsul Uyëman.

⁹ A tsi uleka pëŋalëlar tsi nda tsaar tsi, nda fierats pëpicandara ko, par ind bërier ind Nasien-batsi ajukan ind puu ŋalëlar.

¹⁰ A te nda ci tsi përo umënts wun tsi uleka biki ngë tsaar biki, bukul bëlieng, tsi Masedoonia bëlieng. Maa wund abuara ind, batsaar ni wund, ind puu pe këpe përo unk.

¹¹ Nda tsuun tsi ibats puu yandaar tsi bëtsëkal, ni puu tsañ tsi ngiic ind, ni puu leemp ni iñan ind, bi wund tsu ind bi puu ro.

¹² Din, bañaan utsand ka win bëci ind bëwar; unk nda rits fier ñaan.

Yeesu Këristu ka witsee

¹³ Batsaar ni wund, wund ŋalats ind përits me ko tsi uleka bacäts, unk nda rits juatsan pi banduka bukunk, bukul ban kaats biki uwats.

¹⁴ Par, uci bi ngë fiaar bink Yeesu cäts a na natsee di pëcäts, unk buts ban cäts biki tsi Yeesu, Nasien-batsi ka tsiji bukul ni nul.

¹⁵ Ko wi, wi wund kë ja ind wun tsi përim Ajug: Ban cäts biki, ngë ri ka yër bukul bërun, njabayësal, n ja ban duka biki te ubiri Ajug.

¹⁶ Par, uleentsar utsua, uleentsi përim Uwiak-ngëwaanju, uleentsi uluur Nasien-batsi, din Ajug bërierul ka pëni di batsi na welee, ban cäts biki tsi Këristu ka natsee bërun.

¹⁷ A uu ba, n ja ban ci biki bayësal, n ja ban duka biki, nja ka wajaa ni bukul pëtsëp tsi ruets isa, pa pëjëk ni Ajug di ruets. Unk, nja ka ci ni Ajug, pa sandëndën.

¹⁸ Bi u ci bank, nda liinc-liincandari ngëwaas tsi irim imënts yi.