1 TESALONIKA 1 - KARÚK-PËRIM KAWALU Nouveau Testament

Kawël-mboos kajuundë-ni

¹ A pënni ri Pol, ni Silwaanu, ni Timoteu, pa Ngëriisia bañaan Tesalonika, ngul ngan ci ngi tsi Nasien-batsi, Asin, ni tsi Yeesu Këristu, Ajug. Bëtseend ba wëlaan ind ni pëfac!

Ubiira bañaan Tesalonika ni uwak bukul

² Wund ja wund roon wund kë baran Nasien-batsi sandëndën tsi uleka ind bëlieng, wund kë ru itim ind tsi bëñaan wund.

³ Wund wëtaants puu les ngi uwak ind piban ngi, ni ngi bëŋal ind ro ngi, ni umiira uwats ind tsi Ajug nja Yeesu Këristu, ni tsi bërun Nasien-batsi nja Asin.

⁴ Amea koon nda rata, ind batsaar ni wund, ind biki Nasien-batsi ŋal biki mak.

⁵ Par, Upetsan-uwar wund, baandatsi tsi ind ni irim din, maa buts ni pëyëlan, ni Uwejats-ujënts, ni pëfiaar mak u ci-un ci wi. Nda me bi wund ro bi ci ja tsi pëncuaf ind, pa uwar ind.

⁶ Nda ruka ci bateenëna tsi wund ni bateenëna tsi Ajug. Par, ŋal bi nda ci bi tsi unoor un pelëk wi, maa ni ulílan Uwejats-ujënts nda niiran përim.

⁷ Unk, a nda ruka ci upibanaani ba uwak biki bëlieng di Masedoonia, ni di Akaaya.

⁸ Përim Ajug apëni tsi ind, ateaa; cits rin di Masedoonia ni di Akaaya, maa tsi tsëko tsan ci tsi ba këci. Uwak ind tsi Nasien-batsi ameaa, a wund fierats pëja ko tsul.

⁹ Par bukul bërier bukul, bë ci tsi pëñakanaan uleka wund, bi bu kë leents bi pëwelan pi nda welan wund pi, ni bi nda witsësa bi pa Nasien-batsi. A nda wëtan icap, pa pëleempar Nasien-batsi nayësal a na ciind nacär.

¹⁰ A nda ci tsi pëlip Abukul, ni kan pënii di batsi, ni na tsui a na natsee di bacäts, nul Yeesu, ni ka pënani ija tsi uriab Nasien-batsi wi kan bi wi.