1 PER 5 - KARÚK-PËRIM KAWALU Nouveau Testament

Per aliinc liincan ngëwaas bajëŋal Ngëriisia

¹ Mán liinc-liincan ngëwaas bajëŋal ban ci biki tsi ind, nji nan ci najëŋal pi bukul, a n ci namaatir ngënoor Këristu; a n bofëna tsi përëmb pan ka pi pëpibana.

² Nda yafani pëtan ngënkaanel Nasien-batsi pi nda tanan pi. Ind tsë ñaas ngul maa nda tsuunkari ngul bi Nasien-batsi ŋal bi; cits ni uwejats karí-ko, maa ni uŋal uwar.

³ Biki nda tanan biki, ind tsë roona uyëlan; maa nda ciin biki ngënkaanel kë teenëna biki.

⁴ A uwal wi Nayafan nan pei pëci nawiak kë pibandari wi, ndë wëla ucape-kape, wi përëmb, un dits wi ka coka.

⁵ Unk buts ind batsasa, nda welani iyeen ind tsi bërun bajëŋal. A ind bëlieng, tsi manteelar ind, nda cuman ni kawelan-iyeen ind, par Nasien-batsi ka natsara bape-iyeen bukul; a nuu wël bëtseend pa ba welan biki iyeen bukul.

⁶ Bi u ci bank, nda welani iyeen ind tsi utsia kañan pëyëlan Nasien-batsi, pa nul përiang ind tsi uwal wi;

⁷ nda welani tsi nul ngëko ngi nda tsaag ngi ba këtsaag, par nul ka tsuunkar ind unk.

⁸ Nda lesari, ndë waay. Ujabël un ci wi nabër ind ka fayësa pi ulioŋ wi ka ŋuulënts wi, a uu tsas ñaan ni u rei.

⁹ Nda tambandari pëpok Ujabël tsi uwak, ndë me ne, batsaar ni ind aci buts tsi unoor umënts wi, tsi umundu.

Kawël-mboos katuamë-ni

¹⁰ Maa Nasien-batsi nul Ajug bëtseend ban ci bi ba këci, nandui indi tsi Këristu pa përëmbul pan dits pi ka ba, nul ka natsan ind un bërierul uwal wi nda par wi tsi unoor. Në liincan ind, në liinc-liincan ind ngëwaas, në tsu ind përits lëga-lëga.

¹¹ Pëyëlan aci pa nul pa sandëndën! Ameen!

¹² Aci Silwaanu, nul natsaar ni ind na mobi tsi uwak, ni fiaari, nul tsënkin un a n picandëri ind uletar uties wi, pa pëliinc-liincan ind ngëwaas, ni pëleents ind u ci tsi bëtseend Nasien-batsi bëcär, bi nda ciina bun.

¹³ Ngëriisia ngan ci ngi di Babiloonia, ngan data ngi buts pi ind, aleen ind. A Marku abuk nji leen ind buts.

¹⁴ Nda leenëlëri tsi nda ci tsi, ni mawunkëlër bëŋal. Pëfac pa ciin ni ind bëlieng ban ci biki tsi Këristu.