1 PER 2 - KARÚK-PËRIM KAWALU Nouveau Testament

Yeesu ci-un pëlaak ubiira

¹ Wul ka wun, nda bëran kawaraatsa kan ci ki ba këci, ni bëlipal maniamëlan ban ci ba këci, ni kanguungu kan ci ki ba këci, ni mankocar, ni kajaar bañaan ngëwutsëtsuel kan ci ki ba këci.

² Pi upäts bandu bëka, nda fieran mak mtaw Uwejats Nasien-batsi mjënts. Unk nduu wiakëna tsi mul pa pëbuer,

³ uci nda ro teenaman bi Ajug wara bi.

⁴ Nda kikaan nda wokul, nul pëlaak ubiira pi bañaan-bajin bër pi, pan data pi, a pa ka bëkat tsi bërun Nasien-batsi.

⁵ Ind bërier ind, nda ci pi ilaak i tsij yi ubiira, a nda leempaa kato Uwejats Nasien-batsi pa ind pëci bëjúk bajakan bëyëman, pa puu wël ijakan Uwejats Nasien-batsi, i Nasien-batsi kë lílandër yi tsi Yeesu Këristu.

⁶ Par ko wi ci wun di Bëpican: “Nji kan tsu ink pëlaak pëtsaak di Sion, pan data pi a pa ka bëkat; na waki tsi pul, yaas a në kawa.”

⁷ Unk, pa ind ba uwak biki, aci pëlaak pan ka pi bëkat; maa pa ban wakats biki, aci plaak pi baniew bër pi, a pul ruka pun ci pëlaak pëcäk pi pëtsaak,

⁸ a pa ci buts pëlaak ujontas ni bulaak bi kan tsu bi ñaan na yër. Bu ka jontas par bu pok pëwak tsi përim, unk a ba tsuura ko umënts wun.

⁹ Maa ind, nda ci uraasa un data wi, bëjúk baro-ijakan nasien, ucaak uyëman, bañaan ban ci biki bëka Nasien-batsi, pa pëleents ngëko ngëwiak, ngi nandui ind unk di karëm, pa ufacul upikërënuel;

¹⁰ ind ban doots biki ci bañaanul tsi uwal ujon, maa inkri nda ci bañaan Nasien-batsi. Ind ban doots biki tsënkan kayëk-ipës, maa inkri nda tsënkan kayëk-ipës.

Përispitaar pësien

¹¹ Ind ba ŋala biki, mán tseend ind ibats pi nda ci batsooŋ ni bapar-këpar, pa ind përand ngëko ngi uliaf kë rí ngi, ngi kan kaman ngi uwaas.

¹² Nda ciin biki ka yandaar biki uwar tsi pëncuaf ban cits biki Bajudeu. Unk ŋal tsi ko uwutsëtsuel wi bu kë jaar ind wi, pi nda ci baro-ngëko-kawaraatsa, bu ka facana tsi undo ngëko ngëwar ngi ndë ro ngi, bu ka bëndan Nasien-batsi tsi unu wi nuu bi wi buwuula.

¹³ Tsi undo Ajug, nda welani iyeen ind tsi bërun ulua wi ñaan-najin tsu wi ba këtsu; u ru ci ank nasien, nul nan tsij-ni pëyëlan bëlieng,

¹⁴ oo uci ank ba tsijëna-pëboos, biki nasien yëli biki pa pëtucan baro-ngëko-kawaraatsa, ni pëbëndan biki kando biki ngëwar.

¹⁵ Par uŋal Nasien-batsi, aci uwal wi ndu ro wi uwar, ndë tsu bafuur ba yëŋandar tsi kameets-ko bukul.

¹⁶ A bi nda ci bi ban fac biki, ind tsë ro pëfac ind ulec pa pëkundëna kawaraatsa ind; maa nda roan bi nda ci bi baleempar Nasien-batsi.

¹⁷ Nda rëmbani bañaan bëlieng, nda ŋalan biki nda tsaar biki, nda lënkan Nasien-batsi ndë rispiitaar nasien.

Ngë ka pëfets iyots Këristu

¹⁸ Ind baluek, nda welani iyeen ind tsi puu lënk mak bawiak ind; cits pa bawara-ngëwaas rin ni ban bula biki, maa pa bajuats-ngëwaas buts.

¹⁹ Par aci bëtseend, uwal wi ñaan kë miira wi ngënoor, undo atsu uwejatsul tsi Nasien-batsi, a nuu noorana te kaats ko wi na ro wi.

²⁰ Poom përëmb pi ndu ka pun tsi unoor wi ndu miira wi tsi kabupa, uci nda ro ujuban? Maa uci nduu ro uwar, a nduu noorana a nda tambandër, aci bëtseend tsi bërun Nasien-batsi.

²¹ Undo ko umënts wun, wi nda ruree wun; par Këristu buts anoor tsi u undo ind, na rukar ind uteenëni pa ind pëfets iyotsul.

²² Nul nandootsi ujuban, nin kalon kafäl cits di mtumul.

²³ Nul nan karee, a lukanats; na nooranee, a leentsarats ñaan; maa na wëtar beenul nawat pëleents namabal.

²⁴ Nul na yuuntsi ngëjuban nja tsi uliaful bërierul di ruets pëmul, pa n ja pëcäts pa ngëjuban, nja ka kak koo yafënts tsi bëmabal. A mlupiul mi nda yësanaana mun.

²⁵ Par nda ro ci ba niam biki pi ngënkaanel; maa inkri, nda awitsësaree Nayafan ind ni Nawaay ngëwaas ind.