1 KORINTU 6 - KARÚK-PËRIM KAWALU Nouveau Testament

Pëkeesaar ni nda tsaari tsi uwak

¹ Uci nalon tsi ind tsijar ni acintsul, um bi nu yeents bun pëtsëpandul di bërun bawat-pëleents ba meets biki Nasien-batsi, te tsëpandatsul di bayëman?

² Ane nda meets u ci bayëman ka wat bukun umundu pëleents? A uci u ci ind ka wat bukun umundu pëleents, nda tsënkaants pëjaa nda wat ngëko ngëties ngi pëleents-a?

³ Nda meets u cnja ka bukun pëwat ngëwaanju pëleents-a? Andes ngëko ubiira wi!

⁴ A uci nda tsijar tsi uleka ngëko ubiira wi, nduu yaar bañaan ban tsuaatsa biki ko di Ngëriisia bee ba wat ind pëleents-a?

⁵ Ma n ja ank, pa pëkawaran ind. Ane nda kaats nin ñaan tsi pëncuaf ind nan ci nameko, nan yëlani puu wat pëleents tsi pëncuaf ban tsaar biki ni nul-a?

⁶ Maa, ñaan ka tsëpand ni ba tsaari tsëko kawat-pëleents, di bërun bawakats!

⁷ Bi nda tsijar bank tsi nda ci tsi, apiban koon nda yër ba këyër. We ka wun a nda ri ka miira, uci nda guusa? We ka wun a nda ri ka miira pëcaanaa ngëko?

⁸ Maa ind bërier ind, nda ja nda roon nduu ro ngëko kamabats, a nduu caana batsaar ind ngëko.

⁹ Ane nda meets bamabats di ka rukanda pësien Nasien-batsi-a? Ind tsë fal iyeen ind, par nin baro ngëko katúk-ufuts, nin bajintëla-icap, nin baro-mjubi, nin baro-këkaats, nin bapiintsand upäts uyënts,

¹⁰ nin bakiej, nin baŋal-uncaam, nin bakuj, nin baja ko u waraatsa wi tsi uleka ñaan, di ka rukanda pësien Nasien-batsi.

¹¹ Balon tsi ind unk ri ba ro run ci. Maa ind nda ñawaa a nda ci ba yëmana biki, a nda ci ban tsua biki bamabal tsi katim Yeesu Këristu Ajug, ni tsi Uwejats Nasien-batsi nja.

Ngëliaf nja aci incimëntsu Këristu

¹² Man niirana përo ngëko bëlieng, maa cits ngëko bëlieng wara ngun përola. Man niirana përo ngëko bëlieng, maa in di ka n wët nin uloole tsi ngul u yëlanin.

¹³ Bariala aci pa pëpës, a pëpës ci pa bariala. Maa Nasien-batsi kee ba ni ngan bëlieng. Uliaf cits pa ngëko katúk-ufuts, maa aci pa Ajug, a Ajug ci pa uliaf.

¹⁴ Nasien-batsi na natsani unk Ajug di pëcäts, kee natsani nja un di pëcäts buts tsi pëyëlanul.

¹⁵ Nda meets ngëliaf ind ci incimëntsu Këristu-a? Ane man jej incimëntsu Këristu, ka ro yul incimëntsu natúk-ufuts-a? Yaas a ka ro ko wan.

¹⁶ Oo nda meets uci ñaan bofëlar ni natúk-ufuts, në ci uliaf uloole ni nul-a? Par ajaka: “Bukul batëb bu ka ci uyamats uloole.”

¹⁷ Maa ñaan nan bofi tsi Ajug, aci uwejats uloole ni nul.

¹⁸ Nda túkan nda lawan ngëko katúk-ufuts. Ujuban un ci wi-ba këci, wi ñaan do wi, aci di utsand uliaf. Maa ñaan nan ci tsi ngëko katúk-ufuts, ajubandar uliaful bërier wul.

¹⁹ Ane nda meets uliaf ind ci kato-kayëman Uwejats-ujënts un ci wi di ind-a? Wi nda yank wi tsi Nasien-batsi, a cits wiic ind bërier ind.

²⁰ Par, nda weelara përes pëñatsal. Inkri, kara ñaan tsi uliaful na rëmbani Nasien-batsi, [ni tsi uwejatsul, ngul ngan ci ngi ngi Nasien-batsi.]