1 KORINTU 16 - KARÚK-PËRIM KAWALU Nouveau Testament

Bëtsënk pa bafets Yeesu ban ci biki baranj, di Judeeya

¹ Tsi uleka kabofëlan bëtsënk pa bayëman, nda roon buts bi n tsu bi bañaan iriisia Galaasia përo.

² Kara unu ucak kanëm, kara ñaan tsi ind na pënani ko, tsi ko wi na ka wi di katoul, na patsan, në tsëpand kee bofëlan; pa ubi nji, katse ka fiera pëbofëlan bëtseend.

³ A uwal wi n baandi wi, kee wëtan ban data biki ni uletar, pa ba tsëpand bëtsënk ind pa Jerusalem.

⁴ A uci u wina buts n ka pëtsëp, bu ka tsëp ni nji.

Utsaag Pol

⁵ Mán par-na Masedoonia ka bi pëwin ind, par man ka par-na bi Masedoonia.

⁶ Uci u bi yëla bëro ka jon ni ind, oo ka paran uwal ujoonts ni ind, pa ndë ñuatsanin tsi bëyaas bi n ka bi pëya.

⁷ Par inkri, nji n ŋalats rin pëwin ind upar nji, maa ma ŋal përuka ni ind te ulon uwal, uci Ajug niiran.

⁸ Maa mánduka di Efeesu te uwal Pentëkost;

⁹ par pëlëman pëwiak, pëwar, awaantsarain pa uleemp, maa a u ka babër bacumal.

¹⁰ Uci Timoteu bi, nda roon bëwaar, pa nul përits ci ni mkaw tsi pëncuaf ind, par uleemp Ajug wi na ciina wun pi nji buts.

¹¹ Ñaan tsë beul. Maa nda ñuatsaniul tsi pëfac pa na bi tsi nji, par man ci tsi pëlipul, nji ni batsaar ni inja.

¹² Uleka natsaar ninja Apolos, ma ñakanaanul mak pa na bi pëwin ind, në ci ni batsaar ni nja maa ko wan netse niajul uwaas inkri; maa uwal wi na jala wi, në bi.

Kawël-mboos katuamë-ni

¹³ Nda waayan, nda moban tsi uwak nda liincan, nda ciin bayënts, nda kaan uyëlan.

¹⁴ Ngëko ngi nduu ro ngi bëlieng, nga rolaan ni bëŋal.

¹⁵ Inkri, mán ñaan ind batsaar ni nji, nda me ne, bañaan kato Estefanas ci bukun bacak ba niiran biki Yeesu di Akaaya, a ba wël ngëbiira bukul pa uleemp bayëman.

¹⁶ Nda baari ibats ind tsi pëcikëndën bukul, ni nan bofi ba këbof tsi uleemp, a nuu cib tsi wul.

¹⁷ Man lílan bi Estefanas bi bink, ni Fortunaatu, ni Akaiku; par bukul bu niaj tsi pëlas ind pando pi ruka,

¹⁸ par, bu tsëkanin uwejats, ni ngëwejats ind. Bañaan pi bamënts biki nda moban bukul uwar.

¹⁹ Iriisia Aasia aleeni ind; Akiilas ni Priskila, bë leeni ind mak tsi Ajug, ni Ngëriisia ngan ci ngi di kato bukul.

²⁰ Batsaar ni nja bëlieng bëleeni ind. Nda leenëlëri ni mawunkëlër myëman.

²¹ Kawël-mboos ki, aci nji Pol, pican un kul ni kañan nji bërierin.

²² Uci ñaan ŋalats Ajug, na ciin tsi ujuatsal. Maranata!

²³ Bëtseend Yeesu Ajug, ba ciin ni ind.

²⁴ Bëŋal nji, ba ciin ni ind bëlieng tsi Këristu Yeesu.