1 KORINTU 14 - KARÚK-PËRIM KAWALU Nouveau Testament

Uleka ngëtseend Uwejats kak

¹ Nda fetsan bëŋal, ndë liincandar tsi pëtsas ngëtseend Uwejats, maa pëpeena utseend pëleents nga meaatsa ngi.

² Par ni ka ñakani mleents ngëtsooŋ, ñakanaanats bañaan, maa añakanaan Nasien-batsi, par ñaan di ka me ko wi nuu ja wi, a tsi uwejats nuu ñakan ngandoots ngi meaa.

³ Maa ni ka leentsi u meaatsa wi, ka ñakanaan bañaan, nuu liinc-liincan bukul, nuu tseend bukul ibats, nuu liincan bukul ngëwaas.

⁴ Ni ka ñakani mleents ngëtsooŋ, beenul bërierul bi nu liincan bun, maa ni ka leentsi u meaatsa wi, ka liinc-liincan Ngëriisia.

⁵ Nji man do ŋal ind bëlieng puu ñakan mleents ngëtsooŋ, maa man pe pëŋal ind puu leentsi nga meaatsa ngi; par ni ka leentsi u meaatsa wi, ape ni ka ñakani mleents ngëtsooŋ, uroko uci nuu pac irim i nuu ñakan yi, pa pëliinc-liincan Ngëriisia.

⁶ Maa inkri, batsaar ni nji, uci n bi di ind a ndu n ñakan mleents ngëtsooŋ, buom bëkat bi n du n kaar ind bun, uci ñakanaanats ind tsi upiban, oo tsi ume, oo tsi pëleents u meaatsa wi, oo tsi bëjukan?

⁷ Unk buts di iŋi pëlas ci run, un ci wi pëncand oo bëncuundu u las yul. Uci uleentsar yul patsëlarats, um bi ñaan kë yëkëran bun përim pan lasa pi di pëncand oo bëncuundu?

⁸ A uci uleentsar uluur jëntsats, yën ka yecis un pa ukam-i?

⁹ Unk ind buts, uci nda ñakanats irim in teaa yi tsi pëleents ind, um bi ñaan kë me bun ko wi nda ja wi? Par ka ci pi nda ñakan tsi ufuts.

¹⁰ Tsi ucär aka ngëkoraar irim tsi umundu, maa kaats pan kaats pi ko wi pa pac wi.

¹¹ Uci n meets ko wi përim pac wi, ka ci natsooŋ pa ñaan ni ka ñakan unk; nul, në ci natsooŋ pa nji.

¹² Unk ind buts, bi nda ŋal bink ngëtseend Uwejats, nda tsasan puu watsës ngul, pa pëliinc-liincanaan Ngëriisia.

¹³ Wul ka wun, ni ka ñakani mleents ngëtsooŋ, aka pëñaan, pa në ka utseend pëpac irim i nu ñakan yi.

¹⁴ Uci n du n ñaan tsi ulon uliingu, uwejats nji koo ñaan, maa ume nji di ka bëkan.

¹⁵ Wee ndu ndo wun inkri? Mán ñaan tsi uwejats, maa mán ñaan buts tsi ume; mán ya tsi uwejats, maa mán ya buts tsi ume.

¹⁶ Par uci m baran Nasien-batsi tsi uwejats, um di nakaats-ume kë ja run Ameen tsi ko wi m baran wi, ba meets ko wi m ja wi?

¹⁷ Tsi ucär, m baran uwar, maa liinc-liincanats acintsu.

¹⁸ Mán baran Nasien-batsi, par man pe ind bëlieng pëñakan mleents ngëtsooŋ.

¹⁹ Maa tsi bëjúk Ngëriisia, man pe pëŋal pëja n doon ka ñakan kërim kañan ni ume nji, pa pëjukan buts balon, ni pëjaa man ñakan kërim ngëmiil untaaja (10.000) tsi uliingu utsooŋ.

²⁰ Batsaar ni nji, ind tsë ci upäts tsi uwejats; nda ciin upäts tsi u waraatsa wi, maa tsi uwejats, nda ciin bajëŋal.

²¹ Iink picana run tsi ulua: Ajug aja: “Mán ñakanaan bañaan biki, tsi mtum bañaan biki ka ñakan biki ngëlon mleents, ni tsi mtum batsooŋ, maa ŋal bi u ci bank, bu ri ka cikëndënin.”

²² Unk, mleents ngëtsooŋ cits upibanaani pa ba uwak biki, maa aci upibanaani pa ba uwakats biki. Maa pëleents u meaatsa wi, cits upibanaani pa ba uwakats biki, maa aci upibanaani pa ba uwak biki.

²³ Par uci bañaan Ngëriisia júk bëlieng tsëloole, a bu kë ñakan bëlieng tsi mleents ngëtsooŋ, a bakaats-ume oo ba uwakats biki niaji, bu ri ka ja ne nda fuur a?

²⁴ Maa uci ba ci bëlieng tsi pëleents nga meaatsa ngi, a nalon na wakatsi oo nakaats-ume niaji, irim imënts yun bëlieng ka tsuul yun pëniiran; ka watul yun pëleents.

²⁵ Ngan beka ngi di uwaasul ka bekësee, unk në yër ka lëma tsi utsia, në jintëla Nasien-batsi, në ja: “Tsi ucär Nasien-batsi aci tsi pëncuaf ind.”

Bi u ka bi puu rolaa tsi Ngëriisia

²⁶ Bi u ci bank batsaar ni nji, we ka rolaa wun? Uwal wi nda júk wi tsëloole, nalon ka ka kaya, nacints ka ka ko wi nu jukan wi, nalon ka ka upiban, nacints ka ka mleents ngëtsooŋ, nalon kak ka ka puu pac irim. Ko wan bëlieng u rolaan pa pënatsan Ngëriisia.

²⁷ A uci ñaan kë ñakan uliingu utsooŋ, bukul tsë pe bañaan batëb, oo uci bu kë cum ba ciin bawaants, bu kë ro unk kara bëyaas; unk u ka ni koon paci irim i bu kë ñakan yi.

²⁸ Maa uci ñaan ni kan paci irim cits, na yëŋandari di Ngëriisia nuu ñakandar beenul bërierul ni Nasien-batsi.

²⁹ Tsi uleka bayëlia, batëb oo bawaants koo ñakan, bacints kë wejatsar ko wi ba ci wi tsi pëja.

³⁰ Maa uci nan tsoar unk pibana ulon ko, nacäk nun ka yëŋandar.

³¹ Par ind bëlieng nda yëlan pëleents nga meaatsa ngi, naloole naloole, pa bañaan bëlieng pëjuk, bu ka liincana ngëwaas.

³² Ngëwejats bayëlia, ka cikëndën ngi bayëlia tsu ngi;

³³ par Nasien-batsi cits na gúsëlan ngëko, maa aci Nasien-batsi pëfac. Bi u rolaa bi di iriisia bayëman bëlieng,

³⁴ bakaats ba yëŋandari di Ngëriisia, par bu niiranaatsa puu ñakan. Maa ba welani iyeen bukul, bi ulua tsu bi.

³⁵ Maa uci ba ŋal pëme ulon ko, ba yepar bayën bukul di kato; par aci mkaw mwiak, ŋaats puu ñakan di Ngëriisia.

³⁶ Ane përim Nasien-batsi apënë-ni tsi pëncuaf ind, oo pul abi pa ind rin-a?

³⁷ Uci ñaan tsu beenul pëja aci nayëlia oo ñaan Uwejats, në niiran ko wi n picandar ind wink ci utsua Ajug.

³⁸ Maa uci ñaan tsuuts wul ko, nul tsë tsuaa ko.

³⁹ Bi u ci bank batsaar ni nji, nda tambandari tsi pëtsas utseend pëleents u meaatsa wi, te ind tsë laaŋ mleents ngëtsooŋ pëñakana.

⁴⁰ Maa ngëko ka përolaa bëlieng uwar, bi u ka bi përolaa.