1 KORINTU 1 - KARÚK-PËRIM KAWALU Nouveau Testament

Kawël-mboos kajuudë-ni

¹ Pol, nan duee tsi uŋal Nasien-batsi, pa pëci Napostolu Këristu Yeesu, ni nan tsaari ni nja Sostenes,

² pa Ngëriisia Nasien-batsi ngan ci ngi di Korintu, ban jëtsanana biki tsi Këristu Yeesu, ban duura biki pëci, ni ba nja biki ba roon tsi ngëleka bëlieng, bu kë ru bëlieng katim Yeesu Këristu, Ajug nja; aci Ajug bukul a na ciind níic nja.

³ Bëtseend ba ciin ni ind, ni pëfac Nasien-batsi Asin nja ni pi Yeesu Këristu, Ajug.

⁴ Ma n ja n doon koo baran Nasien-batsi sandëndën tsi uleka ind, undo bëtseendul bi na wël ind bi tsi Këristu Yeesu.

⁵ Par tsi nul, a ngë rëmbana tsi ngëko bëlieng; tsi irim in ci ba këci, ni tsi ume un ci wi-ba këci.

⁶ Unk di bëci Këristu pibana run di ind,

⁷ pa ind përits ranj nin ulon utseend Nasien-batsi, ndë ci tsi pëlip upibandari Yeesu Këristu, Ajug nja.

⁸ Nul ka liinc-liincan ind un te di utuami, pa ind pëci ban dits biki ka leentsara tsi Unu Yeesu Këristu, Ajug nja.

⁹ Nasien-batsi, aci na mobi tsi përim, nul nan duuri indi manteelar ni Abukul Yeesu Këristu, Ajug nja.

Mankicësar tsi Ngëriisia

¹⁰ Man ñaan ind batsaar ni nji, tsi katim Yeesu Këristu Ajug nja pa ind bëlieng puu baar tsi përim pëloole, pa mankicësar përits ci tsi ind; maa nda baari pëci baloole, tsi uwejats uloole, ni tsi utsaag uloole.

¹¹ Batsaar ni nji! Bañaan kato Këloe aleentsin mankicësar ci tsi pëncuaf ind.

¹² Ko wi n ŋal wi pëja, aja nandooni nuu ja tsi nda ci tsi: “Nji man ci ni Pol” ni kë ja: “Nji man ci ni Apolos” nun kë ja: “Nji man ci ni Seefas” nacints kë ja: “Nji man ci ni Këristu.”

¹³ Ane Këristu akicësar-a? Oo nul Pol rieŋa un di kruus tsi undo ind-a? Ane nda mijanaana tsi katim Pol-a?

¹⁴ Mán baran Nasien-batsi, par nji n mijanats nin naloole tsi ind, ucits ba Kërispu ni Gaayu;

¹⁵ unk ñaan di ka yëlan pëja, amijanaana tsi katim nji.

¹⁶ Aa yoo! Man mijan buts bañaan kato Estefanas, maa nji lesats mijan nalon ñaan kak.

¹⁷ Par, Këristu yëlatsiin pii ru mijan, maa puu leents Upetsan-uwar; te cits tsi përim kameko, pa përits tsu kruus Këristu ka rits ci ko.

Këristu ci-un pëyëlan ni kameko Nasien-batsi

¹⁸ Tsi ucär, përim kruus aci bëfuur pa biki ka niam biki, maa pa n ja ban buer biki, aci pëyëlan Nasien-batsi.

¹⁹ Par iink picana run: “Mán niaman kameko bameko, ka ba ni bëlipal balipal.”

²⁰ Nameko aci tsum-i? Najukan-ulua aci tsum-i? Natsas ngëme umundu wi aci tsum-i? Nasien-batsi tsuuts ink kameko umundu wi ka ci bëfuur-a?

²¹ Par, Nasien-batsi tsi kamekoul, tsuuts umundu u meul tsi kamekoul bërierul; maa ba uwak biki, abueranaan bukul bëfuur kaleents-përim.

²² Par, Bajudeu aci tsi pëyep upibanaani, a Bagërek kë tsas kameko.

²³ Maa wund ka leents uleka Këristu nan dieŋa unk di kruus, a u ci ko wi kan tsu wi Bajudeu ba yër, a u ci bëfuur pa ban cits biki Bajudeu.

²⁴ Maa pa bandua biki, Bajudeu ni Bagërek, wund ka leents bukul Këristu, nul pëyëlan Nasien-batsi ni kameko Nasien-batsi.

²⁵ Par bëfuur Nasien-batsi ape kameko bañaan-bajin, a bërafal Nasien-batsi pepëyëlan bañaan-bajin.

Karua bañaan Nasien-Batsi

²⁶ Batsaar ni nji, nda teenan-e bi nda ruee bi ja: bacumal cits bameko tsi buwinar bañaan-bajin, a bacumal kaats pëyëlan, nin bacumal bëkaatsa pëbuka pëwar.

²⁷ Maa, Nasien-batsi arat ngëko bëfuur, ngi umundu, pa pëkawaran bameko, a na rat ngëko umundu, ngërafal, pa pëkawaran ngan ka ngi pëyëlan uforsa.

²⁸ Nasien-batsi arat ngëko umundu, ngan kaats ngi bëkat, ngan tsuaatsa ngi ko, ngan cits ngi, pa pëgarëna ngan ci ngi,

²⁹ pa nin ñaan përits píc tsi bërun Nasien-batsi.

³⁰ Maa ind nda ci bayiicul tsi Këristu Yeesu, nul nan dukee ciir nja ka meko kan pënë-ni ki tsi Nasien-batsi, ni bëmabal, ni uyëman, ni kaluk-pëbuer.

³¹ Unk, u ci bi u picana bi aja: “Ñaan ni kan píci, na pícëni tsi Ajug.”