1 JOŊ 5 - KARÚK-PËRIM KAWALU Nouveau Testament

Uwak tsi Abuk Nasien-batsi

¹ Ñaan na waki ba këwak u ci Yeesu ci-un Këristu, abukëna tsi Nasien-batsi. A ñaan na ŋali Asin, aŋal buts Abukul.

² Tsi ko wi, tsi ngë meena tsun ngë ŋal upäts Nasien-batsi: uwal wi ngë ŋal wi Nasien-batsi, a ngë mob tsi ngëtsuaul.

³ Par bëmënts bi ci bun bëŋal Nasien-batsi: pa n ja pëmob tsi ngëtsuaul; a ngëtsuaul ritsats,

⁴ par nan bukee ba këbuka tsi Nasien-batsi, ape umundu. A kape kan peki umundu, aci uwak inja.

⁵ Yën kuk un umundu, ucits ba na waki u ci Yeesu ci-un Abuk Nasien-batsi?

Ko wi Yeesu Këristu ci wi

⁶ Ni ci-un nan biindi unk mlik, ni pëñaak, nul Yeesu Këristu. Nul biindatsi mlik rin, maa mlik ni pëñaak. Uwejats leents wun ko umënts wi, par Uwejats aci ucär.

⁷ Par aka bawaants ba leents biki ko wi [di batsi: Asin, Përim, ni Uwejats ujënts. A bawaants bamënts biki ci baloole.

⁸ A ngëwaants leents ngun ko wi tsi utsia:] Uwejats, mlik, ni pëñaak; a ngëwaants ngëmënts ngi baaraan pëloole.

⁹ Uci ngë niiran ko wi bañaan leents wi, ko wi Nasien-batsi leents wi ape pëci uwiak. A ko wi Nasien-batsi leents wi ci wun wi: añakan uleka Abukul.

¹⁰ Ñaan na waki tsi Abuk Nasien-batsi, aka ko wi nu leents wi tsi nul. Ñaan na wakatsi tsi Nasien-batsi, në tsuul pëci natsup, par wakats tsi ko wi Nasien-batsi leents wi tsi uleka Abukul.

¹¹ A ko wi na leents wi ci wun wi: Nasien-batsi awël nja ubiira un dits wi ka ba; a ubiira umënts wi ciina tsi Abukul.

¹² Ñaan nan kai Abuk, aka ubiira. Ñaan nan kaatsi Abuk Nasien-batsi, kaats ubiira.

¹³ Man picari ind ngëko ngi, ind ba uwak biki tsi katim Abuk Nasien-batsi, pa ind pëme nda ka ubiira un dits wi ka ba.

Uyëlan bëñaan

¹⁴ Uwatsar wi ngë ka wi tsi nul ci wun wi: uci ngë yep ko tsi uŋalul, nul në te inja.

¹⁵ A uci ngë me na ja na roon nu ten ja tsi ko wi ngë yep wi ba këyep, nja ka me ngë yank ko wi ngë yepul wi.

¹⁶ Uci ñaan win ni ba tsaari ro ujuban un cits wi pa pëcäts, na ñaandëriul, Nasien-batsi ka wëlul ubiira. Ko wi aci pa ban jubandarats biki pëcäts. Aka ujuban pa pëcäts, nji njaats ind nda ñaandar umënts wun.

¹⁷ Kamabats kan ci ki-ba këci, aci ujuban; a u ka ujuban un dits wi ka tsu ñaan na cäts.

Nja ngë ci biki Nasien-batsi

¹⁸ Ngë me ne, ñaan nan bukee ba këbuka tsi Nasien-batsi di ka ci tsi ujuban, maa Abuk Nasien-batsi ka waayul, a Naro-ngëko-kawaraatsa di ka këraraul.

¹⁹ Ngë me ngë ci biki Nasien-batsi, a umundu upëban ci tsi kañan Naro-ngëko-kawaraatsa.

²⁰ A ngë me Abuk Nasien-batsi bi, a na wël nja ume, pa n ja pëyëkëran Nacar nun. Nja ngë ci tsi Nacar nun, un ci wi, tsi Abukul, Yeesu Këristu. Namëntsi ci-un Nasien-batsi Nacar, ni ubiira un dits wi ka ba.

²¹ Upats uties, nda randan icap.