TAITƆSI 1 - Yataa 'a Dɔbɛnɛ Nama

^1-4 N fan Pɔɔ, n fan mbe ka gboo chɛ nyɛn‑da i tena, i wan Taitɔsi. N 'na denɛ mu gbɛ i a, danaya dɔndɔɛ ɔ Chisɔsi ko a. Yataa 'a wai chɛ mɔɛ mu n na, ni Chisɔsi Chasi 'a sɔ mɔɛ to. A‑a n sɔ, min mbe a ma, Yataa‑a a boo sɔ ka mɔɛ miin ma dan koe a a a, n ni a ma, an ni a 'a tea sakana bai a min. Mbɛ n‑na an sɔ chia chɛndɛ ma, ma koe a Yataa fɔɛ ɔ. Mbɛ an yii na tɛenɛ ɛ ma‑a kuɔ fɔ fɔɛ ma, Yataa min mbe ee fania fɔ, a‑a tooɔdia chɛ min na, a e na to dunya a dan‑da. Mmɔ baun mɔɛ Yataa‑a sakana bai chɛ ɔ yian fan, tima chɛndɛ ma, mbɛ a‑a n sɔ a ɔ yian koe a mɔɛ n na. Mmɔ Fa Yataa, an fea Chisɔsi Chasi a, mmɔ baun mɔɛ, an ni i dua, an ni faachima be i ma.

Pɔɔ ɛ Taitɔsi 'a wai yian‑da a a, ɛ min chɛ

⁵ Chɛ an‑na a ma, n‑na i to Keti yii tinɛ ɔ duu n dɔ, min mbe a ma, i ni koe n dɔ bɛn. A yɛ to, i ni chɔchi gbakoo n yian duu kan kɔ kan dɔ, yɔ n‑na a fɔ buɛ min dɔ i ye.

⁶ A sin ma bɔ ee ma a ma, musu dɔndɔ gbe an mbe ma a boo ɔ. A 'a denɛ n kai faenɛ ɛ Chisɔsi a. An mbe a kuiɛ ma, an mbe ee wooya koɛ yan.

⁷ Chɔchi ya ɔ sɔɛ sin, min mbe Yataa 'a wai kun ma, mabɔ ee ma a ma, dɔpanda tɔ ma a a, a faa ma gbandi, a sin mbe ee gbɛ wa min. Kɔpɔɛ wakoe ee koa a faa ɔ, a sin mbe ee ma gbun na bea mɔ a.

⁸ Chɛɛ mɔɛ min ya kɔɔɛ di sonda n tena, ko chɛndɛ ko a di min ye. Mɔɛ min mbe yiinatɛ bɔ a tachɛ buɛ a, a tanden mu, baa ɛ a boo ɔ Yataa ko a, a sin kosan a wandi bia‑a.

⁹ Ɛ ma mɔɛ an na, min danden mu tea sakana bai chɛ a, an‑na a kan min na. Chɛ an mbe a ma, a ni che kan chɛndɛ chɛ a, a ni chɛ n na ten, miin mbe kɔɔsa bia chɛ tena.

¹⁰ Koe min na mu, mɔɛ n mbe nɔ kaka, miin mbe an kaa sa tena kan chɛndɛ chɛ a, fia faenɛ an da ɔ ben‑da an bɔɛ n bun koe a. A bɛbɛɛ gbu chɛ nu, miin ni a fɔ, an dɔ, mɔ ee bauncha ma sɔn, ni i a ma kamincha ni.

¹¹ An da a ni tɔn, koe min na mu, an mbe chenɛ n dɔ chɛ chɛ tena wan, an mbe an ka‑a tea chia ma, an 'na kan yama chɛ chɛ a. Chɛ gbɛɛ sin kaen mu mau bandaya kɔpɔ yan chɛ an ma.

¹² An bɔɛ dɔndɔ gbu, an fandi gbu ta ko sɔn mɔɛ, a‑a a fɔ wan, mbɛ Keti mɔɛ n mu tima ɔ tima fania fɔ mɔ wa an fan na, an gboo ɔ faen mu, an sin bɛnchɛ. A yɛ to, koe a fasan mɔ wa mu an na, kan baiya tɔ wa nu.

¹³ A‑a tea bai an fɔ ka. Chɛ an fɛ mu, an tɛn dɔ tɛ chɛndɛ chɛ, min mbe a ma, an na ni ten Chisian danaya ɔ.

¹⁴ Mbɛ an sɛmbɛ‑a an too ma sɔ koe a Chu n 'na tai chɛ n ma, ni bai chɛ n ma, mɔɛ miin‑na an kan kɔ sɔ tea a, an mbe min fɔ‑a a ma koe a.

¹⁵ Mɔ ɔ mɔ tena min yiima a koen mu, fen kɔ fen nyin fan. Chɛɛ mɔɛ min yiima a ma ko ni, danaya ee mɔɛ min dɔ Chisɔsi ko a, fen kɔ fen ma nyin. Koe min na mu, a yiima ɔ chɛen fan mu, a basan a 'a yiinachii a.

¹⁶ An‑na Yataa sɔnɛ ɛ an da ɔ wan, chɛɛ a ee an sɔnɛ ɔ. An ma nyin, an mbe ee Yataa 'a sawa ya, an sin ma nyin fen kɔ fen ko a.