KO Ɔ NUNDENƐ 4 - Yataa 'a Dɔbɛnɛ Nama

Chɔn‑na Yataa yen si ɔ a 'a mansa sea a banda bu ɔ

¹ Chɛ gbakɔ, mbɛ n‑na ko dɔ mende ɔ yen to. A yen ko, n‑na n ya a ta, n‑na chenɛ da a kaenɛ yen sɔ ɔ n ya kɔɔ banda bu ɔ. Mbɛ n‑na mɔɛ chɛ min kuiɛ a min a saa a, min na‑a koɔ n tena yɔ buu, n‑na a kuiɛ a min to. A ɔ, “Sɛ nɛ chɛ, min mbe a ma, n ni a ɔ yian i a, koe miin mbe na tena ma‑a.”

² Mbɛ a ya kɔɔɛ a, a yen ko, Yataa Nyina bea‑a n fɛ gban. N‑na a yen, mbɛ nɔ banda bu ɔ, mansaya sea ɛ wan nɔ si ɔ, mɔɛ ɛ si ɔ a a.

³ Mɔɛ chɛ sin, min ni nɔ si ɔ, a ni man tena wan taun, yɔ dɛmunɛ, ni sen baa gbɛama a dɔ mende, min tɔ ni kanidian. Ninkinankantuu min ni man tena yɔ senɛ chɛ, puu mɔɛ n mbe min chee, an dɔ, ɛmɛyadi, an tindanden ni an mansa sea chɛ a.

⁴ Mansa sea bi fea kun ma naanin dɔ mende ni wan nɔ, an mansa sea dɔndɔɛ chɛ a tindanɛ. Gbakoo bi fea kun ma naaninɛ n ni wan si ɔ an mansa sea chɛ n na. An ma bɛnden ni koa gbɛ an dɔ, sanu mansa banfua sienɛ an kun na.

⁵ Mbɛ mansa sea dɔndɔɛ chɛ tena banda bu ɔ, banda man mia mia bɔ‑a nɔ, banda wɛɛ, ɛ ta‑a koɔ‑a gbau gbau, sɔnkɔ sɔnkɔ chɛ kuiɛ ɛ ta‑a bɔ‑a. N‑na dambo wɔnfea wɛɛ yen fan, an mbe man‑da nɔ mansa sea chɛ ya kɔɔ. Chɛ n ni Yataa 'a nyina wɔnfea chɛ n fan na.

⁶ A yɛ to, mansa sea chɛ ya kɔɔ to, yii wa wɛɛ ɔ fuinden fan ni, a maenɛ ɛ yɔ mɛmɛ. Mansa sea chɛ a tindanɛ, a tɔnfɛ gbɛɛ, fɔɛ fen naaninɛ n ni wan nɔ. Fɔɛ fen chɛ n ya n ni wan bɔn dɔ an ya ɔ chia a, an mbe bɔn dɔ an gbaa chia a.

⁷ Fɔɛ fenɛ saa ni wan yɔ yaa. A fean bɔɛ ni wan yɔ ninchi kai. A sawan bɔɛ chɛ, mɔ gbu ya kɔɔɛ an ni a ma. A naanin bɔɛ chɛ sin, a ni wan yɔ kochɛ, min mbe ben banda a.

⁸ Fɔɛ fen naanin chɛ n gbɛɛ, an kambanɛ ni wɔdɔ wɔdɔ. An sin, an ya ni wan bɔn dɔ an gboo gbɛɛ ma, a basan an kambanɛ n kɔɔ a. A sin to, su ɔ tee a, an mbe ee sɛmbɛ a fɔ koe a, an dɔ, “A kan nyɔ ee, a kan nyɔ ee, Yataa Mansa kan nyɔ ee. A 'a gbasaya danka ee. A ni wan nɔ suun, ɛ wan nɔ sanche, ɛ ma‑a wan nɔ kuɔ fɔ ko a.”

⁹ Fɔɛ fen naanin chɛ nu, an gboo ɔ ma fa ni tando be koe a, a basan basɔmaya a, ni wai bɔɛ. An‑na mansa chɛ an fai ka, min mbe si ɔ a 'a mansaya sea, min mbe ee fa‑a kuɔ fɔ ko a.

¹⁰ An mbe ma chɛ a, mbɛ gbakoo bi fea kun ma naanin chɛ nu, an‑na an kumbai gbangban a chen kɔɔ, a wɛn mbe si ɔ mansaya ɔ. Mbɛ an‑na a fai, a wɛn mbe ee fa kuɔ fɔ ko a. An 'na mansa banfua nu, an‑na an ya, mbɛ an‑na banfua chɛ n sa a chen kɔɔ, kooya ɔ. Mbɛ an dɔ,

¹¹ “Nn 'na mansa, nn 'na Yataa, tando bɛnden mu i wan ma, basɔmaya bɛnden mu i ma, a basan gbasaya a. I wan‑na fen fen nyan, i 'a yiinachii, an‑na a ma, an gbɛɛ nyan‑da.”