MAKI 2 - Yataa 'a Dɔbɛnɛ Nama

Chisɔsi‑a mɔ kaima baun, min namaaenɛ ni

¹ Tee kuunden gbakɔ, Chisɔsi yɛ‑a to Kapanaun duu ɔ. Mbɛ sakana kuiɛ a fasan‑da a ɔ gbɛɛ ɛ, mbɛ ɛ chenɛ a.

² Mbɛ mɔ sɛsɛ n na sɔn‑da wan a ma, kaina nii to chenɛ bu ɔ, a basan pɛsa wɛɛ a, mɔɛ n ko a. A sin, a ni wan sakana bai chɛndɛ chɛ ɔ yian‑da an na.

³ Mbɛ mɔ kaima naaninɛ nu, an bɔ‑a a a, an mbe na‑a kaminɛ a Chisɔsi tena, a namaaenɛ ɛ.

⁴ Chɛɛ chɛ gbɛɛ ɔ, an nii che na‑a kamin chɛ a Chisɔsi tena. Koe min na mu, mɔ fanka da a ni koo. Mbɛ an sɛ‑a chenɛ gbu kun ma, mbɛ an‑na kaina ɛnden ma ka, Chisɔsi kun ma chia a. An ban‑da kɛn chen chɛ ma ka‑a, an kaina chɛ, mbɛ an‑na kamin chɛ a yii nɔ, sa ɔ yaa ɔ, an na‑a a a min dɔ.

⁵ Chisɔsi‑a a ɔ yen kɛn, danaya wa min ni mɔɛ chɛ n dɔ, a ko a, mbɛ a koɔ‑a namaa chɛ tena. A ɔ, “N 'na den, n‑na n boo bɔ i 'a ko yama n dɔ.”

⁶ Mbɛ Chu n 'na sawa kan mɔɛ chɛ dɔ nu, miin ni nɔ si ɔ, an bun‑da an yii na chii‑a, bai chɛ ma.

⁷ An dɔ, “Fen ko a mu, mɔ bonda chɛ ɛ bai chɛ sima fɔ‑a? Ɛ ka baa an bɔ tena Yataa ma. Yataa dɔndɔ gbe, an mbe che a boo bɔ‑a mɔ gbu 'a ko yama n dɔ, chɛɛ mɔ gbu ma.”

⁸ Chɛɛ Chisɔsi‑a a ɔ sɔn fan, a ya kɔɔɛ a, koe min ni tachɛ tena an yiima ɔ. Chɛ ko a, a ɔ an ma, “Wo sɛmbɛ wo yii na chii koe a ka.

⁹ A ɔ ma gbɛ a fɔ koe a namaa chɛ ye, mbɛ n‑na n boo bɔ a 'a ko yama ɔ. Chɛɛ a ɔ gbɛ wan a ma koe a, a ni a kɔɔ sɔ, a ni a 'a yaa ya, a ni tachɛ chɛ.

¹⁰ N mbe a ɔ yian‑da wan wo a gbɛ sanche, mbɛ n fan, Mɔ gbu 'a Denɛ, gbasaya ɛ wan n boo ɔ, dunya chɛ ɔ, n boo bɔ koe a mɔɛ n 'na ko yama n dɔ.” Mbɛ a koɔ‑a ka wan namaa chɛ tena,

¹¹ A ɔ, “I wan, n mbe a fɔ tena i ye, mbɛ i ni i kɔɔ sɔ, i ni i 'a yaa ya, i ni ta i 'a chenɛ a.”

¹² A ya kɔɔɛ a, an gbɛɛ ya to‑a ka wan kamin chɛ a, a‑a a kɔɔ sɔ, a‑a a 'a yaa ya, mbɛ a ta‑a gbae. An gbɛɛ da ɔ gbaa‑a wan gbechee, mbɛ an‑na Yataa tando. An dɔ, “Nn ma koe ɔ yen nin bɛ, yɔ chɛ nyɔn sima.”

Chisɔsi‑a Difai chee, a bea koe a a fɛ

¹³ Mbɛ Chisɔsi bɔ‑a duu chɛ ɔ, mbɛ a yɛ‑a to Kadidi yii wa fɛ. Mɔ fanka na‑a wan a tena, mbɛ a‑a a kuu sɔ an kan‑da Yataa wakoe ma.

¹⁴ A to‑a tachɛ chɛ an na, mbɛ a‑a pawa bia mɔ dɔndɔ yen, an ni min chee Difai, Afiɔsi 'a denɛ. A ni si ɔ a 'a wai chɛ tena wan. Mbɛ Chisɔsi ɔ te a ma, “Bea n fɛ.” Mbɛ a‑a a kɔɔ sɔ, a bea‑a a fɛ.

¹⁵ Chɛ gbakɔ, Chisɔsi n ni wan si ɔ daun chɛ tena, Difai 'a chenɛ a. A tima chɛ a, pawa kain mɔ sɛsɛ nu, a basan mɔ dɔ mende n bɛɛ a, miin nii sɔ ɔ Yataa 'a chia ma, an gbɛɛ ni wan Chisɔsi fɛ. An sin, a sɛsɛ na‑a wan, an bun‑da daunɛ chɛ‑a an bɛ Chisɔsi a, a basan a fɛ denɛ n na.

¹⁶ Mbɛ Fayisii mɔɛ chɛ dɔ nu, miin ni sawa kan min be‑a Mosisi ma, an ni wan nɔ. An na‑a Chisɔsi yen fan daunɛ chɛ‑a, an bɛ mɔɛ n na, miin nii sɔ ɔ Yataa chia ma, a basan pawa kain mɔɛ chɛ n na. Mbɛ an dɔ a fɛ denɛ n ma, an dɔ, “Kai chɛ nii daunɛ chɛ ɛnden bɛɛ a, an bɛ mɔ bonda chɛ n na.”

¹⁷ Mbɛ Chisɔsi‑a a min kɛn, an ni min fɔ tena, mbɛ a ɔ, “Danda chɛ mɔ ma gbɔsɔ ee gboo ɔ bɔ tɔ ma, mɔɔ dechee chɛ nu, miin gbandien mu. Chɛ an fɛ mu, mɔɛ miin mu mɔ tandenɛ n na Yataa tena, n ma na ni an fan ko a. Chɛɛ mɔɛ miin mbe ee sɔ ɔ Yataa 'a chia ma, n na‑a an fan ko a.”

An‑na Chisɔsi ɔ tisa, a si sun bia ma

¹⁸ Tima dɔndɔ a, Chɔn, min ni yii chɛ mɔɛ n kunɛ ɔ, Yataa chia a, a fɛ mɔɛ n ni wan sun bia a. Mbɛ Fayisii mɔɛ chɛ nu, an na‑a a tena, an dɔ, “Chɔn fɛ denɛ n mbe sunɛ bia wan tima ɔ tima, mbɛ an‑na samunɛ chɛ. Nn fan Fayisii n bɛɛ, nn fɛ denɛ n bɛɛ mbe a ma ka wan. Chɛɛ i ta fɛ denɛ n mbe daunɛ an chɛ tun, an mbe ee sun bia. Fen ko a mu, an mbe chɛ ma tena?”

¹⁹ Mbɛ Chisɔsi ɔ, “Ni mɔɛ‑a musu si bɛnɛ chee, mbɛ a bɔɛ n na kan‑da, daun chɛ koe a mu. An mbe ee to nɔ a chen kɔɔ, an ni kɔnkɔɛ a dɛ an fandi ma. Tima min na wɛ musu si kai chɛ ɛ nɔ, mɔɛ chɛ n mbe kun fan, an ni daunɛ chɛ, an mbe ee to nɔ, an ni sunɛ bia.

²⁰ Chɛɛ tima ɛ che‑a wan, tima min na mɔɛ n mbe musu si kai chɛ ya‑a an tɛ, a tima a mu an mbe sunɛ bia‑a.”

²¹ Mbɛ Chisɔsi‑a tai tɛ wan an tena, a ɔ, “Mɔ ɔ mɔ ee che, i ni doma nama tɛ a a, doma kɔma dombo koe a. Ni mɔɛ‑a chɛ ma, a gba ma ee nyan‑da. Koe min na mu, woe an mbe to‑a doma nama chɛ ɔ, a koaen ba a.

²² A yɛ to, ni mɔ ma‑a gbɛ chɛ‑a gbɛ chɛ soe gboo ɔ, e a chɛ tena soe gboo nama an dɔ, ɛ to kaina aan a a ni kɔɔ. Chɛɛ mɔ ee gbɛ nama chɛ gbɛ chɛ soe gboo kɔma ɔ, a a kɔɔ koe a, ɛ a te wan, mbɛ i fo‑a gbɛ a, a basan soe gboo a. Mɔɛ ɛ min ma, e gbɛ nama chɛ soe gboo nama an dɔ.”

Chisɔsi an mu suin tee ma mansa a

²³ Chu mɔɛ n 'na suin tee dɔndɔ ma, Chisɔsi ni ben tena wan chia a sɛnɛ dɔndɔ tɛtɛ ma, an bɛ a fɛ denɛ n na. Mbɛ a fɛ denɛ n bun‑da sɛnɛ chɛ ɔ, chin fenɛ tɛ‑a an boo a.

²⁴ Mbɛ Fayisii chɛ nu, an dɔ, “A yen bɛ, i fɛ denɛ n mbe koe min ma tena, a ma nyin. Mmɔ 'a sawa ma dɔn ni chɛ ma, suin tee ma.”

²⁵ Mbɛ Chisɔsi ɔ, “Ɛ wan n yii ma, mbɛ wo‑a a kan fan Yataa 'a gboo ɔ, Mansa Defidi na‑a koe ma wan tima dɔndɔ a. Kɔnkɔɛ na‑a a bia wan tima dɔndɔ a, an bɛ a fɛ mɔɛ n na.

²⁶ Mbɛ a don‑da wan Yataa 'a chenɛ a, mbɛ biidi chɛ min been ni Yataa ma, a‑a a ya, mbɛ a‑a a daun. A yɛ‑a wan to, mbɛ a‑a a tɔɛ be a fɛ mɔɛ n ma. A na‑a mmɔ 'a sawa an yɔn ka, a mu min na, mmɔ 'a sawa na‑a a fɔ wan, mbɛ mɔ ɔ mɔ ee an biidi chɛ daun, mɔɔ dechee mɔɛ chɛ nu, miin mbe mmɔ tɛ ɔ Yataa a. Chɛɛ chɛ na‑a ma wan, tima min na Abiata ni Chu n 'na tɛ mɔ wa a, Yataa tena.”

²⁷ Mbɛ Chisɔsi danka‑a gbɛ min fɔ‑a an ye, a ɔ, “Suin tee chɛ, a bɔ‑a mɔ gbu an ko a, chɛɛ mɔ gbu an ma bɔ ni suin tee ko a.

²⁸ Chɛ an fɛ mu, n fan, Mɔ Gbu 'a denɛ, n fan mu mansa a suin tee wɛɛ ko a.”