GBOO IBU MƆƐ N KO A 9 - Yataa 'a Dɔbɛnɛ Nama

An ni Yataa fai buɛ min dɔ

¹ Yataa na‑a dɔbɛnɛ saa min chɛ, an bɛ Isɔɛɛ mɔɛ n na, sawa n ni wan a ma, Yataa fai koe a. A sin, mɔ gbu n na‑a kaina nyan fan, samunɛ chɛ koe a.

² Koe min na mu, an na‑a Yataa 'a tɛndi dɛn fan. An tɛndi chɛ dumu saa, an ni an chee, an dɔ, kaina min mbe tenchen Yataa ko a. A bu ɔ, tebu ni wan nɔ, ni kaina, dambo si koe a. A yɛ to, biidi gbugbu n ni wan sa ɔ an tebu chɛ ma. Mɔɛ miin ni mɔɛ n tɛ ɔ Yataa a, an ni an fan be Yataa ma.

³ Dumu fean bɔɛ ni wan nɔ, tɛndi chɛ bu ɔ, an ni min chee, an dɔ, kaina min mbe tenchen Yataa ko a, a bɛbɛɛ wandi a. Don koe a an dumu chɛ ɔ, koa an ni dɛn dɔ chia a, min‑na dumu fea chɛ n tɛ du.

⁴ An kaina chɛ bu ɔ, gbengbe ni wan nɔ min nyanden ni sanu ɔ, an ni fen kunyɛ a diama minda kaina. Yataa na‑a dɔbɛnɛ min bɛɛ chɛ Isɔɛɛ mɔɛ n na, a kakaa chɛ wɛɛ ni wan nɔ, min gboo gbɛɛ ma bandenɛ ni sanu a. An kakaa chɛ ɔ, sanu tɔmbua ni wan nɔ, daun fenɛ ɛ a ɔ. An ni an daun fen chɛ chee, an dɔ, mana. Eyɔn 'na tungbɔɛ wɛɛ, yamba kunɛ na‑a fɛn min ma, a ni wan kakaa chɛ ɔ. A yɛ to, sen dɛnfɛ fea chɛ nu, Yataa na‑a sawa chɛ nyɛn miin ma, mbɛ an be‑a Mosisi ma, an bɛɛ ni wan an kakaa dɔndɔ gbe chɛ ɔ.

⁵ An kakaa chɛ kun ma chia a, fenɛ n ni wan nɔ yɔ maeka nu, an kambanɛ ɛ an ma. An ni a ɔ yian fan, mbɛ Yataa ɛ wan an kaina chɛ. An kambanɛ chɛ nu, an dɔ fuindenɛ ni kaina chɛ kun ma, Yataa ɛ chinchin kaina min, mɔɛ n ma, ni an‑na ko yama ma. Min sien mu fen chɛ n gbɛɛ wakoe ma, mmɔ ee che bai sɛsɛ sa‑a sanche, a si an ma.

⁶ Fen chɛ n gbɛɛ ɔ bɛndenɛ ɛ ma ka wan. A sin, mɔɛ miin ni mɔ gbu n tɛ Yataa a, an fan ni don dechee dumu saa chɛ ɔ, tee ɔ tee a, an 'na tɛ mɔ wai chɛ koe a.

⁷ Chɛɛ tɛ mɔ wa sin, mɔ gbu n tɛ Yataa a, a ni don dechee dumu fean bɔɛ chɛ ɔ, gba dɔndɔ gbe sanɛ ma. A tima chɛ a, ɛ don nɔ wii an na a boo ɔ. Mbɛ a‑a a be Yataa ma, a wandi ko a, ni a 'a mɔɛ n ta ko yama ko a, an nii ma miin dɔ sɔn.

⁸ Chɛ ko a, Yataa Nyina na‑a a ɔ yian fan ka, mbɛ chia chɛ, mɔɛ n don koe a Yataa ɛ kaina, a da a nii ma ka ni. A sin mbe ma‑a ka wan, tima min na wɛ tɛndi chɛ ɛ sɔ ɔ.

⁹ Yataa 'a tɛndi chɛ ɔ, ɛ koe tɔmɔsi an yian mmɔ a bi tee chɛ kɔɔ. Mɔɛ n ni na nɔ wan boo fenɛ n na, a basan yasi n na, Yataa fai koe a. Chɛɛ an fen chɛ nu, an nii che a ma‑a an yiima a ni ko fion.

¹⁰ Koe min na mu, chia kɔma chɛ sien ni daun fenɛ n fan bakoe ma. A yɛ to, mɔɛ ma ɛ ko buɛ min dɔ, Chu n 'na sawa ta fɛ chia a. Chɛ n gbɛɛ, sawa gbama n fan nɛ. An ni nɔ dechee aan tima chɛ an ko a, Yataa na‑a a ta dɔbɛn nama chɛ tima min na.

Bai sa‑a, a si Chasi ma, yasi chɛndɛ dɔndɔɛ

¹¹ Chɛɛ Chasi ban‑da gbɛ na‑a, ma koe a tɛ mɔ wa a, mɔ gbu n tɛ Yataa a, ko chɛndɛ chɛ n ko a, miin‑na mmɔ tan. A ben‑da ka tɛndi min kɔɔ, mɔ gbu an ma a nyan ni, a sin gbu ma dunya chɛ ɔ fen na.

¹² Kaina chɛ, min mbe tenchen Yataa ko a, a bɛbɛɛ gbu, a don‑da nɔ dɔndɔ gbe, a sin, a danka‑a an ma. A nii ma ta ni nɔ ba wii a, a boo ɔ, a ma ta ni ninchi tɔngbɔ wɛɛ wii a, mɔɔ dechee a wandi wii. A na‑a che ka wan kuɔ fɔ fɔɛ ma sɔn‑da mmɔ ko a.

¹³ Sawa kɔma chɛ n tima a, ba wii min ni bɔn, a basan ninchi wii a, a ni mɔɛ n ko wan dechee an gboo ma. An soe chɛ n buwa wɛɛ ni ko dɔndɔ gbe chɛ an ma.

¹⁴ Ni soe wii ɛ chɛ ma wan, a ɔ gbɛ Chasi ta wii? A wɛn nii ma ko yama kan kɔ kan ma ni, chɛɛ a‑a a wandi fɔɛ be, mmɔ ko a, Yataa Nyina 'a gbasaya ɔ, min mbe kuɔ fɔ ko a. Chɛ an fɛ mu, Chasi wii ni mmɔ yiima a ko, a ni koe n ka mmɔ yii ma miin mbe na saya a, mmɔ ni Yataa fai, min mbe kuɔ fɔ ko a.

¹⁵ Chɛ an fɛ mu, Chasi an mbe mmɔ tɛ Yataa a, dɔbɛn nama chɛ ko a. Chɛ ni a ma, Yataa ɛ mɔɛ miin chee‑a, an ni kuɔ fɔ fɔɛ chɛ ma sɔn, min bakoe na‑a don an too ɔ. Koe min na mu, Chasi ban‑da gbɛ saya chɛ‑a, mɔɛ kun ka koe a, a bɔ an 'na ko yama n dɔ, an na‑a miin ma dɔbɛnɛ kɔma kɔɔ.

¹⁶ Gboo nyɛndenɛ, a si fuɛ gbaa fenɛ ma sɔn koe ma, a ee che wai‑a, mɔɔ ni siiya ma‑a nɔ, tea ɔ yian koe a. Koe min na mu, mɔɛ min‑na a nyɛn, a fa‑a.

¹⁷ Koe min na mu, ni mɔɛ‑a gboo nyɛn, a si boo fenɛ n ma, ɛ miin to‑a, an gboo chɛ ee wai, ni a mɔɛ chɛ ɛ fɔɛ ɔ, mɔɔ ni a fa‑a.

¹⁸ Chɛ an fɛ ni, dɔbɛnɛ saa chɛ wɛɛ, a kun nii ma tɛ ni, wii gbaa a.

¹⁹ Koe min na mu, Mosisi ban‑da kɛn Yataa 'a sawa chɛ n gbɛɛ ɔ yian‑da mɔɛ n gbɛɛ a, a na‑a chɛ an ma. A na‑a ninchi tɔngbɔɛ wii ya wan, a basan ba wii a, ni yii wɛɛ. A na‑a sa ti mende mende wan kɔnɛ bonɛ ma, mbɛ a‑a a don an wii chɛ ɔ, a‑a a fasi fasi sawa gboo chɛ ma, a basan mɔɛ n gbɛɛ a.

²⁰ Mosisi ɛ a fɔ‑a, a ɔ, “Wii an nɛ, min mbe dɔbɛn chɛ ko a, Yataa‑a min chɛ wo a.”

²¹ A na‑a a ma ka wan to, a‑a wii fasi fasi wan tɛndi chɛ ma, a basan fen kɔ fen na nɔ, an ni Yataa fai miin na.

²² Tea gbu a, sawa ta fɛ chia a, fen kɔ fen ma ɛ ko dechee fion wii an na, Yataa chen kɔɔ. A sin gbu, ni wii a nii ma bɔn ni, Yataa nii a boo bɔ‑a mmɔ 'a ko yama n dɔ.

²³ Chɛ ko a, koe ni min mbe ma, fen chɛ nu, miin bɔen mu fenɛ n na miin mbe banda bu ɔ, an ni ko fo chia chɛ a. Chɛɛ fen chɛ nu banda bu ɔ, yasi min mbe bɔ an ko koe a fion, a nyin an yasi chɛ ni ben dunya ɔ nɛnɛ ta ma.

²⁴ Koe min na mu, Chasi don‑da banda bu ɔ wan. A nii ma don ni kaina chɛ wan, Yataa ɛ fai kaina, mɔɛ n‑na min nyan. A don‑da gbɛ banda bu ɔ, ma koe an na, Yataa chen kɔɔ, mmɔ ko a.

²⁵ Tɛ mɔ wa chɛ tana, mɔ gbu n tɛ Yataa a, a ni don fan san kɔ san na, tɛndi chɛ ɔ, min mbe tenchen Yataa ko a. A sin, wii ni ma wan an boo ɔ, min nii ma an ta a. Chɛɛ Chasi tana, a nii ma a wandi be ni gba fea ko a.

²⁶ A ni ma‑a chɛ ma‑a, a ni na‑a wan fa‑a, gba sɛsɛ ko a, a ka dunya kuu sɔ tima ma. Chɛɛ sanche gbɛ, dunya e na to ban‑da, Chasi bɔ‑a mɔɛ n tɛ, gba dɔndɔ gbe ko a, a sin, a danka an nɛ. A na‑a a wandi be wan, mɔɛ n bɔ koe a ko yama n dɔ.

²⁷ A sin yianden mu ka wan, mbɛ mɔ ɔ mɔ kan kɔ kan mbe fa gba dɔndɔ gbe wan, mbɛ a gbakɔ, Yataa‑a gbɛmbo chɛ.

²⁸ A chia dɔndɔ gbe chɛ a mu, Chasi wɛɛ na‑a a wandi be gba dɔndɔ gbe wan, mmɔ 'a ko yama n ko a. Chɛɛ Chasi ɛ bɔ‑a wan to a a dunya chɛ ɔ, a gba fean bɔɛ ko a. A sin, a nɛnɛ ee ma‑a ko yama n fan bakoe a. Chɛɛ mɔɛ chɛ n fan kun ka koe mu, miin mbe a ma kɔn tena, an faa gbɛɛ a.