GBOO IBU MƆƐ N KO A 5 - Yataa 'a Dɔbɛnɛ Nama

¹ Koe min na mu, tɛ mɔ wa kan kɔ kan, Yataa ɛ a boo sɔ a ma wai chɛ koe a, a bɔɛ mɔ gbu n fan ko a. A ni ma nɔ, an tɛ, an bɛ Yataa a, yasi bɔ koe a an 'na ko yama n ko a.

² An tɛ mɔ wa chɛ, ɛ kun fan, a ni a bɔɛ n bia faa chima a. Chɛ nu, miin ma ko sɔn, ni chɛ nu miin bia koe gbɛ, ɛ an bia wan. Koe min na mu, a wandi wɛɛ, a yama chia nu, an mbe wan sɛsɛ.

³ Chɛ an fɛ mu, a dindenɛ mu a ma, yasi bɔ koe a Yataa tena. A wandi gbu ta ko yama n ko a, a basan an mɔɛ chɛ n ta n na.

⁴ An wai chɛ sin, mɔ wandi an mbe ee a ya i kun ma gbasaya a. Chɛɛ Yataa an mbe mɔɛ chee, yɔ a na‑a ma buɛ min dɔ Eyɔn na.

⁵ A chia dɔndɔ gbe chɛ a, Chasi gbu wɛɛ, a nii ma a wandi ya ni tɛ mɔ wa a, mɔ gbu n tɛ, an bɛ Yataa a. Chɛɛ Yataa wandi, an na‑a a boo sɔ a ma. Yataa na‑a a fɔ wan a 'a gboo ɔ, a ɔ, “N 'na denɛ mu i a. N ma‑a i fa a bi.”

⁶ Yataa na‑a a fɔ wan to, a 'a gboo kaka dɔ mende ɔ, a ɔ, “Kuɔ fɔ ko a, e ma‑a wan mɔɛ n tɛ, n fan Yataa a. E ma‑a wan, yɔ Mɛchisɛdɛki ni buɛ min dɔ.”

⁷ Tima min na Chisɔsi ni fɔɛ ɔ dunya chɛ ɔ, a ni samunɛ chɛ wan, a yɛ to, a ni Yataa ɔ tisa wan basan koe a a ma. A ni chɛ ma a kuiɛ ma sɛenɛ an na, a ya yii ɛ ta‑a bɔ‑a Yataa tena, min mbe che dechee a kun bɔ koe a saya ɔ. A sin ni baa be ka buɛ min dɔ Yataa ma, a wɛɛ, a ni a di kuiɛ a min fan.

⁸ Chɛɛ a ni wɛɛ boo ɔ boo Yataa 'a denɛ a, a na‑a mɔnɛ ɔ bia wan. Chɛ an gbu na‑a a ma, a‑a a yiima ɔ bɛn, kooya be koe a Yataa ma.

⁹ A sin, a na‑a ma wan mɔɛ a, min da faenɛ ɛ gban, Yataa tena. Chɛ‑a a ma wan, a ma‑a mɔɛ a, min mbe na kuɔ fɔ fɔɛ a mɔɛ n ko a, miin mbe kooya be‑a a ma.

¹⁰ A gbu sin, Yataa wandi, an‑na a yian, ma koe a tɛ mɔ wa a, mɔ gbu n tɛ Yataa a. A ni ma yɔ Mɛchisɛdɛki ni buɛ min dɔ.

Wo ma sɛmbɛ wo kai fa koe a Chasi a

¹¹ Bai kɔkoo nn da a, a fɔ koe a, a si koe chɛ ma. Chɛɛ koe sin fan nɛ, min dɔ gbɛ, a ɔ yian koe a wo a. Koe min na mu, wo ee fua koe ɔ gbɛ‑a.

¹² Tima chɛ gbu sin na gbɛ, a ni ma‑a ko ma kawaenɛ an na, ni wo ni wan gbɛ mɔ dɔ mende n kan‑da. Chɛɛ sanche wɛɛ, mɔɔ ni mɔ dɔ mende‑a wo kan, a nama a, a si Yataa bai kuu sɔ tena ma. Wo e wan dechee yɔ den toa nu, miin mbe a kuu sɔ susu yii ma, an mbe ee daun fen dɔ gbɛama daun.

¹³ Koe min na mu, mɔ ɔ mɔ min mbe susu minɛ a, den toa mu a a. Koe min na mu, a yiima ɔ dɔɔ, a si chia ma, tea ɛ min dɔ, Yataa tena.

¹⁴ Chɛɛ daun fen dɔ gbɛama tana, ɛ mɔɛ n fan ko a, miin kunɛ kɔɔen mu. Mɔɛ nu, miin yiima kɔɔen mu, an‑na a kan, mɔ gbu ɛ ko chɛndɛ tɛ bɔ ka ma, a fea ko yama a.