Gboo Kadesia Ko A 6 - Yataa 'a Dɔbɛnɛ Nama

Pɔɔ ɔ te, Chisianɛ n ni basan an nyɔn ma

¹ N suun ma nyɔɛ nu Chasi ɔ, wo e a ɔ yen‑da wan, mbɛ mɔɛ ɛ wo tɛ ɔ, ko yama kun‑da min ma. Yataa Nyina ɛ wo wɛn sɔ tena wɛ chia chɛndɛ ma, wo tima ya, wo ni an mɔɛ chɛ sɔ chia chɛ ma. Wo wandi gbu wɛɛ, wo wo kun ma fɛn, wo yiima ma na mun, a ka an chia ma.

² Wo wo boo si wo nyɔn na ya kɔɔ tawa kɔɔ, min mbe a ma, wo ni Chasi 'a sawa bia a chia ma.

³ Koe min na mu, ni mɔ ɔ mɔ‑a yiinachii chɛ, mbɛ mɔɛ mu a a, min sin mu ka mɔ a tenden ma a, ɛ a wandi an bun tena ka.

⁴ Chɛɛ mɔ ɔ mɔ ni a wandi gbu tachɛ buɛ ma mɛn. A tima a mu, mɔ ɔ mɔ ɛ a ɔ yen‑da, mbɛ mɔɛ e yonka tɛ i wandi an ko a dechee, chɛɛ i bɔɛ ma.

⁵ Koe min na mu, Yataa ee mɔ ɔ mɔ bia a nyɔn sɔnɛ a.

⁶ Ni an‑na mɔɛ min kan, Yataa bai ma, a ni a boo fenɛ chɛndɛ gbɛɛ ɔ du, a ni a kan mɔɛ kɔ.

⁷ Wo ma wo wandi bun, mbɛ wo e kun fan wo ni Yataa ma yɛn. Koe min na mu, chin fen kan kɔ kan, mɔɛ ɛ min chin, ɛ danka an gbɔɛ ya a.

⁸ A sin, ni mɔɛ ma‑a dechee a faa ma koe yama ma‑a mɔgbuya ɔ, a gbɔɛ ɛ ma‑a kuɔ fɔ saya an na, a danka a. Chɛɛ mɔɛ min mbe ma‑a Yataa Nyina gbee a, a gbɔɛ ɛ ma‑a kuɔ fɔ fɔɛ an na.

⁹ Chɛ an fɛ mu, mmɔ gboo ɔ ma fa ko chɛndɛ ma koe a. Koe min na mu, tima ɛ che‑a wan, ni mmɔ ma sɛmbɛ ni, mbɛ mmɔ‑a a tɔnɔnɛ ma sɔn.

¹⁰ Chɛ ko a, Yataa ɛ mmɔ kɔ‑a buɛ min dɔ, mmɔ ni ko chɛndɛ ma tima ɔ tima, mɔ ɔ mɔ a. A sin, a bɛɛ bɛɛ mɔɛ chɛ nu, mmɔ kai faen mu Chisɔsi a, mmɔ bɛ miin na.

Pɔɔ ɛ dasi dankama be‑a

¹¹ Wo gboo chɛ yen bɛ, n fandi gbu, n mbe min nyɛn tena gboso gboso wo tena, n ta boo a.

¹² Mɔ dɔ gbɛɛ ee a din‑da wo ma, wo a kamincha koe a. Mɔɔ dechee mɔɛ chɛ nu, miin toen mu an ni an fandi ɔ yian, mɔ gbu gboo ta chia a. A sin, an mbe chɛ ma‑a dechee chia an na, an mbe ee kun, an ni ko yawaenɛ sa an ma chia min na, Chasi 'a kɔn gbengbandenɛ ko a.

¹³ Koe min na mu, mɔɛ chɛ n bɛɛ gbu, miin na kaminchaen mu, an bɛɛ gbu ee an sawa bia tena. Chɛɛ an toen mu, wo a ni kamincha, min mbe a ma, an ni tɔmbɔɛ chɛ wo gboo a.

¹⁴ Chɛɛ n tana, n mbe ee tɔmbɔɛ chɛ ɛnden bɛɛ a, fen dɔ mende ko a, mɔɔ dechee kɔn gbengbanden chɛ, Mansa Chisɔsi Chasi fa‑a min ma. An kɔn gbengbandenɛ chɛ, a‑a a ma gbɛ, n boo ee to dunya chɛ ma koe ɔ, dunya chɛ wɛɛ boo ee n ma koe ɔ.

¹⁵ An ni mɔ a kamincha, an ma i a kamincha, chɛ ma ko a, ɛnden bɛɛ a. Min mu dechee koe a, an nɛ, Yataa‑a a mɔɛ chɛ ma mɔ nama a.

¹⁶ Mɔɛ n gbɛɛ, miin mbe bea‑a chia chɛ fɛ, Yataa ni faachima be an ma, a ni chinchincha yian an na. Mɔɛ chɛ n gbɛɛ, an fan mu Yataa ta mɔɛ n na.

¹⁷ A ka gbɛ sanche ma, aan a ta, mɔ ɔ mɔ ma n ya kɔɔ tawa. Koe min na mu, paa, an mbe n gboo ma, min mbe a ɔ yian, mbɛ Chisɔsi 'a yɔnɛ mu n na.

¹⁸ N suun ma nyɔɛ nu Chasi ɔ, mmɔ 'a mansa Chisɔsi Chasi ni wo dua. A ni ma ka.