Gboo Kadesia Ko A 4 - Yataa 'a Dɔbɛnɛ Nama

¹ Chɛɛ ka n mbe tɔmɔsi chɛ be, wo ni n da a kuiɛ ɔ gbɛ. Ni den mɛsɛ ma‑a wɛ tima min na denmɛsɛya ɔ, ɛ wan yɔ yɔnɛ. Boo fenɛ min mbe a fa boo ɔ, a mu wɛɛ a ta a, chɛɛ gbasaya ee wɛ a boo ɔ, an boo fen chɛ n kun ma.

² Ɛ ma gbakoo n fan na gbasaya kɔɔ, miin mbe a sɔ chia ma aan tima ni che, a fa na‑a tima min yian.

³ A chia dɔndɔ gbe chɛ a, mmɔ wɛɛ, mmɔ ni wan denmɛsɛya ɔ. A sin, yɔnɛ ni mmɔ a, nyina yama n 'na gbasaya kɔɔ dunya chɛ ɔ.

⁴ Chɛɛ tima che‑a kɛn chɛndɛ chɛ, Yataa‑a a wandi gbu ta denɛ a na wan dunya ɔ. Musu an‑na a bu ya, mbɛ a‑a a suun mɔgbuya chia a. A sin, a ni sawa an kɔɔ, fɔɛ ɔ.

⁵ Yataa‑a a sɔ, min mbe a ma, mɔɛ chɛ nu, miin ni an sawa kɔɔ, an ni bɔ a kɔɔ. Chɛ ni a ma, Yataa ni mmɔ ya a 'a denɛ n na.

⁶ Yataa sin, a‑a a ma wan, a 'a denɛ Nyina, ɛ mmɔ fɛ. A‑a chɛ ma, koe min na mu, a 'a denɛ mu mmɔ a. A 'a denɛ Nyina chɛ sin, ɛ Yataa chee tena wan, a ɔ, “Fa.”

⁷ Chɛ ko a, yɔn ma to wo a, Yataa 'a denɛ mu gbɛ wo a. Wo sin ma‑a ka buɛ min dɔ a 'a denɛ a, a‑a dua miin sa tena ɔ bɛn a 'a mɔɛ n ko a, wo wan ta ɛ ma‑a an na.

Pɔɔ ɛ faagbaa ɔ, Kadesia mɔɛ n bakoe a

⁸ Wo nii ma Yataa sɔn tima min na suun, wo ni yɔncha ɔ wan, nyina yama n boo ɔ, miin nii ma Yataa a.

⁹ Chɛɛ sanche chɛ ɔ, wo‑a Yataa sɔn gbɛ. Chɛɛ tea gbu ko a, Yataa an‑na wo sɔn. Tea gbu ko a, a ee che ma‑a wo 'a yiinachii ɔ, wo ni mun to, wo ni bea nyina yama chɛ n fɛ, fanka ee ka miin na, a sin, an mbe ben‑da fen fuinɛ a. Wo e chɛ ma wan? A ee ma to wo 'a yiinachii ɔ ɛnden bɛɛ a, wo ma koe a to, an 'na yɔnɛ n na.

¹⁰ Wo e tee n ya wan, a ben tee dɔ nu ma. Wo e kau dɔ n bɛɛ ya ka wan, ni tima dɔ nu, a basan sanɛ dɔ n bɛɛ a.

¹¹ N mbe faagbaa an dɔ, mbɛ n tɔɔya‑a wo ko a fuu.

¹² N suun ma nyɔɛ nu Chasi ɔ, n mbe wo disa tena, wo ni bea n 'na ko ma buɛ fɛ. Koe min na mu, n bɛɛ, n na‑a koe n ma wan wo ta chia a. Wo nii ma ko yama ma ni n na.

¹³ Wo‑a a ɔ sɔn fan, mbɛ a saa a, gboo ɔ gbandi, an na‑a a ma, n‑na sakana bai chɛndɛ chɛ sa wo tena, a si Chisɔsi ma.

¹⁴ A sin, n gboo ɔ yauaen ni boo ɔ boo, min ni kɔndɔfii a wo tena, wo nii ma n tinɔ ni, chɛ ma, wo ni wo boo bɔ n kɔɔ. Chɛɛ wo na‑a n bia wan, yɔ Yataa 'a maeka, yɔ Chisɔsi Chasi wɛɛ.

¹⁵ Buɔdia min ni wo ɔ, n ma a ɔ sɔn ɛ gbɛ buɛ min dɔ. Ni wo ni kun fan, wo ni wo ya n bɔ, wo ni an be n ma, wo ni a ma‑a wan. N mbe chɛ siiya bɔ wan.

¹⁶ N yen ko gbɛ, n‑na tea bai fɔ wo ye. Chɛ ee na n ma gbɛ wo chɛɛ ma nyɔɛ an na?

¹⁷ Mɔɛ dɔ nu, an mbe a ɔ yian tena wan wo a, mbɛ an toen mu wo a kaka, chɛɛ ko chɛndɛ ma wo ko a. An toen mu an ni mmɔ tɛ du, mbɛ wo ma‑a gbɛ chia dɔndɔɛ a, wo bɛ an na.

¹⁸ A gbu nyin gbɛ, wo faa ni ma koe ɔ, min mu ko chɛndɛ a. A sin, wo ma chɛ ma dechee, n mbe ma wo tɛ ɔ tima min na, chɛɛ wo an ma tima ɔ tima ko a.

¹⁹ N 'na den toa nu, n mbe tɔɔya ɔ bia tena wo ko a, aan wo sɔnɛ ni bɔ Chasi ta a.

²⁰ Sanche chɛ ɔ, ɛ ma wan n ma buɔdia a, n ni ma wo tɛ ɔ, n ni n koɔ buɛ mun. Koe min na mu, n kɔndɔ fiien mu, wo wakoe a.

Pɔɔ ɛ tai tɛ‑a, a si Aka ma, an fea Seda a

²¹ Wo wɛn toen mu, wo ni ma sawa chɛ kɔɔ, ka wɛ n mbe wo ɔ tisa. Wo‑a a ɔ sɔn fan, sawa chɛ‑a min fɔ?

²² Koe min na mu, a nyɛnden fan mu Yataa 'a gboo ɔ, mbɛ Ebeami‑a den kaima fea an fan suun. Dɔndɔɛ de ni yɔnɛ an na, dɔndɔɛ sin de nii ma yɔnɛ a.

²³ Chɛɛ yɔnɛ chɛ ta den kaima chɛ, a na‑a suun mɔgbuya ta fɛ chia an na. Musu dɔndɔɛ chɛ sin, min nii ma yɔnɛ a, a 'a den kaima suun‑da tooɔdia ta fɛ chia an na, Yataa‑a min chɛ Ebeami a.

²⁴ Chɛ mu gbondoma an na, a ɔ gbɛ koe a. Musu fea chɛ nu, an mu dɔbɛn fea chɛ n fan na, Yataa na‑a miin chɛ. Dɔbɛnɛ dɔndɔ chɛ‑a kɔnkɔɛ chɛ an ma, min tɔ mu Saina. A na‑a chɛ wan, mbɛ musu min tɔ mu Aka, ɛ denɛ n suun‑da wan, miin mbe ma‑a yɔnɛ n na.

²⁵ Aka chɛ mu gbɛ kɔnkɔɛ chɛ an na, min tɔ mu Saina, Adebia chɛnyɛ ɔ. A sin, a sɔen mu duu wa chɛ an ko a sanche, min mu Chuusaɛn na. Koe min na mu, nɔ ɛ yɔncha an dɔ, a basan a ɔ mɔɛ n na.

²⁶ Chɛɛ Chuusaɛn tana, min mbe banda bu ɔ, a ee yɔncha ɔ. A sin, a ɛ wan dechee yɔ mmɔ de.

²⁷ Koe min na mu, Yataa 'a gboo‑a a fɔ wan, a ɔ, “Gbanda musu, i wɛn mbe ee den suun, buɔdia bɔ. Yee tɛ, buɔdia bɔ, a ɔ benden ba a, i wɛn mbe ee bu ɔ tɛ bu dumɛ ɔ. Koe min na mu, musu boo kaenɛ, ɛ denɛ suun‑da wan kaka ɛ ben‑da wan musu ma, kai ɛ min boo ɔ.”

²⁸ N suun ma nyɔɛ nu Chasi ɔ, wo e wan yɔ Aisaki, min suun‑da yɔ Yataa‑a Ebeami too ɔ dia buɛ min dɔ.

²⁹ Chɛɛ a tima chɛ a, denɛ min suun‑da mɔgbuya ta fɛ chia a, a‑a ko yawaenɛ sa wan den chɛ ma, min suun‑da Yataa Nyina ta fɛ chia a. A sin, sanche wɛɛ, a ɛ ma tena ka wan.

³⁰ Chɛɛ Yataa 'a gboo‑a chɛ an fɔ. A ɔ, “Yɔnɛ chɛ gbain, an fea a 'a denɛ a. Koe min na mu, yɔn musu 'a denɛ, a ee a fa boo fenɛ ma chɛɛ chɛ‑a, an fea a 'a fuu musu 'a denɛ a.”

³¹ N suun ma nyɔɛ nu Chasi ɔ, chɛ an fɛ mu, mmɔ ma yɔn musu 'a den na, mmɔ mu fuu musu 'a denɛ n fan na.