Gboo Fiipai Ko A 4 - Yataa 'a Dɔbɛnɛ Nama

Pɔɔ ɛ chia yian‑da, mmɔ ɛ bɔ min na

¹ Chɛ an fɛ mu, n suun ma nyɔɛ nu Chasi ɔ, n toen mu wo a, wo sin yen sɔɛ ɛ n na. N bu ɔ di wo ko a, a yɛ to, wo wan mu tɔnɔnɛ a, n 'na wai ko a. N dia nyɔɛ nu, wo bɛ Mansa Chisɔsi a, wo ma‑a ka buɛ min dɔ mɔ dɔndɔɛ a, wo ma yɛ to kuu kɔ chɛ ɔ.

² N mbe Yuodia disa tena, an fea Sintiche a, an ni ma kuiɛ dɔndɔya ɔ, yɔ wo suun ma nyɔɛ nu Mansa Chisɔsi ɔ.

³ A sin, n mbe i wɛɛ ɔ tisa tena, i wɛn mbe wai chɛ tena danaya ɔ, n toen mu i ni musu fea chɛ n deman. Koe min na mu, an‑na toa si wan n kɔɔ, n 'na wai ɔ, sakana bai chɛ a ta koe a ya ɔ ma. An bɛ ni Kemendi a, a basan n bɔ wai chɛ mɔɛ tɔɛ n na. A sin, an tɔɛ ɛ wan gboo chɛ ɔ, mɔɛ n tɔɛ ɛ min dɔ, miin mbe kuɔ fɔ fɔɛ ma sɔn‑da.

⁴ Wo e ka buɛ min dɔ, wo ma‑a mɔ dɔndɔɛ a Mansa Chisɔsi a, wo buɔdia bɔ tima ɔ tima ko a. Ka n mbe a fɔ to wo ye, wo buɔdia bɔ.

⁵ Mansa Chisɔsi na tima ɔ ma yansan to. Wo a ma, mɔ ɔ mɔ ni a ɔ sɔn, wo faa chimaen mu buɛ min dɔ.

⁶ Ko ɔ ko kan kɔ kan ma wo faa gbaa. Chɛɛ wo 'a samunɛ ɔ, wo 'a Yataa ma nande ɔ, wo a ma, a ni a ɔ sɔn, wo toen mu a ni koe miin chɛ wo ye, tima ɔ tima ko a. A sin, wo a wai bɔ koe n gbɛɛ ko a, a‑a miin chɛ wo ye.

⁷ Chɛ an fɛ mu, Yataa ɛ faachima min be, min benden mu mmɔ 'a ko sɔnɛ gbɛɛ ma, ɛ wo faa kun ma fɛn‑da wan, a ni wo yiima wɛɛ kun ma fɛn. Koe min na mu, mɔ dɔndɔɛ mu wo a, wo bɛ Chisɔsi Chasi a.

⁸ N mbe min fɔ tena gbɛ sanche, n suun ma nyɔɛ nu Chasi ɔ, wo wo yii na chii koe chɛ n ma, baa ɛ miin ma, Yataa toen mu koe miin na. Koe nu, miin nyin, mabɔ ee miin ma ɛnden bɛɛ a, basɔmaya koe nu. Mɔɛ n mbe che kawa‑a koe miin ma, an mbe koe miin bai, dua ɛ koe miin dɔ.

⁹ Ko ɔ ko, wo‑a n yen miin ma‑a, wo‑a miin kan, an to‑a wo yii ma, wo an ma. An ni ma n da a bai n na, chɛ ma, an ni ma n chɛ chɛ wai n na. A sin, Yataa min mbe faa chima be mmɔ ma, ɛ ma‑a wan wo kɔ.

Pɔɔ ɛ wai bɔɛ chɛ‑a, an 'na wai nyima n ko a

¹⁰ N mbe buɔdia bɔ tena wan, a chenama ɔ, a sin to, n mbe Mansa Chisɔsi wai bɔ tena wan. Mbɛ sanche chɛ ɔ, n bakoe ni buɛ min dɔ wo faa ɔ, wo‑a a kun ma sa. Tea gbu ko a, n bakoe ni wan wo faa ɔ, chɛɛ a chia nii wo ye, a ɔ yian koe a.

¹¹ An ma a fɔ ni, n mbe ka gbonyɛ an na, mbɛ fen mbe ee n boo ɔ. Koe min na mu, n dii koe mu gbɛ, mbɛ fɔɛ ɛ ma buɛ min dɔ n ko a, tima ɔ tima, a ni ma faachima a n tena.

¹² N‑na a ɔ sɔn fan, n mbe ma buɛ min dɔ, ni fen na tenden mbe ee n boo ɔ, chɛ ma, ni boo fenɛ chenama ɛ n boo ɔ. N‑na chɛ kan gbɛ, mbɛ n ni ma‑a kan kɔ kan, ko ɔ ko ni n tan, n faa chimaenɛ ni ma tun. N bu faenɛ ni ma, kɔnkɔ ni ma n na, fen ni ma n boo ɔ a chenama ɔ, fen den bɛɛ ni ma n boo ɔ.

¹³ Chasi 'a gbasaya ɔ, ɛ min be n ma, n mbe che wan, n ni ko ɔ ko kan kɔ kan ma.

¹⁴ Chɛɛ chɛ gbɛɛ ɔ, mɔ chɛndɛ mu wo a, n 'na ko yawaenɛ ya koe a.

¹⁵ Wo sin gbu, wo wan Fiipai mɔɛ nu, wo‑a a ɔ sɔn fan, min ma‑a a saa a, n‑na a kuu sɔ tima min na sakana bai chɛndɛ chɛ ɔ yian‑da mɔɛ n na. A tima chɛ a, kɛn n ni ka tena nɔ an Masidonia chɛnyɛ chɛ ɔ, chɔchi kan kɔ kan dɔ gbɛɛ nii ma toa si ni n 'na wai kɔɔ, mɔ dechee wo wan. Wo wan ni wo boo fenɛ be.

¹⁶ Koe min na mu, Tɛsadonika duu ɔ nan fan bɛɛ, n ni nɔ tima min na, wo ni wo boo fenɛ a ta wan n ye, gba sɛsɛ ko a.

¹⁷ An ma a fɔ ni, mbɛ n toen mu dechee wo boo fenɛ n fan ma sɔn koe a. Chɛɛ n toen mu n ni a ɔ yen, Yataa ni wo deman, basan koe chɛ a n ma.

¹⁸ N‑na fen kɔ fen ma sɔn fan, wo‑a miin na na n ye. A sin, n yii nii min dɔ, n‑na an gbu ma sɔn. N mbe wo wai bɔ tena, wo 'a samba fen chɛ n ko a, n‑na miin ma sɔn, a ka Ɛpafɔditɔsi a. A‑a a bɔ n ko a, chɛndɛ chɛ. An samba fen chɛ, ɛ wan dechee yɔ yasi, min kunyɛ a di, a sin, a ko a di Yataa ye, a sin, Yataa toen fan mu a a.

¹⁹ A sin, nyan fen ba chɛ n gbɛɛ Yataa boo ɔ, miin ma gbɔsɔɛ ɛ wo ma, wo e an ma sɔn‑da wan. Chɛ ɛ bɔ‑a koe chɛ an dɔ, Chasi‑a min ma wo ko a. N 'na Yataa, ɛ a ma‑a wan chɛ ni ma.

²⁰ Tando ni be mmɔ Fa Yataa tɔɛ ma, kuɔ fɔ ni kuɔ fɔ ko a. A ni ma ka.

Pɔɔ ɛ Yataa 'a mɔɛ n gbɛɛ kɔndɔn‑da, Fiipai duu ɔ

²¹ Wo ni Yataa 'a mɔɛ n gbɛɛ kɔndɔn n ye, miin mu mɔ dɔndɔɛ n na, an bɛ Chisɔsi Chasi a. Mmɔ suun ma nyɔɛ n bɛɛ Chasi ɔ, miin mbe nɛ n tena, an‑na wo kɔndɔn.

²² Yataa 'a mɔɛ n gbɛɛ nɛ, a bɛɛ bɛɛ chɛ nu, miin mbe wai chɛ tena Domi kun ti wa 'a kata ɔ, an bɛɛ, an‑na wo kɔndɔn.

²³ Mansa Chisɔsi Chasi ni wo dua. A ni ma ka.