Gboo Fiipai Ko A 3 - Yataa 'a Dɔbɛnɛ Nama

Pɔɔ ɛ a ɔ yian‑da, mmɔ ɛ tan buɛ min dɔ, Yataa tena

¹ N suun ma nyɔɛ nu Chasi ɔ, wo e ka buɛ min dɔ, wo ma‑a mɔ dɔndɔɛ a Mansa Chisɔsi a, wo buɔdia bɔ. N mbe ee sika tena, yɛ koe a n da a kuiɛ ɔ wo tena. A sin, an mbe nyan‑da wo ko a.

² Wo wo kun ma fɛn, wuu chɛ n boo ɔ, mɔ yama chɛ nu. An fɛn mbe mɔɛ n na kamincha ka, wo wo kun ma fɛn an boo ɔ.

³ Mmɔ wan mu Yataa 'a mɔɛ n na, tea tea ko a. Koe min na mu, mmɔ wan mbe Yataa fai a Nyina 'a gbasaya ɔ. Mbɛ mmɔ yɛ‑a, mmɔ‑a buɔdia bɔ, mmɔ ma koe a mɔ dɔndɔɛ a Chisɔsi a. Mmɔ ma mmɔ kai fa ni ko dɔ mende kan kɔ kan na, mɔ gbu ɛ che min ma‑a.

⁴ N ni chɛ fɔ wɛɛ, chɛɛ n fan Pɔɔ, tea ɛ wan n boo ɔ, n ni n kai fa koe n na, mɔ gbu ɛ che miin ma‑a. Ni ɛ wan mɔ ɔ mɔ yii ma, mbɛ tea ɛ wan a boo ɔ, a kai fa koe a an koe chɛ n na, n ta tea koo a ta ma.

⁵ Isɔɛɛ mɔɛ mu n na, n de Ibu mɔɛ, fa wɛɛ Ibu, n sin bɔ‑a Bɛnchamin 'na dambi an dɔ. An‑na n na kamincha wan, tee sɛi n bɔɛ ma kɛn n suun‑da. A sin, Chu n 'na sawa ta fɛ chia a, Fayisii mɔɛ mu n na.

⁶ Ko ɔ ko kan kɔ kan, n ta yiima ɔ, Yataa toen ni n ni min ma, n ni a ma wan n sɔɛ gbɛɛ a. N fan ni a ma, ko yawaenɛ ni sa chɔchi mɔɛ n ma. Chu n 'na sawa nan sin, min sien ni tachɛ koe ma a a teaya ɔ, mabɔ nii ma a ɔ.

⁷ Chɛɛ ni tɔnɔnɛ kan kɔ kan ni wan a ɔ, n‑na n kan kɔ sɔ an na, bea koe a Chisɔsi Chasi fɛ.

⁸ Tea ko a, n‑na n kan kɔ sɔ an gbɛɛ a. Koe min na mu, n‑na Chisɔsi Chasi sɔnɛ min chɛ ka mansa a, a benden mu ko ɔ ko ma. A wan ko a mu, n mbe fo tena fen kɔ fen na, n sin mbe an ya tena bubuu an na. N‑na chɛ ma, min mbe a ma, n ni a wan Chasi ma sɔn,

⁹ mbɛ nn fea ma‑a mɔ dɔndɔɛ a. N ni nn fan Chu n 'na sawa miin bia, an fan ma a ma ni, n ma‑a mɔ tandenɛ a Yataa chen kɔɔ. Chɛɛ min ma‑a, n‑na n kai fa wan Chasi a. Chɛ an‑na a ma dechee, Yataa‑a n ya mɔ tandenɛ a, a chen kɔɔ.

¹⁰ N toen mu, n ni Chisɔsi sɔn, n ni gbasaya chɛ a tisɔn, Yataa‑a min ya, a‑a Chisɔsi kɔɔ sɔ, a ka saya ɔ. N toen mu to, n ni tɔɔya chɛ sima ɔ bia, a‑a min dɔ bia, n ni ma yɔ a wan, a 'a saya ta fɛ chia a.

¹¹ Chɛ ko a, n bɛɛ, n ni ma mɔɛ dɔndɔ a, Yataa ɛ min kɔɔ sɔ‑a, a yɛ to fɔɛ ɔ.

Pɔɔ ɛ a ɔ yian‑da, banda bu ɔ ma ɛ sɔn buɛ min dɔ

¹² N mbe ee a fɔ tena, mbɛ n ban‑da an koe chɛ n gbɛɛ chɛ‑a, miin mbe chɛ. Chɛ ma, mbɛ n ban‑da ma‑a gbae mɔɛ gbu a, n ni ma min na. N gboo ɔ ee fa, butuinɛ chɛ koe a, n ni tɔnɔnɛ chɛ ma sɔn, Chisɔsi Chasi‑a a ma, n bea‑a a fɛ min ko a.

¹³ N suun ma nyɔɛ nu Chasi ɔ, n mbe ee a ya tena gbɛ, mbɛ an fen chɛ ma‑a n ta a. Chɛɛ ko dɔndɔ ɛ nɔ, n mbe gbɛ min ma‑a. N yii ee to koe kɔma chɛ kɔ, chɛɛ n mbe gbɛ butuin chɛ tena ya ɔ ma an ma sɔn koe a.

¹⁴ N mbe n fɔsɔ tena, ya ɔ ma an ko a, n ni tɔnɔnɛ chɛ ma sɔn. Mɔɛ min fea Chisɔsi Chasi a, an ma‑a mɔ dɔndɔɛ a, ɛ tɔnɔnɛ min ma sɔn, ni Yataa‑a an mɔɛ chee banda bu ɔ.

¹⁵ Chɛ an fɛ mu, mmɔ wɛn yii kɔɔen mu gbɛ, Chisiancha chɛ ɔ, mmɔ yiima ni ma a buɛ chɛ ɔ. A sin, ni wo yiima ma‑a dama ko ɔ ko ɔ, Yataa ɛ a ma‑a wan wo ni a ɔ sɔn.

¹⁶ Chɛɛ chɛ gbɛɛ ɔ, mmɔ‑a kanɛ min ma sɔn, mmɔ tachɛ a chia a.

¹⁷ N suun ma nyɔɛ nu Chasi ɔ, wo bea n sɔnɛ fɛ. A sin, wo ya ma ka chɛ n fɛ, miin mbe koe n ma tena, yɔ nn na‑a miin tɔmɔsi a tachɛ.

¹⁸ Koe min na mu, mɔɛ sɛsɛ nu, n na‑a miin bakoe ɔ yian wo a tima sɛsɛ ko a, n mbe an bakoe fɔ tena to wo ye, di ɛ n ya a. Mbɛ an mu mɔɛ n fan na, miin mu chɛɛ ma nyɔnɛ n na, kɔn gbengbanden chɛ ko a, Chasi fa‑a min ma.

¹⁹ An 'na Yataa mu an 'na dunya ma buɔdia an na. Koe min ma mauen mu, a ma koe a, an mbe yonka tɛ an ma koe a. A sin, an yiima gbɛɛ ɛ dunya ma koe n fan ma. An danka, ɛ ma‑a kasaa an na.

²⁰ Chɛɛ mmɔ tana, mmɔ waa chɛndɛ chɛndɛ mu banda bu ɔ an na. A sin, mmɔ kun ka mɔɛ chɛ, Mansa Chisɔsi Chasi, mmɔ ɛ min ma kɔn tena, ɛ ka tena nɔ wan.

²¹ Mmɔ gboo chɛ, baa a tenden mbe ee ka min ma, a wan mbe a mun‑da. A sin, ɛ a ma‑a wan, yɔ a ta gboo, min kamayaen mu. A 'a gbasaya min mbe a ɔ, min mbe a ma, fen kɔ fen mbe don a kɔɔ, ɛ an na tachɛ a a.