Gboo Fiipai Ko A 2 - Yataa 'a Dɔbɛnɛ Nama

Pɔɔ ɛ Yataa 'a mɔɛ n na si‑a, an ni koo yɔ Chisɔsi

¹ Tea ko a, mɔ dɔndɔɛ mu wo a Chasi a. Chɛ sin ma‑a wo tena faamanande a. Chasi toen mu wo a, wo sin mbe an buɔdia ɔ. Wo e wan ko dɔndɔɛ ɔ, wo bɛ Yataa Nyina a. A sin, koadia ɛ wan wo faa ɔ, a basan chinchimaya a.

² Koe chɛ n gbɛɛ mu ka buɛ min dɔ tea a, wo a ma, n 'na buɔdia da ni fa gbɛ. Wo ma kuiɛ dɔndɔɛ ɔ, wo ko a ni dia wo nyɔn ye. Wo yiima ni ma dɔndɔ, kuiɛ kanɛ da faenɛ ɔ.

³ Wo ma ko ɔ ko ma, wo wandi ta tɔnɔnɛ ko a dechee. Wo ma yonka tɛ, wo wandi ɔ koa koe a. Chɛɛ wo wo wandi ma yii, wo ni mɔ dɔ mende n ya, a ben wo wandi gbu ma.

⁴ A sin, wo ma gbɔsɔɛ ni ma wo bɔɛ n ta faa ma koe n na, chɛɛ wo ta faa ma koe nu ma dechee.

⁵ Ni wo ma‑a ko ɔ ko ma‑a, wo sɔnɛ ma ka Chisɔsi Chasi ta fɛ.

⁶ A maen nin bɛɛ chia ɔ chia a yɔ Yataa, chɛɛ a nii ma butuin chɛ ni podon, min mbe a ma, an na kandenɛ ni ma tun, an fea Yataa a.

⁷ A‑a a kan kɔ sɔ wan a gbɛɛ a. A‑a a wandi ma yɔnɛ a. A na‑a kɛn mɔgbuya ɔ,

⁸ a‑a a wandi ma yii wan, mbɛ a‑a kooya be Yataa ma, aan a che a fa tima ma, kɔn gbengbandenɛ ma.

⁹ Chɛ an‑na a ma, Yataa‑a a ya, mbɛ a sɛ‑a basɔmaya dankama ɔ. Mbɛ a yɛ‑a, a‑a tɔɛ be a ma, min benden mu tɔ kan kɔ kan ma.

¹⁰ A sin, chɛ an mbe ma‑a, basɔmaya be koe a Chisɔsi tɔɛ chɛ ma. Fɔɛ fenɛ gbɛɛ, banda bu ɔ, ni duu gboo ma, dunya gbɛɛ ɔ, an mbe an kumbai gbangban‑da wan.

¹¹ An gbɛɛ, an ni a bɔ an da ɔ, an dɔ, Chisɔsi Chasi an mu mansa a. Chɛ an mbe na basɔmaya a, mmɔ Fa Yataa tena.

Pɔɔ ɔ te, mmɔ ni man yɔ tɔmbuaka nu

¹² N dia nyɔɛ nu, mmɔ bɛ ni tima min na, wo ni wan n da a kuiɛ ma. N mbe ee ka tima min na wo ya kɔɔ, a gbu nyin gbɛ sanche wan, wo ni ma n da a kuiɛ ma chɛndɛ chɛ. Wo ma yɛ kuu kɔ koe n ma koe a, miin ma biaen mu wo ko a, Yataa‑a wo wɛn baun. Wo an ma ma samba ɔ, wo an ma chiandia ɔ.

¹³ Koe min na mu, Yataa an mbe wai chɛ tena wo ɔ. A wan mbe a ma tena, wo ma bɛndenɛ ɛ kooya be koe a a ma. A sin, ɛ gbasaya chɛ wo ɔ, a faa ma koe ma koe a.

¹⁴ Wo ma tisa chɛ, wo sin ma gbonyɛ, ni wo ma‑a ko ɔ ko ma‑a.

¹⁵ Chɛ ɛ a ma‑a wan, tɛɛsi ee ma‑a wo ma, wo wɛn mu ka Yataa 'a denɛ n na. Wo tachɛ buɛ mɔ yama wa chɛ n tɛ ɔ, a ni nyan, a ma bɔ an ta a ɛnden bɛɛ a. Mabɔ ee ma‑a wo ma, mɔɛ chɛ n tɛ ɔ, miin dɔ chɛ chɛen mu, ko yama ma mɔ wa chɛ nu. Wo e man‑da wan an tɛ ɔ, yɔ tɔmbuaka n mbe man buɛ min dɔ pimbi ɔ.

¹⁶ Bai chɛ, min mbe fɔɛ be, wo a bia wo boo fea a. Chɛ an mbe a ma‑a Chasi na tee ma, n bu ɔ diama an mbe ma‑a, n kunɛ kɔɔ sɔenɛ ɛ, mbɛ n ma bui chɛ ni gbama a, n ma sɛchɛ chɛ ni gbama a, wo tɛ ɔ.

¹⁷ Wo e wo wandi be tena wan yɔ yasi, wai chɛ koe a Chasi ko a. Koe min na mu, wo‑a wo kai fa a a. N bu ɔ di, n sin mbe buɔdia bɔ‑a wan wo gbɛɛ a, an ni a ma wɛɛ, n wii ni bɔn, yɔ an mbe gbɛ bɔ buɛ min dɔ yasi a.

¹⁸ A chia dɔndɔ gbe chɛ a, wo wɛɛ, a ni ma koe a, min na di wo ye, a sin, wo ni buɔdia bɔ n na.

Pɔɔ ɛ Timoti sɔ‑a, an fea Ɛpafɔditɔsi a, Fiipai duu ɔ

¹⁹ Mansa Chisɔsi 'a gbasaya ɔ, n yii na tɛenɛ ni ma, mbɛ n fua‑a Timoti a na‑a wo tena. Chɛ ɛ a ma‑a wan, n ni sakana a min, a si wo ma, min mbe n bu ɔ dia‑a.

²⁰ Mɔ ee n boo ɔ, a ni che a ɔ, min ma bɛndenɛ ɛ che ma‑a, teaya ɔ, basan koe a wo ma.

²¹ Mɔɛ tɔɛ n gbɛɛ, an gbɔsɔen mu an faa ma koe n fan na, an ma an gbɔsɔ ni Chisɔsi Chasi ta ko a.

²² Chɛɛ wo wandi gbu, wo‑a a ɔ sɔn fan, ɛ buɛ min dɔ n tena. Ɛ wan n tena, yɔ denɛ n fea a fa a. Nn fea chɛ, nn‑na wai chɛ wan, sakana bai chɛndɛ chɛ ɔ yian koe a.

²³ Chɛ an fɛ mu, n yii na tɛen mu, a a na koe a wo tena, ni n‑na a ɔ yen dechee, koe min mbe na tena ma‑a n na.

²⁴ A sin, Mansa Chisɔsi‑a yiinatɛ be n ma, mbɛ a ɔ ee yansan tena to, mbɛ n fandi gbu na‑a wo tena.

²⁵ N‑na n yii na chii wan a a, mbɛ a nyin fan n ni Ɛpafɔditɔsi a yɛ to wo tena. N suun ma nyɔɛ an nɛ, n bɔ soya mɔɛ, n bɔ wai chɛ mɔɛ Chasi ko a. A sin, wo‑a an sɔ, basan koe a n ma nɛ.

²⁶ Koe min na mu, wo gbɛɛ, wo sɔɛ ɛ gbɛ a a kaka. A sin faa yɔndenɛ mu chɛ gbɛɛ a, a mu min na, wo na‑a a gbandi koe a min fan.

²⁷ Tea gbu sin ko a, a gbandi‑a wan kaka, ɛnden fan na‑a to a ni fa. Chɛɛ Yataa chinchin‑da wan a ma. A nii ma chinchin ni a dechee an ma, chɛɛ n fandi gbu wɛɛ, a ma na a ma faa yɔnɛ ni sa faa yɔnɛ kun ma.

²⁸ Chɛ an fɛ mu, n fan gbu sin faa bɔen mu kaka, n ni a sɔ wo tena. Chɛ ɛ a ma‑a wan, wo ni buɔdia bɔ, ni wo‑a a yen to. An mbe a ma‑a, faagbaa ma ni dɔɔya n ma.

²⁹ Wo bu ɔ ni dia, wo boo si koe a a kɔɔ, Mansa Chisɔsi tɔɛ ɔ. Wo sin ni basɔmaya be an mɔɛ chɛ sima ma.

³⁰ Koe min na mu, a‑a a wandi fɔɛ ma tachɛ wan, wo 'a wai a ban koe a n tena. A na‑a to fen den, a ni fa, Chasi 'a wai chɛ ko a.