GBOO DOMI KO A 7 - Yataa 'a Dɔbɛnɛ Nama

Pɔɔ ɛ fuu ɔ sawa ya‑a tɔmɔsi a

¹ N suun ma nyɔɛ nu Chasi ɔ, tea ko a, wo e a ɔ gbɛ‑a wan, n mbe na tena min fɔ‑a. Koe min na mu, sawa chɛ tana, wo gbɛɛ‑a a sɔn fan. Tima min na wɛ mɔ gbu ɛ fɔɛ ɔ, ɛ tun sawa chɛ an kɔɔ.

² A tɔmɔsi yen ko, min mu fuu musu a. Musu si sawa, ɛ an kɔɔ a chɛɛ tena, an mbe wɛ tima min na fɔɛ ɔ. Chɛɛ ni a chɛɛ fa‑a, mbɛ sawa chɛ‑a a boo ka musu chɛ ma fion a wandi ko a.

³ Chɛ an fɛ mu, a chɛɛ ɛ wɛ fɔɛ ɔ tima min na, a ee kai dɔ gbɛɛ sɔn. Ni a‑a chɛ ma, mɔɛ n mbe a chee ko tɛ musu an na. Chɛɛ sawa‑a min fɔ, ni a chɛɛ fa‑a, a ee to musu si sawa chɛ kɔɔ. Ni an musu chɛ‑a kai dɔ gbɛɛ sɔn, mɔɛ n mbe ee a chee ko tɛ musu a.

⁴ N suun ma nyɔɛ nu Chasi ɔ, wo wɛɛ ɛ ka wan. Sawa ta fɛ chia a, a maen fan mu dechee yɔ wo wɛɛ na‑a fa wan. Chasi‑a saya min chɛ, a‑a a ma yɔ wo wɛɛ fa‑a sawa tena. A sin sanche gbɛ, wo e Chasi an ko a, min kɔɔ sɔ‑a saya ɔ. Chɛ ma‑a, min mbe a ma, mmɔ ni gbɔɛ be Yataa ko a.

⁵ Tima min na mmɔ ni mmɔ kun ye, sawa chɛ na‑a mmɔ 'a ko yama n na kunɛ wan mmɔ ɔ, mmɔ gboo bankandenɛ ni miin ma koe a. A sin, mmɔ faa ma koe yama chɛ n fan‑na a ma, mbɛ saya‑a mmɔ boo kana bia.

⁶ A ni ma boo ɔ boo gbɛ sanche chɛ ɔ, mmɔ kunɛ bɔen fan mu gbɛ sawa chɛ boo ɔ. Koe min na mu, mmɔ fa‑a sawa ta fɛ chia a, min na‑a mmɔ bia pimbi chenɛ a. Mmɔ ee ma‑a to Yataa ko a, chia chɛ n na, sawa nyɛnden chɛ‑a min fɔ. Chɛɛ kuɔ fɔ ko a gbɛ, mmɔ ɛ ma‑a gbɛ chia nama an na, chia chɛ, Yataa Nyina‑a mmɔ sɔ min ma.

Pɔɔ ɔ te, ko yama ɛ bɔ sawa an dɔ

⁷ Mmɔ ɛ che gbɛ fen ko fɔ‑a? Mmɔ ee che a fɔ‑a, mbɛ sawa mu ko yama an na. A ee ka sima wɛ. Sawa chɛ an‑na a ma, n‑na a ɔ sɔn, ko yama mu fenɛ min na. Sawa na‑a a fɔɛ min chɛ, a ɔ, mɔ ee to i bɔɛ ta boo fenɛ a yama yama, an na‑a a ma, n‑na chɛ ɔ gbɛ.

⁸ Ko yama‑a a chenɛ sɔ sawa an na, mbɛ a kun‑da a ma koe a mɔɛ n boo fenɛ wakoe a dia‑a n ye kaka. Sawa ee kaina min, ko yama ee nɔ.

⁹ N fandi gbu wɛɛ, n ni wan fɔɛ ɔ tima min na, n nii ma sawa chɛ wakoe ɔ sɔn, a ɔ yian koe a n na, koe min ma nyin a ma koe a. Chɛɛ n‑na a ɔ sɔn kɛn, koe miin ma nyin an ma koe a, sawa chɛ ɔ, ko yama koa‑a n dɔ.

¹⁰ A sin, yɔ a fɔen mu buɛ min dɔ, a ma‑a wan yɔ n fa‑a. Sawa chɛ sin, min be‑a Mosisi ma, fɔɛ be koe a, a ma n kun bɔ ni saya boo ɔ.

¹¹ Sawa chɛ, ko yama‑a a chen sɔ an na, n bun koe a. Ko yama‑a sawa chɛ an ya, n fa koe a.

¹² Chɛ an fɛ mu gbɛ, Yataa wandi an ta mu sawa a. Sawa chɛ sin, Yataa an‑na a be. A sin, sawa chɛ ɛ a ɔ yian fan mɔ gbu ɛ koe miin ma, miin mu tea a. A yɛ to, ni koe miin nyin mɔ gbu ko a.

¹³ Chɛ ma a ɔ yian ni, mbɛ n mbe a fɔ tena wan, mbɛ fen chɛndɛ‑a a ma n fa‑a. Chɛ ma ma ni ɛnden bɛɛ a. Ko yama‑a a chen fan sɔ dechee ko chɛndɛ a, mbɛ a na‑a saya a n kun ma. Ko yama‑a chɛ ma, a ni kun a ɔ yian‑da mɔɛ n na, ɛ buɛ min dɔ a sɔnɛ gbu ɔ. Chɛ‑a a ɔ yian fan ka mmɔ a, mbɛ ko yama gbu ma chian‑da gbɛ a yama buɛ ɔ.

Pɔɔ ɔ te, mɔ gbu 'a ko yama‑a chɛɛ bun a wandi ma

¹⁴ Mmɔ gbu‑a a ɔ sɔn fan, mbɛ sawa sien mu Yataa an ma. Chɛɛ n tana, mɔ gbu gbama gbama mu n na, min mbe fa. N ma‑a gbɛ yɔ ko yama 'a yɔnɛ, n kooenɛ ɛ a ye.

¹⁵ N mbe ee a ɔ gbɛ, n mbe koe miin ma. Chɛ ɛ ma koe min na, n toen mu koe miin na, n mbe ee an fan ma. Chɛɛ n mbe min ma, n ma to ni koe miin na, n mbe an fan ma.

¹⁶ Ni n‑na ko yama n ma, n ma to ni miin ma koe a, chɛ ɛ a ɔ yian fan, mbɛ n dɔn‑da a ma, mbɛ sawa chɛ nyin fan.

¹⁷ Chɛ ɛ a yian fan, mbɛ n mbe ee n fandi boo ɔ, koe chɛ n ma koe a. Chɛɛ ko yama min mbe n faa ɔ, an mbe a ma tena n mbe an ma.

¹⁸ N‑na a ɔ sɔn fan, mbɛ mɔgbuya chɛ ɔ min ma nyin, ko chɛndɛ ma koe gbasaya, a ee n faa ɔ. Koe min na mu, n toen mu bɛɛ boo ɔ boo n ni ko chɛndɛ ma, chɛɛ n mbe ee che a ma‑a.

¹⁹ N mbe ee ko chɛndɛ ma, n toen mu n ni min ma. Chɛɛ min mbe ma, n mbe ko yama an ma, n ma to ni n ni min ma.

²⁰ Ni n‑na koe ma, n ma to ni n ni min ma, ɛ a ɔ yian fan, mbɛ n fandi an mbe ee a ma tena. Chɛɛ min mbe ma tena, ko yama min mbe n faa ɔ, an mbe a ma tena.

²¹ Mbɛ chɛ‑a a ɔ yian gbɛ n na, mbɛ ɛ ma tena ka wan n ta fɔɛ ɔ. N toen mu bɛɛ n ni ko chɛndɛ ma, koe min ma nyin a ma koe a, n mbe an ya a ma koe a.

²² N faa gbɛɛ ɔ, n bu ɔ di wan Yataa 'a sawa ko a.

²³ Chɛɛ n‑na a ɔ sɔn gbɛ n faa ɔ, mbɛ n mbe bea tena sawa dɔ gbɛɛ an fɛ. An sawa chɛ, ɛ butuinɛ chɛ tena wan sawa chɛ a, n toen mu min na n yiima ɔ. A‑a n ma yɔnɛ a, sawa chɛ boo ɔ, min mbe n yiima ɔ.

²⁴ N faa yɔnden mu a ɔ benden ba a. N toen mu mɔɛ a, min mbe che n bɔ‑a ko yama ma fɔɛ chɛ ɔ, min mbe a ma tena n mbe fa‑a.

²⁵ Yataa ɛn wai! A‑a a ma, mmɔ 'a mansa Chisɔsi Chasi‑a n kun bɔ a ɔ. Chɛ an fɛ mu, n ma buɛ ɛ gbɛ ka wan. N mbe bea tena wan Yataa 'a sawa n fɛ n yiima gbɛɛ a. Chɛɛ yɔnɛ mu n na, ko yama 'a gbasaya kɔɔ, mɔgbuya ɔ min ma nyin.