GBOO DOMI KO A 6 - Yataa 'a Dɔbɛnɛ Nama

Pɔɔ ɔ te, mmɔ ɛ Chasi 'a fɔɛ an dɔ sanche

¹ Mmɔ ɛ fen fɔ‑a gbɛ? Mmɔ ee kun to a fɔ‑a, mbɛ mmɔ ni a a tun ko yama ma koe a, min mbe a ma, Yataa ni a 'a ko chɛndɛ ma munda mmɔ tena.

² Tea ko a, chɛ ee ma. Ni ko yama ma koe mu to, mbɛ mmɔ faenɛ mu gbɛ. Mmɔ ee kun to ma‑a fɔɛ ɔ, mmɔ ɛ ta‑a ko yama ma‑a tun tun.

³ Koe min na mu, a nyin wo ni chɛ ɔ sɔn tea ko a. Mbɛ yii chɛ‑a wan mmɔ kunɛ ɔ Yataa chia a, mmɔ ma koe a mɔ dɔndɔɛ a Chisɔsi Chasi a. Yii chɛ sin chɛ‑a kɛn mmɔ kunɛ ɔ Yataa chia a, a ma‑a wan yɔ mbɛ Chisɔsi 'a saya ma‑a mmɔ 'a saya a.

⁴ Yii chɛ min chɛ‑a ka mmɔ kunɛ ɔ Yataa chia a, a‑a a ɔ yian fan ka, mbɛ mmɔ bɛ fa‑a, a yɛ to, mmɔ bɛ tɔn‑da Chisɔsi a. Chɛ an mbe a ma, yɔ Yataa 'a kamaya gbasaya na‑a Chasi kɔɔ sɔ buɛ min dɔ, a ka saya ɔ, mmɔ wɛɛ ni ma fɔɛ nama ɔ, a chia dɔndɔ gbe chɛ a.

⁵ Chasi fa min chɛ‑a, mmɔ wɛɛ, a ma‑a wan mmɔ 'a saya a, kɛn yii chɛ‑a mmɔ kunɛ ɔ Yataa chia a. Chasi a sɔ‑a buɛ min dɔ a ka saya ɔ, a chia dɔndɔ gbe a mu, Yataa ɛ mmɔ wɛɛ kɔɔ sɔ‑a a ka saya ɔ.

⁶ Mmɔ‑a a ɔ sɔn fan, mbɛ Chisɔsi ni gbangban tena tima min na kɔn gbengbanden chɛ ma, mmɔ sɔn kɔma n bɛɛ gbangban‑da wan a ma. Chɛ ma‑a min mbe a ma, Yataa ni mmɔ sɔn kɔma n bɔ mmɔ faa n dɔ. Chɛ ɛ a ma‑a wan, mmɔ ee ma‑a to yɔnɛ n na mmɔ 'a ko yama n boo ɔ.

⁷ A mu min na, ni mɔ gbu fa‑a, a kun ka‑a, ko yama 'a gbasaya ee to a kun ma.

⁸ Ni a na‑a ma wan, yɔ a ma‑a buɛ min dɔ, mbɛ mmɔ bɛ an na‑a fa dɔndɔ a Chasi a, mmɔ ɛ dan fan a a, mmɔ bɛ ɛ ma‑a wan fɔɛ ɔ.

⁹ Koe min na mu, mmɔ‑a a ɔ sɔn fan, mbɛ Chasi a sɔ‑a wan a ka saya ɔ. A sin, gbasaya ee to saya boo ɔ a kun ma, fa koe a to.

¹⁰ A na‑a saya min chɛ ka, mmɔ 'a ko yama ko a, ko yama 'a gbasaya ee to a kun ma kuɔ fɔ ko a. Ɛ ka gbɛ fɔɛ min dɔ, fɔɛ mu Yataa ko a.

¹¹ A chia dɔndɔ gbe chɛ a, wo wɛɛ ni wo wandi ya gbɛ mɔ faenɛ n na, ko yama 'a gbasaya ee to wo kun ma. Chɛɛ wo e gbɛ fɔɛ min dɔ, wo e Yataa an ko a, mɔ dɔndɔɛ mu gbɛ wo a Chisɔsi Chasi a.

¹² Wo ma dɔn to, ko yama ni gbasaya sɔn wo kun ma wo 'a mɔgbuya ɔ, min mbe danka dunya ma. Mɔgbuya chɛ ɔ, wo ma bea wo faa ma koe yama n fɛ.

¹³ Wo sin gbu ma wo wandi be chia ɔ chia a ko yama ma, wo ma wo boo chɛ ko yama n dɔ. Chɛɛ wo e min ma, wo wo wandi be Yataa ma. Wo a ma yɔ mɔɛ nu, miin‑na fɔɛ ma sɔn, a ka saya ɔ. Wo wo wandi gbɛɛ be a ma, a ma koe a wo ni tea koe n ma.

¹⁴ Wo ma dɔn to ko yama ni gbasaya sɔn wo kun ma. Wo ee sawa chɛ an kɔɔ, chɛɛ wo e Yataa 'a koadia demanɛ an kɔɔ.

Pɔɔ ɔ te, mmɔ ni tea koe ma chia ɔ chia a

¹⁵ Mmɔ ɛ fen ma gbɛ? Sawa an mbe ee wai tena to mmɔ a, chɛɛ Yataa 'a ko chɛndɛ an mbe gbɛ wai tena mmɔ a. Mmɔ ee che to a a tun‑da ko yama ma koe a.

¹⁶ Mmɔ‑a a ɔ sɔn fan, mbɛ ni mmɔ‑a mmɔ wandi gbɛɛ be fen kɔ fen ma, mmɔ ma‑a a fen chɛ 'a yɔnɛ a. Ni mmɔ ma‑a ko yama 'a yɔnɛ a, a gbaa chia a mu saya an na. Chɛɛ ni mmɔ‑a kooya be Yataa ma, ɛ mmɔ ya‑a wan mɔ tandenɛ n na.

¹⁷ Wo ni tee yɔnɛ n fan na, wo 'a ko yama n boo ɔ. Chɛɛ n mbe Yataa wai bɔ wan gbɛ wo ko a. Koe min na mu, wo‑a kooya be wo faa gbɛɛ a, wo‑a a be tea chɛ a min koe a, min mbe kan chɛ ɔ, Yataa‑a wo don kanɛ min kɔɔ.

¹⁸ Wo na‑a kunka ma sɔn fan, a bɔ ko yama 'a yɔncha ɔ. Mbɛ wo don‑da Yataa ta yɔncha ɔ, min mu tea ko ma a.

¹⁹ N mbe koɔ tena ka, wo ni a ɔ gbɛ chɛndɛ chɛ, koe min na mu, mɔgbuya gboo ɔ faen fan mu koe ɔ gbɛ koe a. Wo na‑a wo wandi be wan gbae a saa a, ma koe a yɔnɛ a ko tɛ boo ɔ, a basan ko yama sɛsɛ n na. Wo yii ma koe yama n fan ni a ma wo ni ka. Sanche chɛ ɔ, wo wo wandi be gbae, ma koe a yɔnɛ a, tea koe ma koe a, wo ni ma tenchen Yataa ko a.

²⁰ Wo ni tima min na yɔnɛ n na wo 'a ko yama n kɔɔ, a nii ma din ni wo ma Yataa faa ma koe n ma koe a.

²¹ Wo na‑a tɔnɔnɛ minan sɔn a ɔ? Tea ko a, wo nii ma tɔnɔn kan kɔ kan sɔn ni an koe chɛ n dɔ. An koe n mu ka sanche maumaya koe n na wo tena. Saya an bɔ‑a a koe n dɔ.

²² Chɛɛ sanche chɛ ɔ, wo kun bɔ‑a wo 'a ko yama n dɔ, wo ma‑a gbɛ Yataa 'a yɔnɛ n na. Wo 'a fɔɛ chɛ ɔ gbɛ, wo e gbɛ tenchen Yataa an ko a. Chɛ sin tɔnɔnɛ mu kuɔ fɔ fɔɛ an na wo ko a.

²³ Ko yama tana, saya an mu a tɔnɔnɛ a, a wandi ɛ na min na. Chɛɛ Yataa ɛ min be mmɔ ma gbama gbama a, an nɛ kuɔ fɔ fɔɛ a. Chɛ ɛ ma wan, koe min na mu, mmɔ ma‑a mɔ dɔndɔɛ a Chisɔsi Chasi a, mmɔ 'a mansa.