GBOO DOMI KO A 3 - Yataa 'a Dɔbɛnɛ Nama

¹ Mɔɛ dɔ n mbe tisa chɛ wan, ni ma koe a Chu mɔɛ a, ni tɔnɔnɛ ɛ wan a ɔ, a ben ma koe a mɔɛ a, min ma Chu mɔ a. Chɛ ma, ni tɔnɔn kan kɔ kan mbe wan a ɔ, mɔ gbu a kamincha koe a.

² Ma koe a Chu mɔɛ a, tɔnɔnɛ gbu an kɔkoo a ɔ chia sɛsɛ a. A saa mu min na, an nɛ, Yataa na‑a a 'a sakana bai gbɛɛ fɔ an fan ye.

³ Tea mu a a, mbɛ Chu mɔɛ dɔ n nii ma dan ni sakana bai chɛ a. Chɛɛ chɛ ma a ɔ yian ni, mbɛ Yataa ɛ a da a kuiɛ ka‑a wan a gba ɔ, koe min na mu, an dɔ n‑na chɛ ma.

⁴ A an, chɛ ma ma wo 'a yiinachii ɔ. Mɔ gbu da a kuiɛ ma funka nin bɛɛ boo ɔ boo tima ɔ tima ko a, chɛɛ Yataa tana, ɛ a da a kuiɛ to wan a ma. A sin, a 'a gboo‑a a fɔ ka wan, a si Yataa wandi ma, a ɔ, “Ni a koɔ‑a tima ɔ tima, mɔɛ gbɛɛ‑a a ɔ yen fan, mbɛ a teaen fan mu. A sin to, mɔɛ min mbe kunɛ si‑a a kun ma, ni a koɔ‑a dechee, fanka ee ma‑a to a mɔɛ chɛ da a kuiɛ a, a mu min na, Yataa gbu ma ko yama ma ni.”

⁵ Chɛɛ a yen ko, ni mɔɛ n‑na ko yama ma, a tima a mu mɔ dɔ mende n mbe a yen gbadan, Yataa ɛ ko chɛndɛ min ma. Chɛɛ chɛ tɛ bɔ buɛ ɛ wan nɔ. Mɔɛ dɔ nu, an mbe a fɔ wan gbu, mbɛ Yataa ee tea ko ma, ɛ ma ka mmɔ tɔɔya min chɛ‑a mmɔ 'a ko yama n ko a. (Chɛɛ n mbe ka koɔ tena dechee, yɔ mɔgbuya ɛ a tasi buɛ min dɔ tima dɔsa a).

⁶ Chɛɛ a gbu ee ka chia kan kɔ kan na. Ni Yataa ee tea ko ma, a ee che‑a kaa a tɛ‑a mɔɛ gbɛɛ a ko yama ma dunya chɛ ɔ.

⁷ Chɛɛ a yen ko, mbɛ nn 'na fania fɔɛ, ɛ a ma‑a mɔɛ n ni Yataa 'a tea fɔɛ ɔ yen. Nn ma chia yen ni to, min mbe a ma, Yataa ɛ a ma nn mbe tɔɔya, ko yama ma koe a.

⁸ Ni tea mu chɛ a, mbɛ mɔɛ dɔ n mbe a fɔ‑a wan gbɛ, an dɔ, “Mmɔ ko yama ma, min mbe a ma, ko chɛndɛ ni bɔ a ɔ.” Mɔɛ dɔ n‑na kun chɛ an si n kun ma, mbɛ n fan, n‑na chɛ an fɔ chinɛn, mbɛ an‑na n main a ko a. Chɛɛ mɔɛ miin mbe chɛ fɔ tena, an fandi an mbe tɔɔya ɔ fai tena Yataa ma.

Pɔɔ ɔ te, mɔ gbu gbɛɛ sɔnɛ a ma ko ni Yataa tena

⁹ Chɛ ee a ɔ yian tena gbɛ, mbɛ nn fan Chu mɔɛ n tana, nn fisa wan Yataa chen kɔɔ, a ben mɔ dɔ gbɛɛ chɛ n ma. A ee ka ɛnden bɛɛ a. A mu min na, nn ban‑da a ɔ yian‑da, mbɛ mɔɛ gbɛɛ mu ko yama ma mɔɛ an na. Chu mɔ ta ma ka ni chɛ ma, mɔɛ miin ma Chu mɔɛ n na, an ta ma ka ni chɛ ma.

¹⁰ Ɛ wan yɔ Yataa 'a gboo‑a a fɔ buɛ min dɔ, a ɔ, “Mɔ dɔndɔ wɛɛ ee nɔ, min tanden mu Yataa chen kɔɔ.

¹¹ Mɔ ɔ mɔ ee nɔ, min‑na a ɔ gbɛ fen mu tea koe a, mɔ ɔ mɔ sin mbe ee nɔ, min mbe chia yan tena, ma koe a an fea Yataa a.

¹² Mɔ gbu n gbɛɛ, an‑na an kan kɔ sɔ Yataa a, an gbɛɛ sɔ‑a chia yama ma, an dɔndɔ wɛɛ ee nɔ, min mbe koe ma tena, min nyin.

¹³ An da a bai n mbe mɔɛ n kasaa wan. An 'na kana nɛnɛn chɛ n na, tea ee bɔ an da an dɔ. An da a bai n mu ka kona an na, miin mbe mɔɛ n fa.

¹⁴ Tima ɔ tima ko a, an mbe an bɔ n danka wan, faamɔnɛ ɔ.

¹⁵ A ɔ wuu an boo ɔ, mɔɛ tɔɔya koe a, mbɛ an‑na a fa.

¹⁶ Ni an ta‑a kan kɔ kan, tɔɔya basan kasaa a, an fan mbe ma nɔ.

¹⁷ An tana, an ma chia sɔn, a ma koe a an ni ma faachima ɔ mɔ dɔ mende n na,

¹⁸ n mbe ee baa a chianɛ sima wɛɛ ni ma an dɔ Yataa ko a.”

¹⁹ Mmɔ‑a a ɔ sɔn gbɛ sanche, mbɛ sawa chɛ‑a min gbɛɛ fɔ, a sien mu chɛ n fan ma, miin mbe sawa gbu kɔɔ. An mbe a ma, an mbe ee kafai kan kɔ kan be ko yama ma koe a. A sin to, ɛ a ma‑a wan Yataa ni kaa a tɛ, a si mmɔ gbɛɛ a ko yama ma.

²⁰ Koe min na mu, ni mɔɛ toen mu Yataa ni a ya mɔ tandenɛ a, sawa a tachɛ koe a gbee a, an mbe ee a ma chɛ ni ma. Chɛɛ sawa chɛ ɛ koe min ma, ɛ a ma wan mɔɛ n ni a ɔ sɔn, mbɛ ko yama ma mɔɛ mu mmɔ a.

Pɔɔ ɛ a ɔ yian‑da, mmɔ ɛ tan buɛ min dɔ, Yataa tena

²¹ Chɛɛ sanche chɛ ɔ, Yataa ban‑da a ɔ yian‑da mmɔ a, a ta chia mu min na, mmɔ ma koe a mɔ tandenɛ n na, a chen kɔɔ. A sin, a ta chia chɛ ma a fɔ ni, mbɛ mɔɛ ɛ koe chɛ an ma dechee, sawa‑a min fɔ a ma koe a. Yataa‑a sawa min na ben Mosisi a, a basan Yataa 'a gbonka chɛ mɔɛ n na, an‑na siiya bɔ wan chɛ ma.

²² Yataa ɛ mmɔ ya wan mɔ tandenɛ n na a chen kɔɔ, ni mmɔ‑a mmɔ kai fa Chisɔsi Chasi a. Yataa ɛ chɛ ma wan mɔ ɔ mɔ ko a, min kai faen mu Chisɔsi a. Koe min na mu, a ni ma Chu mɔ a, a ma ma Chu mɔ a, Yataa ɛ mɔɛ gbɛɛ bia dɔndɔ gbe.

²³ A mu min na, mɔ gbu gbɛɛ‑a ko yama ma, a sin, mɔ gbu gbɛɛ ma bɔ ni Yataa faa ma chia a, an sɔnɛ n bɛɛ ka‑a Yataa ta fɛ.

²⁴ Chɛɛ Yataa 'a chinchimaya an‑na a ma, a‑a mmɔ ya mɔ tandenɛ n na a chen kɔɔ. Ko kan kɔ kan dɔ gbɛɛ an ma a ma ni, a ni chɛ ma. A‑a chɛ ma koe min na, Chisɔsi Chasi‑a mmɔ kun ka wan mmɔ 'a ko yama n dɔ.

²⁵ Yataa na‑a an be fa koe a mmɔ 'a ko yama n ko a. A 'a saya chɛ ni a ma, mɔ gbu ni kunka ma sɔn ko yama ɔ. A wii min sin bɔn‑da ka mɔ gbu gbɛɛ ko a, mɔɛ miin mbe an kai fa‑a a a, Yataa ɛ a boo bɔ‑a wan an 'na ko yama n dɔ. Yataa‑a chɛ ma, a ni a ɔ yian, mbɛ a wan mbe mɔ gbu ya mɔ tandenɛ a. A kɔma a, Yataa na‑a a faa bia wan, mbɛ a‑a a ya ka mɔɛ n 'na ko yama n na.

²⁶ Chɛɛ sanche chɛ ɔ gbɛ, a ee a ya ka tena to mɔɛ n 'na ko yama n na. Chɛɛ ɛ a ɔ yian tena wan, mbɛ a wan mbe mɔ gbu ya dechee mɔ tandenɛ a. Ɛ ka a ɔ yian tena wan, mbɛ a wandi gbu tanden fan mu. A sin, ɛ mɔ ɔ mɔ ya wan mɔ tandenɛ a, mɔɛ min mbe i kai fa‑a Chisɔsi a.

²⁷ Chɛ an fɛ mu, mmɔ 'a yonkatɛ gbu kun mbe ee to. Koe min na mu, mmɔ ɛ bea min chɛ sawa chɛ fɛ, an mbe ee a ma, mmɔ ni ya mɔ tandenɛ n na Yataa chen kɔɔ. Chɛɛ mmɔ ɛ mmɔ kai min fa ka dechee Chisɔsi a, an mbe a ma, mmɔ ɛ ya mɔ tandenɛ a.

²⁸ Mbɛ mmɔ‑a a ɔ yen gbɛ, mbɛ Yataa ɛ mmɔ ya dechee mɔ tandenɛ n na, ni mmɔ‑a mmɔ kai fa Chisɔsi a. Chɛɛ mmɔ ɛ bea min chɛ ka sawa chɛ fɛ, an mbe ee a ma, mmɔ ni ya mɔ tandenɛ n na.

²⁹ Yataa ee dechee Chu mɔɛ n fan ko a, ɛ wan mɔɛ chɛ n bɛɛ ko a, miin ma Chu mɔɛ n na. Ɛ ka wan tea gbu a.

³⁰ Yataa ɛ dɔndɔ gbe, a sin, Chu mɔɛ nu, ni miin ma Chu mɔɛ n na, ɛ an ma‑a wan mmɔ tandenɛ n na a chen kɔɔ. Chɛ ɛ bɔ‑a an 'na kaifa an dɔ Chisɔsi a.

³¹ Chɛ ma a ɔ yian ni chia kan kɔ kan na, mbɛ ni mmɔ‑a mmɔ kai fa Chisɔsi a, mmɔ ɛ mmɔ boo bɔ wan gbɛ sawa chɛ kɔɔ. Chɛɛ mmɔ‑a min ma, mmɔ‑a sawa gbu an kɔ gbɛa ka gbɛ chɛndɛ chɛ.