GBOO DOMI KO A 16 - Yataa 'a Dɔbɛnɛ Nama

Pɔɔ ɛ kɔndɔnɛ a ta‑a Chisianɛ dɔ n tena Domi duu ɔ

¹ N toen mu n ni a ɔ yian wo a, mbɛ mmɔ tensa musu min tɔ mu Fɔibe, min bɛɛ kai faen mu Chisɔsi Chasi a, mbɛ mɔ chɛndɛ wa mu a a. Ɛ demanɛ chɛ chɔchi chɛ an dɔ pan Sɛnkea duu ɔ.

² Wo wo boo si a kɔɔ chɛndɛ chɛ, yɔ Yataa 'a mɔɛ n mbe an nyɔn bia buɛ min dɔ. A sin, ni a toen mu basɔmaya kan kɔ kan na, wo a chɛ a a. Koe min na mu, a‑a ko chɛndɛ ma wan mɔ sɛsɛ a, a basan n bɛɛ a.

³ N bɔ wai chɛ mɔɛ chɛ nu Chisɔsi ye, Pisida an fea Akuida a, n mbe an kɔndɔn tena kaka.

⁴ An ma chian ni an fɔɛ ko a, n bakoe a. An 'na wai bɔɛ ɛ wan n da a tima ɔ tima ko a. N dechee an mbe ee an wai bɔ tena, chɛɛ mɔɛ chɛ n bɛɛ miin ma ka Chu mɔ a, an 'na chɔchi n gbɛɛ.

⁵ N mbe chɔchi mɔɛ chɛ n bɛɛ kɔndɔn tena, miin mbe bɛn n bɔɛ chɛ n na chenɛ a. N mbe n dia nyɔɛ Ɛpainɛtɔsi kɔndɔn tena. An mu mɔɛ saa saa a Esia chɛnyɛ chɛ ɔ, min‑na a kai fa Chisɔsi Chasi a.

⁶ N mbe Mɛi wɛɛ kɔndɔn tena, min bɛɛ‑a wai chɛ wo ko a a sɔɛ gbɛɛ a.

⁷ Andɔnikɔsi an fea Chunia, n mbe an bɛɛ kɔndɔn tena. N bɔ Chu mɔɛ n fan nɛ, nn bɛ ni miin na pimbi chenɛ a. Chisɔsi 'a sɔ mɔɛ nu, an‑na an sɔn fan chɛndɛ chɛ. An sin pɛn pɛn na‑a an kai fa Chisɔsi Chasi a, n ya ɔ.

⁸ N mbe Ampiatɔsi wɛɛ kɔndɔn tena. N dia nyɔ chɛndɛ an nɛ, koe min na mu, a kai faen mu Mansa Chisɔsi a.

⁹ N mbe Wubanɔsi wɛɛ kɔndɔn tena. A wɛɛ mu mmɔ bɔ wai chɛ mɔɛ dɔndɔ an na Chisɔsi Chasi ye. N mbe n dia nyɔɛ chɛndɛ chɛ wɛɛ kɔndɔn tena, min mu Sitakisi a.

¹⁰ N mbe Apɛdesi wɛɛ kɔndɔn tena. A‑a a ɔ yian fan a sɔnɛ ɔ, mbɛ ɛ Chisɔsi an ko a gbu. N mbe mɔɛ chɛ n bɛɛ kɔndɔn tena, miin mbe Ayisɔbudɔsi 'a chenɛ a.

¹¹ N bɔ Chu mɔɛ chɛ wɛɛ, Ɛdɔdiɔn, n mbe a kɔndɔn tena. Chisian chɛ n gbɛɛ, miin mbe Nasisɔsi 'a chenɛ a, n mbe an kɔndɔn tena.

¹² N mbe Tifaina ni Tifosa n kɔndɔn tena. An mbe wai chɛ tena an sɔɛ a Mansa Chisɔsi an ye. N ni n dia nyɔɛ chɛ wɛɛ kɔndɔn min mu Pasisi a. A wɛɛ‑a wai chɛ wan a sɔɛ a Mansa Chisɔsi ye.

¹³ N mbe Dufɔsi wɛɛ kɔndɔn‑da. Mansa Chisɔsi fɛ mɔɛ gbau gbau wa mu a a. A de wɛɛ, ɛ n bia wan tima ɔ tima yɔ a 'a denɛ. N mbe a kɔndɔn tena.

¹⁴ N mbe mɔɛ chɛ n gbɛɛ kɔndɔn tena. An fan nɛ, Asinkitɔsi, Fɛkon, Amesi, Patɔbasi ni Amasi, an bɛ Chisianɛ tɔɛ n gbɛɛ a, an bɛ ɛ miin na.

¹⁵ N mbe Fidɔɔkɔsi kɔndɔn tena, an fea Chudia a. N ni Neyɛɔsi kɔndɔn, an fea a tensa musu a. Mbɛ n‑na Wɔdimpasi kɔndɔn, a basan Yataa 'a mɔɛ n gbɛɛ a, an bɛ ɛ miin na.

¹⁶ Ni wo bɛn‑da, mbɛ wo‑a wo nyɔn kɔndɔn koadia faa a. Chisian chɛ n gbɛɛ chɔchi tɔɛ chɛ n dɔ, an mbe wo gbɛɛ kɔndɔn tena ka.

Pɔɔ ɛ koɔ‑a Chisianɛ n tena Domi duu ɔ, an mbe koe min ma

¹⁷ N bɔ Chisianɛ nu, n mbe wo disa tena wo ni wo kun ma fɛn mɔɛ chɛ n boo ɔ. Mɔɛ chɛ nu, miin mbe mɔɛ n dɔ fasan, an mbe sɔnkɔ sɔnkɔɛ a bea an tɛ ɔ. Mɔɛ chɛ nu, miin mbe an bɔɛ n ka tea chia ma. A yɛ to, wo kan‑da ko chɛndɛ miin ma, an mɔɛ chɛ n mbe wo kan ko dɔ gbɛɛ n na, miin mbe ee a chia ma. Wo ma gbɛn an mɔ bonda chɛ n ma.

¹⁸ A mu min na, an mɔɛ chɛ nu miin mbe ko bonda chɛ n ma, an mbe ee ma ka mmɔ 'a mansa Chisɔsi 'a wai an chɛ‑a. An gbɔsɔen mu dechee an faa ma koe n fan ko a. An da ɔ di, an sin mbe mɔɛ n yii a faa faa wan bai sɛsɛ a, mɔɛ miin woo koe ma gbɛ, mbɛ an‑na an bun.

¹⁹ Mɔ ɔ mɔ‑a a min fan, wo kooen mu buɛ min dɔ Mansa Chisɔsi tena. Chɛ gbu sin‑na a ma, n bu ɔ dia‑a wo ko a kaka. N toen mu, fen kɔ fen min nyin, wo 'a yiimatɛ ni koa an ma koe a. Chɛɛ ko ɔ ko min yau, a yiima gbu ma ma wo ɔ a ma koe a.

²⁰ A sin dɔ ee yansan tena to, Yataa min mbe faachima be mmɔ ma, mbɛ a kun‑da Sitana ma wo ko a. Mansa Chisɔsi ni wo dua.

²¹ Timoti, nn fea ɛ wai chɛ min na, a‑a wo kɔndɔn ka. N bɔɛ Chu mɔɛ chɛ n bɛɛ, Dusiɔsi, ni Chason, ni Sosipata, an‑na wo kɔndɔn ka.

²² N fan, Tatiɔsi, n fɛn‑na Pɔɔ da a bai chɛ n nyɛn gboo chɛ ɔ, n bɛɛ n mbe wo kɔndɔn tena kaka, Chisian chia a.

^23-24 N mbe mɔɛ min bɛɛ 'a sondaya a, chɔchi ɛ si to nɛ an 'na chenɛ a, kai Kayɔsi, ɛ wo kɔndɔn tena ka. Ɛyasitɔsi wɛɛ, min mbe kɔpɔɛ sa tena ɔ bɛn duu chɛ ko a, an fea mmɔ bɔɛ Chisianɛ Kuatɔsi a, an mbe wo kɔndɔn tena ka.

Pɔɔ ɛ Yataa tando‑a

²⁵ Mmɔ tando be Yataa ma. A wan mbe kun a ma‑a mmɔ gboo ɔ ee fa‑a, dan koe a a a. N mbe chɛ an fɔ wo ye, n mbe ma sakana bai chɛndɛ chɛ ɔ yian‑da wo a, a si Chisɔsi Chasi ma. A sin fɔen mu ka wan ko ɔ nunden chɛ wɛɛ ɔ, min na bɔ‑a ya a ma. An tea ɔ nunden chɛ, Yataa nii ma a ma ni mɔ gbu ni fua min dɔ sɔn‑da san sɛsɛ sɛsɛ ko a suun.

²⁶ Chɛɛ sanche gbɛ, Yataa 'a gbonka chɛ mɔɛ chɛ n‑na fenɛ miin nyɛn Yataa 'a gboo ɔ, a‑a a ma wan mɔ sɛsɛ n‑na tea ko ɔ nunden chɛ ɔ sɔn. A sin, mɔɛ gbɛɛ dunya ma, an‑na an ko ɔ nunden chɛ ɔ sɔn gbɛ. Yataa Mansa, min mbe kuɔ fɔ fɔɛ be, an‑na chɛ ma, min mbe a ma, mɔɛ n ni an kai fa a a, mbɛ an‑na kooya be a ma.

²⁷ Mmɔ Yataa tando kuɔ fɔ ko a. An mu dechee yiimatɛ koaenɛ dɛgbɛ ɛ min dɔ, a ni ben fen kɔ fen ma. Dua ni ma a tɔɛ ma, kuɔ fɔ ko a, Chisɔsi Chasi 'a gbasaya ɔ. A ni ma ka.