GBOO DOMI KO A 14 - Yataa 'a Dɔbɛnɛ Nama

Pɔɔ ɔ te, wo ma kaa a tɛ, wo bɔ Chisianɛ n ni tɔɔya

¹ Wo wo boo a si wo bɔɛ chɛ n kɔɔ, wo tɛ ɔ, miin 'na Chisian danaya ɔ ma gbɛ. Chɛɛ wo ma wo da a kuiɛ ɔ fan an na, a si koe n ma, miin nyin an ma koe a an boo ɔ, a basan miin ma nyin an ma koe a.

² Mɔɛ dɔ nu, miin 'na Chisian danaya ɔ gbɛ, an daun fen tɛ bɔ kan kɔ kan mbe ee. Chɛɛ mɔɛ dɔ nu, miin 'na Chisian danaya ɔ ma gbɛ, an mbe chin fenɛ dechee an daun.

³ Mɔɛ chɛ nu, miin daun fen tɛ bɔɛ ee, an ma an kunɛ dɛn chɛ n kun ma, miin mbe an daun fenɛ tɛ bɔ. Mɔɛ chɛ n bɛɛ to, miin mbe an daun fenɛ tɛ bɔ, an ma kaa a tɛ, an ni a fɔ, mbɛ miin mbe ee an daun fen tɛ bɔ, an mbe ko yama an ma ka. Koe min na mu, Yataa ma a boo bɔ ni an mɔɛ chɛ n kɔɔ, miin daun fen tɛ bɔ ee ka.

⁴ Yataa 'a yɔnɛ n fan nɛ, i wan ta ma an na. Gbasaya kan kɔ kan mbe ee i boo ɔ, kaa a tɛ koe a mɔ dɔ mende a yɔnɛ sɔnɛ ma. Gbasaya ɛ an yɔnɛ chɛ kun ti an boo ɔ, kaa a tɛ koe a a sɔn chɛndɛ ma, a basan a yama a. A sin, an yɔnɛ chɛ chenɛ ɛ sɔ‑a wan gban, koe min na mu, Mansa Yataa an mbe a ma‑a a ni sɔ.

⁵ A yɛ to, ɛ ma wan mɔɛ dɔ n yii ma, mbɛ tee ɛ wan nɔ, min benden mu tee tɔɛ gbɛɛ ma Yataa tena. Chɛɛ mɔɛ dɔ n ta yiima ɔ, tee gbɛɛ a kanden fan mu, dɔndɔ wɛɛ ma ben ni a nyɔn ma. Mɔɛ si tena fea chɛ n tɛ ɔ, mɔ ɔ mɔ ni yiinachii chɛ a wandi ko a.

⁶ An mɔɛ chɛ nu, miin mbe a ma tena, mbɛ tee ɛ wan nɔ, min mu tee wa a, an mɔɛ chɛ n mbe chɛ ma tena Mansa Yataa 'a basɔmaya an ko a. Mɔɛ chɛ nu, miin daun fen tɛ bɔ ee, an bɛɛ an mbe ma ka chɛ ma‑a Mansa Yataa 'a basɔmaya an ko a. Koe min na mu, daun fenɛ kan kɔ kan, an ni ma a daun‑da, an mbe Yataa wai bɔ pɛn, a be koe a an ma. Mɔɛ chɛ n bɛɛ, miin mbe an daun fenɛ tɛ bɔ, an bɛɛ ɛ ma ka basɔmaya be‑a Mansa Yataa an ma. Koe min na mu, an mbe ma ban‑da daun fen kan kɔ kan dɔ, an mbe Yataa wai bɔ wan, a ma koe a an ni ban a ɔ.

⁷ Mmɔ dɔndɔ wɛɛ ma ma ben‑da, mmɔ kun ye. A yɛ to, fɔɛ chɛ ɔ, mmɔ dɔndɔ wɛɛ ma fa mmɔ kun ye.

⁸ Ni mmɔ ma‑a fɔɛ chɛ ɔ, mmɔ ni ma ɔ Mansa Yataa ko a. Ni mmɔ fa‑a wɛɛ tima min na, mmɔ ni fa Mansa Yataa 'a gbee a. Chɛ an‑na a fɔ, mmɔ fɔɛ chɛ ni ma mmɔ ɔ, chɛ ma, mmɔ ni fa wan, Mansa Yataa an ta mu mmɔ a.

⁹ Koe min na mu, Chisɔsi Chasi fa‑a wan, mbɛ a‑a a kɔɔ sɔ a ka saya ɔ. Chɛ na‑a ma, min mbe a ma, a ni ma mansa a mmɔ gbɛɛ ko a, mmɔ wan chɛndɛ ba nu, mmɔ bɛ fuɛ n na.

¹⁰ Wo dɔ nu, wo ma kaa a tɛ, wo bɔ Chisianɛ n ma, ko yama ma koe a. A sin to, wo dɔ n bɛɛ, wo ma wo kunɛ dɛn wo bɔ Chisianɛ n kun ma. Koe min na mu, mmɔ gbɛɛ, mmɔ ɛ sɔ‑a wan Yataa chen kɔɔ tee dankama tee ma, a ni kaa a tɛ mmɔ wakoe ma.

¹¹ Koe min na mu, a nyɛnden fan mu Yataa 'a gboo ɔ, mbɛ Mansa Yataa ɔ te, ɛ ka buɛ min dɔ fɔɛ a fɛ‑a, mɔɛ gbɛɛ, mmɔ ɛ mmɔ kumbai gbangban‑da wan a chen kɔɔ. A sin, mɔɛ gbɛɛ, an mbe a fɔ‑a wan, mbɛ a wan mu Yataa a.

¹² Chɛ an fɛ mu, mmɔ gbɛɛ, dɔndɔ, dɔndɔɛ a, mmɔ ɛ a ɔ yian‑da wan Yataa a, mmɔ ɛ wai min chɛ‑a dunya chɛ ɔ.

Pɔɔ ɔ te, wo ma a ma wo bɔɛ Chisianɛ n ni ko yama ma

¹³ Chɛ an fɛ mu, mmɔ sɛmbɛ kaa a tɛ koe a, mmɔ bɔ Chisianɛ n bakoe ma, ko yama ma koe ko a. Chɛɛ wo e chɛ an ma. Wo ma koe ma, min mbe a ma, wo bɔɛ n ni ka Yataa 'a chia ma.

¹⁴ N fan, nn fea Mansa Chisɔsi a, nn ma‑a gbɛ mɔ dɔndɔɛ a. Chɛ an fɛ mu, n‑na a sɔn fan, tea tea ko a, mbɛ daun fen kan kɔ kan mbe ee nɔ, mmɔ ɛ min daun, min ma nyamuien mu Yataa tena. Chɛɛ ni mɔ gbu dan‑da a a, mbɛ fenɛ ma nyin a daun koe a, an fen chɛ, mbɛ a ma nyamui‑a Yataa tena, a daun koe a an mɔɛ chɛ boo ɔ.

¹⁵ Ni e daun fenɛ min daun, a ee na buɔdia a i bɔɛ Chisianɛ n tena, mbɛ koadia an mbe ee ka i faa ɔ an ko a. Koe min na mu, a ma nyin e daun fenɛ min daun, a ni mɔɛ n kasaa, Chasi fa‑a mɔɛ miin ko a.

¹⁶ Fenɛ min nyin i ta yiima ɔ, i ma a ma, mɔ dɔ mende n ni a yen fen yama a.

¹⁷ Koe min na mu, mmɔ ɛ fenɛ miin daun, mmɔ ɛ miin min, an fan mbe ee Yataa ma mmɔ 'a mansa a. Chɛɛ a kuu si mu tan koe an na a tena, ni faachima, a basan buɔdia chɛ a, Yataa Nyina ɛ min be mmɔ ma.

¹⁸ A sin, mɔ ɔ mɔ min mbe wai chɛ a buɛ chɛ ɔ ka Chisɔsi Chasi ko a, ɛ ma‑a Yataa faa ma koe an na, mɔɛ n bɛɛ bu ɔ dia‑a wan a mɔɛ chɛ ko a.

¹⁹ Chɛ an fɛ mu, tima ɔ tima ko a, mmɔ butuin chɛ an koe chɛ n fan ma koe a. Koe chɛ nu, miin mbe na faachima a mɔɛ n tɛ ɔ, an sin mbe a ma to, mmɔ ɛ mmɔ nyɔn dɔ gbɛa, mmɔ 'a danaya ɔ Yataa a.

²⁰ Daun fenɛ gbɛɛ, Yataa‑a min na bɔ, a nyin fan mɔ gbu ni an daun. Chɛɛ chɛ ma a ɔ yian ni, mbɛ mɔ gbu ɛ daun fenɛ gbɛɛ an daun. Ni mɔɛ‑a a ɔ sɔn, mbɛ a daun fenɛ ma nyin mɔ dɔ mende ko a, an mɔɛ chɛ ma an daun fen chɛ nɛnɛ daun, a ma na an mɔɛ chɛ ka Yataa 'a chia ma. A ma nyin ɛnden bɛɛ a, mmɔ daun fenɛ ni a ma Yataa boo gba ma ni yɔn.

²¹ A nyin wo ni dasi chɛ n na min, ni an fan mbe a ma, wo ee mɔ dɔ mende n ka‑a Yataa 'a chia ma. Wo ma soe daun, a sin wo ma gbɛ min. A yɛ to, wo ma ko yama kan kɔ kan ma, min mbe a ma, wo bɔ Chisianɛ n bɛɛ ni ka Yataa 'a chia ma.

²² Ko ɔ ko kan kɔ kan, wo danden mu min na, a si koe chɛ n ma, a ni ma dechee wo tɛ ɔ, wo bɛ Yataa an na. A sin, mɔɛ min yii a koen mu, a si a chɛ chɛ wai ma, a duaenɛ an mbe ma.

²³ Chɛɛ mɔɛ chɛ sin, sika ɛ min dɔ, a daun fenɛ wakoe a, danaya ee a mɔɛ chɛ ɔ. Chɛ ko a, Yataa ɛ kaa a tɛ‑a wan a mɔɛ chɛ wakoe ma, a ni tɔɔ. Koe min na mu, ko ɔ ko mɔ ɛ min ma, danaya ee min dɔ, ko yama ma mu a a.