GBOO DOMI KO A 11 - Yataa 'a Dɔbɛnɛ Nama

Pɔɔ ɔ te, Yataa‑a chinchimaya yian Isɔɛɛ mɔɛ n na

¹ Chɛɛ n mbe chɛ an fɔ tena gbɛ. Yataa nii ma Isɔɛɛ mɔɛ n na yɛ ni a boo kɔ. A nii ma chɛ ma ni ɛnden bɛɛ a. N fandi gbu wɛɛ, Isɔɛɛ mɔɛ mu n na. Ebeami an mu n bemba a. N bɔ‑a Bɛnchamin 'na dambi an dɔ.

² Yataa ma ban ni a 'a mɔɛ chɛ n dɔ, a na‑a a boo sɔ ka miin ma kɛn suun, ma koe a a ta mɔɛ n na. Kai Idaicha na‑a gbonyɛ wan Yataa tena a si an ma. Wo‑a a ɔ sɔn fan a nyɛnden mu buɛ min dɔ an disa chɛ tena chɛ Yataa 'a gboo ɔ.

³ A ɔ, “Mansa Yataa, an‑na kaina chɛ gbɛɛ yɔn, nn mbe i fai kaina min nu, an‑na i 'a gbonka chɛ mɔɛ n fa. N dɔndɔ gbe min bɛɛ toen mu an tɛ, an toen mu an ni n bɛɛ fa.”

⁴ Yataa na‑a a da a bai yɛman fan, a ɔ, mbɛ a dɔndɔ gbe ma dechee, a ɔ, a‑a mɔ wu wɔnfea n dɔ bɛn, a wandi ko a. A ɔ, an mu, an nii ma dɔn ni an ni fen chɛ fai, min nii ma Yataa a, fen chɛ min tɔ ni Bee.

⁵ Chɛ an fɛ mu, ɛ ka wan sanche wɛɛ. Chu mɔɛ n gbɛɛ ma, miin‑na an kan kɔ sɔ Yataa a. An kuunden mbe wan nɔ, miin kun bɔ‑a a ɔ. Koe min na mu, Yataa‑a koadia demanɛ chɛ wan an na, mbɛ a‑a a boo sɔ an ma, ma koe a a ta mɔɛ n na.

⁶ Yataa 'a koadia demanɛ an‑na a ma, a‑a a boo sɔ an ma, ma koe a a ta mɔɛ n na. A ee mɔ ya i chɛ chɛ wai an ko a. A mu min na, ni Yataa ni mɔ ya a ta mɔɛ a, mɔ chɛ chɛ wai an ko a, mbɛ mɔ ɛ a yen, a ee mɔɛ chɛ ya tena koadia demanɛ ta fɛ chia an na.

⁷ Fen mu to? Isɔɛɛ mɔɛ n gbɛɛ ma fen chɛ yen ni, an ni min yan tena, mɔɔ dechee mɔ kuunden chɛ nu, Yataa na‑a miin ya a ta mɔɛ n na, an fan na‑a a yen. Yataa na‑a a ma wan, mɔɛ tɔɛ chɛ n‑na an boo don an too n dɔ, kɛn a ni an chee tena tima min na.

⁸ Ɛ ka wan dechee yɔ Yataa 'a gboo‑a a fɔ buɛ min dɔ, a ɔ, “Yataa‑a an ma wan tindo. Aan a sɔ bi nyɔn tima ma, an ya ee che koe ɔ yen‑da, an ni a ɔ gbɛ ni fen mbe ma tena.”

⁹ Mansa Defidi na‑a bai dɔndɔ gbe chɛ an fɔ suun, a ɔ, “Yataa ni gbai a sɛ an mɔɛ chɛ n ma,” a ɔ, “an ni chɛɛ a a, daun fen chɛ a, min mbe dia an da a.” A ɔ, “Yataa ni an na bea, a ni an tɔɔ.”

¹⁰ A ɔ, “Yataa ni a ma an ni fion, an ma kaina yen.” A ɔ, “Tima ɔ tima ko a, an kɔɛ bɔenɛ ni ma, an 'na tɔɔya kɔɔ.”

¹¹ N mbe chɛ an fɔ tena gbɛ. Chu mɔɛ n na‑a nama wan, chɛɛ an nii ma bea chɛ ni, an mbe ee che an kɔɔ sɔ‑a min dɔ. Chɛ nii ma ma ni ɛnden bɛɛ a. An na‑a ko yama miin ma, an na‑a a ma mɔɛ miin ma Chu mɔɛ n na, an‑na bauncha ma sɔn. Chɛ ma‑a, min mbe a ma, Yataa ni an na sɛ, Chu mɔɛ chɛ n faa ni yɔn.

¹² Chu mɔɛ n na‑a ko yama min ma, an na‑a a ma, mɔɛ chɛ n‑na bauncha wa ma sɔn, mɔɛ miin nii ma Chu mɔ a. Chɛɛ ni Chu mɔɛ n bɛɛ‑a bauncha chɛ ma sɔn gbɛ, ɛ ma‑a gbɛ ko ma kawaen ba an na, a ka Yataa tena.

Pɔɔ ɔ te, mɔɛ miin ma Chu mɔ a, an‑na bauncha ma sɔn

¹³ N mbe chɛ gbɛɛ fɔ tena wo wan ko a, wo wɛn ma Chu mɔ a. N mu ka buɛ min dɔ Chisɔsi 'a sɔ mɔɛ a, wo ko a, n bu ɔ diama mu tima ɔ tima ko a, n 'na wai chɛ koe a. N ni chɛ ma din ka wo tena. Ka wɛ n mbe koɔ gbɛ wo tena, wo wan mɔɛ chɛ nu, wo wɛn ma Chu mɔɛ n na. Tima min na wɛ n mbe Chisɔsi 'a sɔ dencha ɔ wo ko a, n bu ɔ diama mu, wai chɛ ɔ.

¹⁴ Kɔkɔɛ chɛ ɛ che‑a wan a ma‑a, n ta mɔɛ nu, miin mu Chu n na, n ni a ma toomaya ni chɛ an faa ɔ. Chɛ ɛ a ma‑a wan, an dɔ n ni bauncha ma sɔn.

¹⁵ Koe min na mu, Yataa na‑a ban an dɔ tima min na, mɔɛ tɔɛ nu dunya ɔ, an na‑a ma wan a dia nyɔɛ n na. Chɛ ma‑a wɛɛ, Yataa ɛ a boo a si‑a to kɛn an kɔɔ, ɛ ma‑a wan yɔ ni mɔɛ fa‑a, mbɛ a yɛ‑a to fɔɛ ɔ.

¹⁶ Ni chin fenɛ gbɔɛ saa a be‑a Yataa ma, mbɛ a tɔɛ gbɛɛ ma‑a Yataa ta a. A sin to, ni kɔnɛ suu be‑a Yataa ma, an kɔnɛ gbu bonɛ n gbɛɛ ma‑a Yataa ta a.

¹⁷ A maen fan mu ka gbɛ yɔ an kɔn chɛ bonɛ dɔ n ka‑a a ma, mbɛ fia kɔnɛ dɔ gbɛɛ bonɛ ya a, mbɛ a chii‑a kɔnɛ bonɛ chɛ gba ɔ. Fia kɔn chɛ ɛ ka gbɛ kana‑a kɔn chɛ a tifa an dɔ. Wo wan mɔɛ chɛ nu, wo wɛn ma Chu mɔ a, wo e ka wan. Wo e ka gbɛ kana‑a mɔɛ chɛ n na tifa an dɔ Yataa tena, mɔɛ chɛ nu, miin mu Chu mɔɛ n na.

¹⁸ Chɛ an fɛ mu, wo ma yonka tɛ an na. Ni wo‑a chɛ ma, chɛ ni ma wo 'a yiinachii ɔ, mbɛ wo wan mbe ee a be tena an ma, chɛɛ an fan mbe an fandi kɔ tena, ni wo wɛɛ.

¹⁹ Chɛɛ wo dɔ nu, wo e a fɔ‑a wan, wo ɔ, tea mu a a. Wo ɔ, mbɛ an ka‑a kɔnɛ kuu ba ma, min mbe a ma, wo ni chii an gba n dɔ.

²⁰ Tea gbu mu chɛ a. Chɛɛ an ma danɛ min chɛ ni Yataa a, an‑na a ma, an wagban‑da a ma. Wo tana sin, wo chii‑a gban a ma, koe min na mu, wo danda a a. Chɛɛ wo ma dɔpandaya bɔ, a si chɛ ma. Wo e min ma, chianɛ ni ma wo ɔ Yataa ko a.

²¹ Ni Yataa ma kaa ni Isɔɛɛ mɔɛ n ka‑a a ma, miin mbe yɔ kɔnɛ bonɛ wandi gbu, a ee che‑a a to‑a a ɔ wo wɛɛ ye. Chɛ ee che ma‑a.

²² Chɛ ɛ kun fan a ni a ɔ yian wo a, Yataa sɔnɛ nyin buɛ min dɔ, a yɛ to, a faa a kɔɔen mu buɛ min dɔ. A ee chinchin‑da chɛ n ma, miin‑na an kan kɔ sɔ a a, chɛɛ ɛ chinchin‑da wan wo ma, wo wɛn mbe a a tun‑da wo kai fa koe a a a, a wɛn sɔnɛ nyin. Chɛɛ ni wo ma wo kai fa ni a a, Yataa ɛ wo wɛɛ bonɛ n ka‑a ka wan a ma.

²³ A sin ni an bun‑da an kai fa‑a Chisɔsi a, an mbe chii‑a wan to kɔnɛ kuu ba ma. Yataa ɛ kun fan a ni chɛ ma an ko a.

²⁴ Chɛ an‑na a fɔ, wo wan, wo wɛn ma Chu mɔɛ n na, wo e ka wan yɔ wodifi min mbe nyan a wandi ko a. Wo ka‑a wan a ma, mbɛ wo chii‑a kɔn dɔ gbɛɛ ma min chin‑da. Koe ma chɛ a, min mbe ma tee. Chu mɔɛ n sin tana, an mbe wan yɔ wodifi kɔn chɛ, min chin‑da ka. Ni an kɔn chɛ bonɛ ka‑a a ma, a ɔ ee gbɛa Yataa boo ɔ, an kɔn bon chɛ‑a yɛ koe a, a gba ɔ.

Pɔɔ ɔ te, Yataa chinchinchaen fan mu mɔ ɔ mɔ ma

²⁵ N suun ma nyɔɛ nu Chasi ɔ, tea ɛ wan nɔ, min dɔ nunden mu wo ma tee. N toen mu, n ni an tea chɛ an dɔ yian wo a. Ni wo sin‑na a ɔ gbɛ, wo ee a a tun‑da dɔpanda bɔ koe a. An tea gbu yen ko gbɛ. Chu mɔɛ n sɛsɛ na‑a tooɔgbɛa bɔ wan, dan koe a Yataa a. An sin mbe to‑a an tooɔgbɛa chɛ an dɔ aan, mbɛ wo wɛn ma Chu mɔ a, wo‑a wo kai fa Yataa a. Wo gbɛɛ, Yataa na‑a a boo sɔ ka wo ma, ma koe a a ta mɔɛ n na.

²⁶ Yataa sin mbe Isɔɛɛ mɔɛ n gbɛɛ baun‑da ka wan. Ɛ ma‑a wan yɔ a wan Yataa 'a gboo‑a a fɔ buɛ min dɔ, a ɔ, “Mɔɛ min mbe mɔ gbɛɛ kun ka‑a, ɛ bɔ‑a Sayɔn duu ɔ wan.” A ɔ, “Ɛ a ma‑a wan, Chekɔpi cheeya nu, ko yama ma ni bɔ an faa ɔ.”

²⁷ Mbɛ Yataa ɔ te to a 'a gboo ɔ, a ɔ, “Chɛ sin fan mbe ma‑a n 'na dɔbɛnɛ ɔ, an bɛ an na, tima min na n mbe n boo bɔ‑a an 'na ko yama n dɔ.”

²⁸ Chu mɔɛ n ban‑da wan Yataa 'a sakana bai ɔ, min‑na an ma Yataa chɛɛ ma nyɔɛ n na. Chɛ ma min chɛ‑a, wo‑a a tɔnɔnɛ ma sɔn fan. Chɛɛ chia dɔndɔɛ a, Yataa‑a a yian fan, mbɛ a toen mu Chu mɔɛ n na. Koe min na mu, a na‑a an bemba n ta bemba n too ɔ dia wan chɛndɛ chɛ.

²⁹ Koe min na mu, ni Yataa ban‑da a boo sɔ‑a mɔɛ miin ma, a ban‑da a sɔ‑a an ma. Ni a‑a mɔɛ miin dua, a ban‑da an dua‑a. A ee a da a kuiɛ yɔn.

³⁰ Wo nan sin, wo wɛn ma Chu mɔ a, wo na‑a Yataa da a kuiɛ yɔn fan tee. Chɛɛ Chu mɔɛ n‑na Yataa da a kuiɛ min yɔn, an mbe a ma tena ka gbɛ, a wan Yataa ɛ chinchin‑da wo ma.

³¹ An ko dɔndɔ gbe chɛ an maen mu ka wo ta wɛ ɔ. Wo na‑a Yataa da a kuiɛ bɔ wan a ɔ, chɛɛ a chinchin‑da wan wo ma. Chɛ an fɛ mu, Chu mɔɛ n bɛɛ, an mbe a da a kuiɛ yɔn tena, min‑na a ma, a chinchin‑da an bɛɛ ma.

³² Koe min na mu, Yataa‑a a ɔ gbɛ wan, mbɛ mɔ gbu gbɛɛ‑a a da a kuiɛ bɔ a ɔ. Chɛ‑a a ma wan, Yataa‑a a ma, mɔɛ gbɛɛ ma‑a yɔ mɔɛ nu, miin mbe pimbi chenɛ a. A‑a chɛ ma, min mbe a ma, a ni chinchincha yian mɔ gbu gbɛɛ a.

Pɔɔ ɛ Yataa tando‑a

³³ O Yataa wa. A 'a yiimatɛ koo. A 'a ko sɔnɛ wɛɛ koo ka wan to. Mɔ ɔ mɔ ee che a yii ma koe ɔ yian‑da. Mɔ ɔ mɔ ee a chɛ chɛ wai ɔ gbɛ.

³⁴ A sin gbu, Yataa 'a gboo gbu‑a a fɔ ka wan mbɛ, “Mɔ ɔ mɔ ma Mansa Yataa yiima sɔn, mɔ ɔ mɔ ee che Yataa a si‑a.

³⁵ Mɔ ɔ mɔ 'a wai nyima ee a ma, mɔ ee nɔ, ɛ min ta wai nyima a yɛ.”

³⁶ A yen ko o, Yataa an‑na fen kɔ fen na dan. Fen kɔ fen, min mbe dunya chɛ ɔ, Yataa an mbe a ma an mbe nɔ. Fen kɔ fen dunya chɛ ɔ, an mbe nɔ, Yataa tando koe an na. Dua ni ma a tɔɛ ma, kuɔ fɔ ko a. A ni ma ka.