GBOO DOMI KO A 10 - Yataa 'a Dɔbɛnɛ Nama

¹ N suun ma nyɔɛ nu Chasi ɔ, n faa ma koe chenama wa an nɛ, n 'na Chu mɔɛ n koa. N mbe Yataa fai tena chɛndɛ chɛ, min mbe a ma, an ni a 'a bauncha ma sɔn.

² N danden fan mu a a, mbɛ an‑na an fandi be wan Yataa ma. Chɛɛ an fandi be chɛ, a ma a ɔ yian ni, mbɛ an‑na Yataa wakoe ɔ gbɛ wan chɛndɛ chɛ.

³ Chɛɛ an ma a ɔ gbɛ ni, Yataa ɛ a ya buɛ min dɔ mɔɛ ni tan a tena. An‑na min ma, an bea‑a wan an ta sawa n fɛ, a si an mbe ma buɛ min dɔ an ni tan Yataa tena. An ma bea ni chia fɛ, Yataa ɛ mɔɛ ya buɛ min dɔ mɔ tandenɛ a a tena.

⁴ Chasi‑a a ma wan, sawa chɛ, a 'a gbasaya ee to mɔ gbu kun ma. Chɛ an‑na a fɔ, Yataa ɛ mɔ ɔ mɔ ma wan mɔ tandenɛ a a tena, i wɛn mbe i kai fa‑a a a.

Pɔɔ ɔ te, Yataa ɛ mɔ ɔ mɔ baun fan

⁵ Mosisi na‑a chɛ an nyɛn Yataa 'a gboo ɔ, a si mɔ ɔ mɔ ma, min toen mu don koe a sawa chɛ kɔɔ, a ni tan Yataa tena. A ɔ, mɔɛ miin mbe sawa chɛ n gbɛɛ bɔ‑a a gbee a chɛndɛ chɛ, a ɔ, an mɔɛ chɛ n fan mbe kuɔ fɔ fɔɛ ma sɔn‑da.

⁶ Yataa 'a gboo‑a chɛ an fɔ, a si mmɔ 'a kaifa ma Yataa a, ɛ mmɔ ma buɛ min dɔ mɔ tandenɛ n na a tena. Gboo chɛ ɔ, mmɔ ma a fɔ, mbɛ mɔ ee nɔ sɛ koe a banda bu ɔ, Chasi yii koe a dunya ɔ.

⁷ A ɔ, chɛ ma, mmɔ ni a fɔ, mbɛ mɔ ee nɔ ta koe a faa a sɛ koe a Chasi a dunya ɔ.

⁸ Yataa 'a gboo chɛ‑a a fɔ ka wan, a si a 'a sakana bai ma. A ɔ, Yataa 'a sakana bai chɛ ɛ mmɔ boo ɔ wan, ɛ mmɔ da ɔ, a sin mbe mmɔ faa ɔ. Sakana bai dɔndɔ gbe chɛ tun, nn mbe ka an dɔ yian tena, mbɛ mɔɛ miin mbe an kai fa‑a Chasi a, an fan mbe bauncha ma sɔn.

⁹ E bauncha ma sɔn‑da wan, ni i‑a da a bai chɛ fɔ den faaɔgbɛya ɔ, mbɛ Chisɔsi Chasi an mu i 'a mansa a. A sin i danden mu a a i yiima ɔ, mbɛ Yataa na‑a Chisɔsi chɛ kɔɔ sɔ wan a ka saya ɔ.

¹⁰ Koe min na mu, ni mmɔ‑a mmɔ kai fa Chisɔsi a, an mbe mmɔ ma mɔ tandenɛ n na a tena. Mmɔ 'a danaya chɛ sin, ni mmɔ‑a a ɔ yian den, an mbe na bauncha a mmɔ ko a.

¹¹ Ɛ wan dechee yɔ Yataa 'a gboo‑a a fɔ buɛ min dɔ, mbɛ mɔɛ min mbe a kai fa a a, a mɔɛ chɛ ee che‑a mau‑a.

¹² Mɔ ɔ mɔ ɛ wan chɛ ɔ. Koe min na mu, tɛ bɔ ee Chu mɔɛ n ma, an bɛ mɔɛ n na miin nii ma Chu mɔɛ n na. Mansa Yataa dɔndɔ gbe an mbe mɔɛ gbɛɛ ko a, a sin‑na mɔ ɔ mɔ dua wan chɛndɛ chɛ, mɔɛ min mbe a tɔɛ chee demanɛ ko a.

¹³ Ɛ ma wan yɔ a nyɛnden mu buɛ min dɔ Yataa 'a gboo ɔ, mbɛ mɔ ɔ mɔ, i wɛn mbe Mansa Yataa chee‑a, basan koe a i ma, e bauncha ma sɔn‑da wan.

¹⁴ Chɛɛ mɔɛ n mbe ee kun, an ni a tɔɛ chee bauncha ko a, ni an ma an kai fa ni Chisɔsi a. Chɛɛ ni an ma Yataa 'a sakana bai chɛ a min ni, an mbe ee che an kai fa chɛ chɛ a. An sin mbe ee kun, an ni sakana bai chɛ a min, ni mɔ ɔ mɔ ma a fɔ ni an ye.

¹⁵ A sin to, sakana bai chɛ ɔ ee che yian‑da mɔɛ n na, ni Yataa ma mɔɛ n na fasan ni dunya ɔ, a ɔ yian koe a. A ni ma yɔ Yataa 'a gboo‑a a fɔ buɛ min dɔ, mbɛ a ma kawaen mu kaka, mbɛ mɔɛ chɛ n mbe chia a, miin mbe na tena sakana bai chɛndɛ a.

¹⁶ Chɛɛ mɔɛ gbɛɛ ma, miin‑na an boo si sakana bai chɛndɛ chɛ kɔɔ. Kai Aisaya wandi gbu na‑a a fɔ wan, a ɔ, “Mansa Yataa, mɔ ɔ mɔ ma dan ni nn 'na sakana bai a, nn‑na min fɔ.”

¹⁷ Chɛ ɛ a ɔ yian fan gbɛ, mbɛ mɔɛ n mbe sakana bai chɛndɛ min na min tena ka, an mbe a ma tena an mbe an kai fa tena Chisɔsi Chasi a. A sin to, mɔɛ n mbe sakana bai chɛndɛ chɛ a min tena wan, mɔɛ n mbe min fɔ tena an ye a si Chisɔsi ma.

¹⁸ Chɛɛ chɛ ɛ ma wan tea a gbau gbau, mbɛ an na‑a sakana bai chɛ a min fan. Yataa 'a gboo ɔ, a nyɛnden fan mu, mbɛ a wan Yataa 'a fenɛ miin gbɛɛ a dan, an‑na sakana bai chɛ fɔ wan. A yɛ to, an da a kuiɛ na‑a a fo wan dunya danka a.

¹⁹ A yɛ to, n mbe chɛ an fɔ tena, mbɛ Isɔɛɛ mɔɛ n na‑a sakana bai chɛ gbu ɔ sɔn fan chɛndɛ chɛ. Mosisi wandi gbu, a ni koɔ tena tima min na Yataa ko a, a pɛn na‑a chɛ fɔ, mbɛ mɔɛ chɛ nu, miin nii ma Chu mɔ a, Yataa ɛ an na sɛ‑a wan, Chu mɔɛ n faa ni yɔn. Mbɛ an Chu mɔɛ n yɛ‑a, an faa bɔ‑a an mɔɛ chɛ n ma, miin kunɛ ɔ bandenɛ ɛ.

²⁰ Kai Aisaya nan gbu, a na‑a Yataa 'a gbonka chɛ wan faagbɛa wandi gbu a. A ɔ, Yataa na‑a a fɔ wan, a ɔ, mɔɛ miin nii an ya a kan tena Yataa a, a ɔ, an fan‑na a yen. A ɔ, a wan Yataa sin na‑a a wandi yian fan chɛ n na, miin nii a wakoe ɔ tisa tena.

²¹ Chɛɛ min sien ni Isɔɛɛ mɔɛ n ma, Aisaya na‑a a fɔ wan, mbɛ an sɔen fan mu Yataa a kan, a ɔ, an mbe ee kooya be tena Yataa ma. A ɔ, chɛɛ Yataa na‑a butuin chɛ wan a sɔɛ gbɛɛ a, a ɔ, min mbe a ma, an ni ma faachima ɔ.