GBOO DOMI KO A 1 - Yataa 'a Dɔbɛnɛ Nama

¹ N fan Pɔɔ, Chisɔsi Chasi 'a wai chɛ mɔɛ, n fan mbe ka gboo chɛ nyɛn‑da. Yataa an‑na n chee ma koe a a 'a sɔ mɔɛ a, mbɛ a‑a a ma, n ma‑a tenchen mɔɛ a, min mbe a 'a sakana bai chɛndɛ chɛ ɔ yian mɔɛ n na.

² A 'a sakana bai chɛ, a na‑a a ma wan suun tima a gbɔɔ, a 'a gbonka chɛ mɔɛ n‑na tooɔdia chɛ a a. A sin nyɛnden fan mu a 'a gboo ɔ.

³ An sakana bai chɛ sien mu a 'a denɛ an ma. A 'a den chɛ a 'a mɔgbuya ta fɛ chia sin, min sien mu a ma, a bɔ‑a Mansa Defidi 'a dambi ɔ wan.

⁴ Chɛɛ Yataa Nyina‑a a ɔ yian fan gbasaya wandi ɔ, mbɛ Chisɔsi mu to Yataa 'a denɛ an na. A‑a a ma wan, mmɔ 'a mansa Chisɔsi Chasi‑a a kɔɔ sɔ a ka saya ɔ.

⁵ Yataa‑a a ma wan, Chasi 'a duaya ɔ, nn ma‑a a 'a sɔ mɔɛ a. A‑a chɛ ma, min mbe a ma, nn ni a ma mɔɛ n gbɛɛ dunya ɔ, danaya ni ma an dɔ Yataa ko a, mbɛ an‑na kooya be Chisɔsi ma.

⁶ Wo wɛɛ, wo wan Domi mɔɛ chɛ nu, an mɔɛ chɛ n dɔ mu wo a. Wo cheeenɛ mu gbɛ Yataa boo ɔ, ma koe a Chisɔsi Chasi 'a mɔɛ n na.

⁷ Chɛ an fɛ mu, n mbe gboo chɛ nyɛn tena wo tena, wo gbɛɛ Domi duu ɔ. Wo ko a di Yataa ye, a sin‑na wo ya ma koe a a 'a mɔɛ n na. Mmɔ Fa Yataa, an fea Mansa Chisɔsi Chasi a, an 'na dua ni ma wo ma, a basan an 'na faachima a.

Pɔɔ ɛ Yataa wai bɔ‑a, Chisianɛ n ko a Domi duu ɔ

⁸ Koe saa mu min na, n mbe Yataa wai bɔ tena wo gbɛɛ ko a, Chisɔsi Chasi 'a gbasaya ɔ. N mbe Yataa wai bɔ tena, koe min na mu, dunya gbɛɛ, an mbe a fɔ tena wan danaya min mbe wo ɔ Chisɔsi Chasi ko a.

⁹ Yataa an mu n 'na sii a, mbɛ n mbe bai min fɔ tena, tea bai mu. A sin, n mbe wai chɛ tena an ko a n faa gbɛɛ a. Sakana bai chɛ, a si a 'a denɛ ma, n mbe a ɔ yian‑da mɔɛ n na. Yataa‑a a ɔ sɔn fan, mbɛ wo e wan n 'na yiinachii ɔ tima ɔ tima ko a.

¹⁰ N mbe samunɛ chɛ tena wo ko a tima ɔ tima. A sin, n mbe samunɛ chɛ tena sanche, Yataa ni a ma, n ni kun na‑a wo kɔndɔn‑da nɔ.

¹¹ Wo yen sɔɛ ɛ n na kaka, min mbe a ma, Yataa Nyina ɛ dua min chɛ tena n na, a ni a chɛ wo wɛɛ ko a, wo ni sɔ gban.

¹² N ta yiima ɔ, n toen mu mmɔ ni basan mmɔ nyɔn ma mmɔ 'a danaya ɔ. Wo 'a danaya ɛ kun‑da wan a ni basan n ma, mbɛ n ta danaya wɛɛ ɛ basan‑da wo ma.

¹³ N suun ma nyɔɛ nu Chasi ɔ, n toen mu wo ni a ɔ sɔn, mbɛ tima sɛsɛ ko a, mbɛ ɛ ma wan n yii ma tima ɔ tima, n ni na wo kɔndɔn. Chɛɛ koe an‑na a ma, n ma che nin bɛ na‑a wo tena. N toen mu n ni na, min mbe a ma, n ni mɔɛ n ma sɔn wo tɛ ɔ, Domi duu ɔ, miin mbe an kai fa‑a Chisɔsi a. N‑na a ma ka wan kaina sɛsɛ nu mɔɛ n tɛ ɔ, miin ma Chu mɔɛ n na.

¹⁴ Koe min na mu, n gbɔsɔen fan mu mɔ gbu gbɛɛ ko a. N gbɔsɔen fan mu chɛ n ko a, miin bonchenden mu, a basan chɛ n bɛɛ a, miin ma bonchen ni. A yɛ to, chɛ n ko a, miin‑na koe sɔn, a basan chɛ n bɛɛ a, miin ma ko sɔn.

¹⁵ Chɛ an fɛ mu, n ma bɛnden mu tima ɔ tima ko a, Yataa 'a sakana bai ɔ yian koe a wo wɛɛ a Domi duu ɔ.

Pɔɔ ɔ te, Yataa 'a sakana bai chɛndɛ gbasayaen mu

¹⁶ N 'na danaya Yataa 'a sakana bai chɛndɛ chɛ a, a da faenɛ mu gban. Koe min na mu, Yataa 'a gbasaya ɛ wan sakana bai chɛ ɔ. Chia mu an na, Yataa ɛ a 'a mɔɛ n baun min na, a 'a mɔɛ chɛ n gbɛɛ, miin‑na an kai fa Chisɔsi a. A saa mu Chu mɔɛ n fan na, mbɛ chɛ n bɛɛ, miin ma Chu mɔ a, an na‑a an gbaa chia a.

¹⁷ Koe min na mu, sakana bai chɛndɛ chɛ ɛ a ɔ yian tena wan, Yataa ɛ a ma buɛ min dɔ, mmɔ ni tan a tena. Chɛ ee bɔ ko dɔ mende kan kɔ kan dɔ, mɔɔ dechee danaya dɔndɔ gbe Yataa a. Ɛ wan dechee, yɔ Yataa 'a gboo‑a a fɔ buɛ min dɔ, a ɔ, “Mɔɛ min mbe a kai fa‑a Yataa a, ɛ an ya mɔ tandenɛ a, a sin fan mbe kuɔ fɔ fɔɛ ma sɔn.”

Pɔɔ ɔ te, mɔɛ n gbɛɛ‑a ko yama ma Yataa chen kɔɔ

¹⁸ Chɛɛ mɔɛ chɛ n gbɛɛ, miin mbe ko yama n ma, an fan mbe a ma, mɔɛ n mbe ee tea ɔ sɔn a si Yataa ma. A ka banda bu ɔ, ɛ a ɔ yian‑da wan a faa tɛen mu buɛ min dɔ.

¹⁹ Yataa ɛ an tɔɔ‑a wan, a mu min na, an‑na a ɔ sɔn fan, koe min nyin a ma koe a, a si a ma. Yataa wandi gbu an‑na koe chɛ n yian an na den.

²⁰ A ka dunya a dan tima ma, mmɔ ee Yataa yen tena, chɛɛ mmɔ ɛ a 'a gbasaya a tinsɔn tena wan. A 'a gbasaya chɛ kuɔ fɔ ko a, a basan a 'a gbasaya a, fenɛ n gbɛɛ a dan koe a dunya ma. Chɛ an fɛ mu, bai ee ma‑a an da a, koe min‑na a ma, an ma Yataa sɔn ni.

²¹ An‑na a ɔ sɔn fan, mbɛ Yataa ɛ wan nɔ, chɛɛ an mbe ee a tando a chia ma, an sin mbe ee a wai bɔ. An mbe yiinachii miin chɛ, ko ɔ ko ee bɔ an dɔ. Fen kɔ fen mbe ee an 'na yiinachii n dɔ, a mu min na, yiinachii yama n fan mbe an dɔ.

²² A ni an yii ma, mbɛ an yiima tɛen mu kaka, chɛɛ wooya tɔ wa mu an na.

²³ An mbe e na Yataa fai, kuɔ fɔ mansa, an mbe fenɛ n fan fai, an mbe miin nyan. Fenɛ miin bɔen mu mɔ gbu a, mɔ gbu min mbe fa. Chɛ ma, fenɛ miin bɔen mu konde n na, an bɔenɛ ɛ soe n na, an bɔenɛ ɛ sawan fenɛ n bɛɛ a.

²⁴ Chɛ an fɛ mu, Yataa‑a an to an fandi boo ɔ, ko yama chɛ nu, miin na di an ye, an ni an ma. An sin, an mbe maumaya koe tɛ wan an nyɔn na.

²⁵ An mbe ee dɔn, an ni dan tea koe n na, a si Yataa ma. An mbe dɔn dechee fania fania bai chɛ n fan ma. An mbe fen chɛ n fan fai, Yataa wandi‑a miin nyan. Chɛɛ an mbe ee dɔn, an ni Yataa wandi gbu sin fai, min‑na an fen chɛ n sin nyan. A wan gbu mu, a ma biaen mu, tando ni be min ma, kuɔ fɔ ni kuɔ fɔ ko a. A ni ma ka.

²⁶ Chɛ an fɛ mu, Yataa‑a an to nɔ, an ni maumaya koe tɛ. Musu n bɛɛ an tɛ ɔ, an mbe waa ma basan fan an nyɔn na. Yataa ma chɛ a bɔ ni dunya chɛ ɔ.

²⁷ Mɔ kaima n bɛɛ, an mbe ko dɔndɔ gbe chɛ ma wan, Yataa ma min na bɔ ni. An mbe musu n to wan, mbɛ an faa bɔ‑a waa ma basan koe a an bɔ kai n na. Mɔ kaima chɛ n mbe maumaya koe n sɛ wan an nyɔn ma. An sin, chɛ‑a a ma wan, Yataa‑a tɔɔya si an na, min na kanden mu an 'na ko yama a.

²⁸ An gbu sin nii ma to ni, tea yiinachii chɛ koe a, a si Yataa ma. Chɛ ko a, Yataa‑a an to wan nɔ, an ni ma an kun ye, an 'na yiinachii yama chɛ a. Chɛ ɛ a ma wan, an ni koe n ma, miin ma nyin an ma koe a.

²⁹ Ko yama nu, an fan faenɛ an faa an na gban. An toen mu an bɔ n boo fenɛ n fan na, an toen mu to fen fen ni ma an dɔndɔ gbe ta a, an ma to ni an nyɔn na, an sin mbe an nyɔn fa wan. A yɛ to, an mbe butuinɛ chɛ, an mbe an nyɔn bun, an mbe ta‑a yiinachii yama chɛ‑a an nyɔn na. A sin to, an mbe an nyɔn tɔɛ ɔ tɛ ka wan.

³⁰ An mbe bai yama sa a si an nyɔn ma, an ma to ni Yataa nan fan na. An mbe an nyɔn main fan, mbɛ an‑na dɔpandaya bɔ, an mbe ta‑a yonka tɛ‑a. Tima ɔ tima ko a, an mbe yiinachii an na, ko yama ma munda ma koe a. An mɔɛ chɛ nu, an mbe ee baa be an woo mɔɛ n bɛɛ ma.

³¹ Ko yama ma koo an dɔ, an mbe ee an da a kuiɛ to a ma. An sin, an mbe ee an bɔ n bia chɛndɛ chɛ, an mbe ee chinchin an bɔ n ma.

³² An‑na a ɔ sɔn fan, mbɛ Yataa ɔ te, mɔ ɔ mɔ min mbe koe ma‑a ka buɛ chɛ ɔ, ɛ fa‑a wan. Chɛɛ chɛ gbɛɛ ɔ, an mbe a a tun tena an koe chɛ n ma koe a. A yɛ to, an sin mbe ta‑a to mɔ dɔ mende n pɛmbɛ‑a, miin mbe an ko yama dɔndɔ gbe chɛ n ma tena.