CHISƆSI 'A SƆ MƆƐ NU 25 - Yataa 'a Dɔbɛnɛ Nama

Pɔɔ‑a dɔ tisa chɛ, an ta koe a a, Domi kun ti wa tena

¹ Tee sawa gbakɔ kɛn Kɔfana Fesɔsi na‑a Sisayea duu ɔ, a 'a kɔfana wai kuu sɔ koe a, a sɛ‑a wan Chuusaɛn duu ɔ.

² A che‑a kɛn Chuusaɛn, Chu n tɛ mɔɛ nu Yataa a, an 'na mansa nu, ni Chu n ya ɔ sɔɛ nu, an‑na a ɔ yian Kɔfana Fesɔsi a, mbɛ Pɔɔ‑a sawa sɛsɛ yɔn fan. An‑na Kɔfana Fesɔsi disa wan,

³ a ni basan an ma, a ma koe a, an ni na Pɔɔ a Chuusaɛn duu ɔ. An‑na chɛ fɔ, koe min na mu, an na‑a a ɔ bɛn fan, a fa koe a chia tɛ.

⁴ Mbɛ Kɔfana Fesɔsi ɔ, “Pɔɔ ɛ ma gbanɛ ɔ Sisayea. N fandi gbu wɛɛ, n mbe yɛ tena wan nɔ sanche.

⁵ Wo a ma, nn bɛ ni ta wo 'a ya ɔ sɔɛ dɔ n na, an ni a ɔ yian nɔ, ni kamin chɛ‑a ko yama min nyɔn sima ma.”

⁶ Kɔfana Fesɔsi‑a tee sɛin ya wan Chuusaɛn duu ɔ, chɛ ma, tee tan nyɔn sima, a e na to yii‑a Sisayea duu ɔ. A che‑a tee min na, a banda ɔ ka da ma, a si‑a wan kuti ɔ, mbɛ a‑a a fɔ, a ɔ, an ni na Pɔɔ a, a chen kɔɔ.

⁷ An na‑a kɛn Pɔɔ a, Chu mɔɛ miin ka‑a Chuusaɛn duu ɔ, an sɔ‑a wan gbɛɛ Pɔɔ 'a tindanɛ. Mbɛ an Chu mɔɛ n bun‑da kun sɛsɛ si‑a Pɔɔ kun ma, an nii che toa si‑a miin kɔɔ.

⁸ Chɛɛ Pɔɔ koɔ‑a wan a wandi ko a, a ɔ, “N ma ko yama kan kɔ kan ma ni, a si Chu sawa ma, n ma a ma ni, a si Yataa 'a kata ma, n mbe ee baa, a ma koe a, a si Domi kun ti wa ma.”

⁹ Chɛɛ Kɔfana Fesɔsi toen ni, a wakoe a ni dia Chu mɔɛ n ye, mbɛ a‑a Pɔɔ ɔ tisa, a ɔ, “E dɔn‑da wan, n ni i a ta Chuusaɛn duu ɔ, i 'a bai chɛ sa koe a nɔ?”

¹⁰ Chɛɛ Pɔɔ ɔ te, “N mbe ka sɔ ɔ, Domi kun ti wa ta kuti tongbo gbu an kɔɔ ka, n 'na bai chɛ ɛ sa kaina. I wandi gbu ban‑da a ɔ yen‑da, mbɛ n ma ko yama kan kɔ kan ma ni, Chu mɔɛ n na.

¹¹ Ni n na‑a sawa an yɔn, n ni ko yama ma, an mbe che n fa‑a min ko a, n mbe ee che an disa‑a n bɔ koe ma a ɔ. Chɛɛ ni tea ee koe chɛ n gbɛɛ ɔ, an‑na miin si ka n kun ma, mɔ ɔ mɔ ee che n be‑a an ma. Chɛ an fɛ mu, n 'na bai ni ta Domi kun ti wa tena.”

¹² Mbɛ Kɔfana Fesɔsi‑a a kun puin kɛn a 'a gbakoo n ma, mbɛ a ɔ, “I‑a a fɔ wan, i ɔ, i 'a bai a ni ta Domi kun ti wa tena, a sin, e ta tena gbɛ nɔ wan.”

Kɔfana Fesɔsi‑a Pɔɔ 'a bai kɔɔ yian Mansa Akipa a

¹³ Tima ɛnden gbakɔ, Mansa Akipa an fea a tensa musu Banisi a, an na‑a wan Sisayea duu ɔ, Kɔfana Fesɔsi kɔndɔn koe a.

¹⁴ An‑na tee kuunden ya kɛn nɔ, Kɔfana Fesɔsi‑a Pɔɔ wakoe ɔ yian fan mansa chɛ a. A ɔ te, “Kaminɛ ɛ wan nɛ, Kɔfana Fedisi‑a min to pimbi chenɛ a.

¹⁵ A sin, n ta‑a kɛn Chuusaɛn duu ɔ, Chu n tɛ mɔɛ nu Yataa a, an 'na mansa nu, an bɛ Chu gbakoo n na, an‑na kun sɛsɛ si wan Pɔɔ chɛ kun ma. Mbɛ an yɛ‑a, an‑na n dɔ tisa, an dɔ, n ni kaa a tɛ, a fa koe ma.

¹⁶ Chɛɛ n‑na a fɔ wan an ye, mbɛ Domi mɔɛ n mbe ee koe ma ka. An mbe ee kaa a tɛ ka dechee mɔɛ a bai ma. Chɛɛ mɔɛ miin mbe a ma siibia, fɔ ni an‑na a ɔ yian, an mɔɛ chɛ‑a koe min ma. A sin, an mɔɛ chɛ wɛɛ, a ɛ koɔ wan, a si an siibia ma. Chɛ an mbe a ɔ yian, mbɛ tea ɛ wan siibia chɛ mɔɛ n boo ɔ, chɛ ma, ni tea ee an boo ɔ.

¹⁷ An na‑a kɛn nɛ, n nii ma tima kan kɔ kan yayi ni. Chɛɛ tee dɔndɔɛ ma, n‑na kuti si wan, n dɔ, an ni na Pɔɔ a, n chen kɔɔ, an bai chɛ sa koe a.

¹⁸ A koɔ nyɔɛ n bɔ‑a wan ya a ma, an sɔ‑a. Chɛɛ an nii ma che ni bai ɔ bai sa‑a, a si Pɔɔ ma, min mu bai yama a, yɔ n yii ni buɛ min dɔ a ɔ.

¹⁹ Koe miin don‑da an tɛ ɔ dechee, an mu kɔɔsa an na, a si an 'na Yataa fai buɛ ma. A yɛ to, a si kamin dɔndɔ wakoe ma, min tɔ mu Chisɔsi. Kamin chɛ fa‑a wan, chɛɛ Pɔɔ ɔ te, a ɛ fɔɛ ɔ.

²⁰ N kɔndɔ fii‑a wan, a si n mbe kun buɛ min dɔ, yiima sɛsɛ ma sɔn‑da, a si bai bonda chɛ ma. Chɛ‑a a ma wan, n‑na Pɔɔ ɔ tisa, n dɔ, ni ɛ dɔn fan, n ni a 'a bai a ta Chuusaɛn duu ɔ, a sa koe a nɔ.

²¹ Chɛɛ Pɔɔ‑a a fɔ wan, a ɔ, an ni a to pimbi chenɛ a, aan a 'a bai ni ta Domi duu wa ɔ. N bɛɛ, n‑na a ma gban fan bia ɔ, aan a ta tima a, Domi kun ti wa wandi tena, a 'a bai chɛ sa koe a.”

²² Mbɛ Mansa Akipa ɔ Kɔfana Fesɔsi ma, a ɔ, “Ɛ nyan‑da wan, n fandi gbu, n ni kamin chɛ kan dɔ kuiɛ a min.” Mbɛ Kɔfana Fesɔsi ɔ, “E a a min‑da wan sinan.”

Pɔɔ‑a bai ɔ yian, Mansa Akipa chen kɔɔ

²³ Banda ɔ ka‑a kɛn, mbɛ Mansa Akipa na‑a, an fea Banisi a, basɔmaya wa ɔ, mɔɛ ni min be tena an ma. Mbɛ an don‑da tongbo wa chɛ kɔɔ, an bɛ soya n ya ɔ sɔɛ chɛ n na, a basan duu ɔ gbakoo n na. Mbɛ Kɔfana Fesɔsi‑a a fɔ, a ɔ, an ni na Pɔɔ a, kuti chen kɔɔ.

²⁴ Mbɛ Kɔfana Fesɔsi ɔ, “Mansa Akipa, a basan wo gbɛɛ a, wo wɛn mbe nɛ sanche. Wo‑a kamin chɛ yen nɛ sɔ ɔ, kuti chen kɔɔ. Chu mɔɛ n gbɛɛ, sanche nɛ chɛ, ni miin mbe Chuusaɛn, an fan‑na a ma siibia n tena. An ni wan yee tɛ tena, mbɛ n ni a ma, an ni a fa.

²⁵ Chɛɛ n ma che ni, ko yama kan kɔ kan dɔ yen‑da, kamin chɛ‑a min ma, n mbe kaa a tɛ min ma, a ni fa. A sin, a wandi ban‑da ka buɛ min dɔ a fɔ‑a, mbɛ a 'a bai ni ta Domi kun ti wa tena, n dɔn‑da a ta koe ma nɔ.

²⁶ Chɛɛ ko gbu ee nɔ, n mbe min nyɛn, a si a ma, kun ti wa chɛ tena. Chɛ an fɛ mu, n na‑a Pɔɔ chɛ a, wo gbɛɛ chen kɔɔ, a bɛɛ bɛɛ i wan Mansa Akipa, wo wandi ni a a bai kɔɔ gbɛngbɛn. Koe ɛ ma‑a wan nɔ, n mbe min nyɛn.

²⁷ Koe min na mu, n ma yiimatɛ yen ni a ɔ, n ni pimbi chen na sa mɔɛ a ta, kun ti chɛ tena, ni n ma a ɔ yian ni, a‑a ko yama min ma.”