CHISƆSI 'A SƆ MƆƐ NU 24 - Yataa 'a Dɔbɛnɛ Nama

Chu n‑na Pɔɔ sɔnɛ ɔ yian, Kɔfana Fedisi a

¹ Tee duu gbakɔ, an na‑a kɛn Pɔɔ a Sisayea duu ɔ, mbɛ Ananiyasi, min ni tɛ mɔ wa a, Chu n tɛ Yataa a, a yii‑a wan nɔ an duu chɛ ɔ, an bɛ Chu gbakoo dɔ n na. Dɔya dɔndɔ wɛɛ ni wan an tɛ ɔ, min tɔ ni Tatudɔsi. An ta‑a wan Kɔfana Fedisi 'a kuti ɔ, mbɛ an‑na koe gbɛɛ ɔ yian, Pɔɔ‑a miin ma.

² A sin, an na‑a kɛn Pɔɔ a, kuti chɛ ɔ, Tatudɔsi chɛ bun‑da bai ɔ yian‑da, a si Pɔɔ ma. Tatudɔsi chɛ ɔ, “Kɔfana Fedisi, i mu ka buɛ min dɔ mɔ chenama a, sawa n na teen koe a, a sin, i yiima tɛen mu, an‑na a ma ka faachima ɛ chɛnyɛ chɛ ɔ, aan a sɔ bi nyɔn tima ma. I‑a ko sɛsɛ sɔ wan a chia ma chɛnyɛ chɛ ɔ, min mbe a ma, nn ni ko chɛndɛ ma sɔn nɛ.

³ Chɛ sin ko a, nn bu ɔ di chia ɔ chia a, a yɛ to, nn mbe i wai bɔ tena kaka, a si i 'a wai chɛndɛ chɛ n ma.

⁴ N ma to ni, n ni ta to pɔɔ, i 'a tima yɔn koe a. Chɛ an fɛ mu, n mbe i disa tena, i ni i too ma sɔ bai kundu ɛndenɛ chɛ ma, n mbe na tena min dɔ yian tena i a, nn gbɛɛ ko a.

⁵ Koe min na mu, nn‑na a ɔ yen gbɛ, mbɛ kamin chɛ mu mɔ gbu yama yama an na. A wan mbe gbunɛ a bea kan kɔ kan, Chu mɔɛ n mbe kaina min kan kɔ kan dunya ma. A yɛ to, a wan mu ya ɔ sɔɛ a dɔbɛn chɛ ko a, an mbe min chee, an dɔ, Nasaɛti mɔɛ n 'na dɔbɛnɛ.

^6-8 A sin gbu, a toen ni a ni baa bɔ Yataa 'a kata chɛ ma, min‑na a ma, nn‑na a bia. Ni i‑a a ɔ tisa, i‑a a ɔ yen‑da wan, mbɛ nn‑na bai miin gbɛɛ ɔ yian, a si a ma, mbɛ nn ma saman ni kan kɔ kan.”

⁹ Chu mɔɛ chɛ n bɛɛ‑a toa si wan a da a bai dɔndɔ gbe chɛ kɔɔ, an dɔ, a gbɛɛ ɛ ka wan.

¹⁰ Mbɛ kɔfana chɛ, a‑a a boo kai Pɔɔ ma, koɔ koe a. Mbɛ Pɔɔ‑a a fɔ, a ɔ, “N‑na a ɔ sɔn fan, mbɛ i mɛen mu mɔɛ n 'na bai sa‑a chɛnyɛ chɛ ɔ, nɛ i 'a kuti chɛ ɔ. Chɛ an fɛ mu, n bu ɔ diaen mu, koɔ koe a n fandi ko a, i chen kɔɔ.

¹¹ Ni i‑a mɔɛ n dɔ tisa, e a ɔ yen‑da wan, mbɛ n sɛ‑a Chuusaɛn duu ɔ wan, Yataa 'a kata ɔ, a fai koe a. A sin, a ka a tee chɛ ma, a sɔ bi ma, a‑a tee tan kun ma fea ya gbɛ.

¹² An sin nii ma n tan ni gbunɛ a bea‑a, a yɛ to, an ma n tan ni a fɔ‑a mɔɛ n ye, an ni koɛ a bea. An ma n tan ni chɛ ma‑a Yataa 'a kata ɔ, an ma n tan ni a ma‑a mmɔ 'a samun chɛ chenɛ n na, n mbe ee baa, a ma koe ma kan kɔ kan an duu gbu ɔ.

¹³ An gbu ee che koe ɔ yian‑da, min mbe toa si, an 'na bai chɛ n kɔɔ, a si n ma.

¹⁴ Chɛɛ n mbe dɔn tena chɛ an ma, i chen kɔɔ. Mbɛ nn bemba n ta bemba n 'na Yataa chɛ, n mbe an fai, a sɔ koe a chia chɛ fɛ, Chisɔsi‑a min yian, a sɔ koe a a fɛ. An‑na a fɔ an ma, mbɛ tea chia ma chɛ a. Chɛɛ n danden fan mu ko ɔ ko a, min mbe sawa chɛ ɔ, Yataa na‑a min be Mosisi ma, a basan koe chɛ n na, miin mbe Yataa 'a gbonka chɛ mɔɛ n 'na gboo n dɔ.

¹⁵ Yiinatɛ dɔndɔ gbe chɛ, an mbe n dɔ, nn bɛ an na, a si Yataa ɛ min ma‑a. Mbɛ mɔ gbu kan kɔ kan, min tanden mu, ni min ma tan ni, ni a fa‑a, Yataa ɛ an mɔɛ chɛ kɔɔ sɔ wan to, a ka saya ɔ.

¹⁶ Chɛ an fɛ mu, tima ɔ tima ko a, n mbe ko sɛsɛ ɔ bia wan, n yiima a koenɛ ni ma Yataa tena, a basan n bɔ mɔ gbu n bɛɛ a.

¹⁷ “N‑na san sɛsɛ ya wan, n ka‑a kɛn Chuusaɛn duu ɔ. Chɛɛ chɛ gbakɔ, n ta‑a wan nɔ, fen den be koe a yɔn tɔɛ n ma, a yɛ to, yasi bɔ koe a Yataa tena.

¹⁸ N to‑a chɛ an ma‑a, mbɛ an‑na n tan nɔ, Yataa 'a kata chɛ ɔ. An‑na a ɔ yen fan gbɛ, mbɛ n koenɛ ni fion. A tima chɛ a, mɔ fanka fanka nii nɔ, sɔnkɔ sɔnkɔ nii nɔ.

¹⁹ Chɛɛ Chu mɔɛ dɔ nu, miin ka‑a Esia chɛnyɛ ɔ, an ni wan nɔ a tima chɛ a, a sin mbe nyan fan an bɛɛ ni ma nɛ, i chen kɔɔ. An bɛɛ ni an ta koe ɔ yian, ni bai ɔ bai ɛ wan an da a, a si n ma.

²⁰ Ni chɛ ma, an fandi gbu, an fɛn na‑a ka n na, an ni a ɔ yian, ni n‑na koe min ma, min ma nyin. Tima min na n ni sɔ ɔ, an 'na kuti wa chɛ chen kɔɔ, n‑na ko yama min ma,

²¹ min kaen mu ko dɔndɔ gbe chɛ ma. Koe chɛ, n‑na yee tɛ min na, n ni sɔ ɔ an tɛ tima min na. N dɔ, ‘Wo e n dɔ tisa dechee, a si mɔɛ kɔɔ sɔ koe chɛ an ma, a ka saya ɔ. N danden mu an na, wo sin na‑a nɛ n na, kuti chɛ ɔ an ko a.’ ”

²² Mbɛ Kɔfana Fedisi, min‑na ko ɔ ko ɔ sɔn, a si Chisɔsi 'a chia chɛ ma, a‑a kuti da a tɔn fan a tee chɛ a. Mbɛ a‑a a fɔ an ye, a ɔ, “N mbe wo 'a bai sa‑a wan, ni soya n kun ti Disiyasi na‑a tima min na.”

²³ Mbɛ a‑a a fɔ soya gbakoo chɛ ye, min ni pimbi chenɛ kun ma, a ɔ, an ma Pɔɔ a bɔ pimbi chen chɛ a. Chɛɛ a ɔ, an ni a ma, Pɔɔ ni bun fia sima bia‑a. A sin, a ɔ, an ma Pɔɔ dia nyɔɛ kan kɔ kan bai basan koe a a ma.

Pɔɔ koɔ‑a Kɔfana Fedisi tena, an fea Dusida a

²⁴ Tee kuunden gbakɔ, Kɔfana Fedisi na‑a wan, an fea a 'a musu Dusida a, min ni Chu mɔɛ a. Mbɛ a‑a mɔɛ n sɔ, an ni ta Pɔɔ bi. Mbɛ an‑na an too ma sɔ wan Pɔɔ ma, a ɛ bai ɔ yian‑da, a si kaifa ma Chisɔsi Chasi a.

²⁵ Pɔɔ‑a koe n tɛnsɛ wan, a si koe n ma Yataa chen kɔɔ, tea ɛ koe miin dɔ. A yɛ to, ni mɔɛ e kun buɛ min dɔ, i ni tachɛ i wandi a chɛndɛ chɛ. A‑a koe n tɛnsɛ wan to, a si gbɛmbo tee ma, min mbe na tena. Kɔfana Fedisi chian‑da wan, mbɛ a ɔ, “E ka‑a gbɛ ta‑a. N mbe i chee‑a wan to, ni n‑na tima ma sɔn, tima min na.”

²⁶ A tima dɔndɔ gbe chɛ a, a ni wan a yii ma, mbɛ Pɔɔ ɛ don too ɔ woo be‑a wan a ma. Chɛ an fɛ ni, a ni Pɔɔ chee wan pɛɛpɛɛ, chia ɔ bɔɛ chɛ koe a.

²⁷ Chɛɛ san fea ben‑da kɛn, Kɔfana Fedisi bɔ‑a wan kɔfanaya ma. Mbɛ Pɔsiyɔsi Fesɔsi yɛ‑a a gba ɔ. Kɔfana Fedisi toen fan ni, a ni a ɔ yian, mbɛ a ni deman tena wan Chu mɔɛ n ma, min‑na a ma, a‑a Pɔɔ da a tɔndenɛ to pimbi chenɛ a.