CHISƆSI 'A SƆ MƆƐ NU 2 - Yataa 'a Dɔbɛnɛ Nama

Yataa Nyina na‑a buɛ min dɔ

¹ Tee chɛ che‑a kɛn, an ni min chee an dɔ Pɛndekɔsi, mɔɛ miin gbɛɛ na‑a an kai fa ka Chisɔsi a, an na kanden fan ni Chuusaɛn kaina dɔndɔɛ.

² A ya kɔɔɛ a, an‑na sɔnkɔ sɔnkɔ chɛ kuiɛ a min fan banda a, yɔ fia ɛ ma bɔ‑a. An sɔnkɔ sɔnkɔ kuiɛ chɛ, a‑a chenɛ gbu gbɛɛ ya wan, an ni ka kaina.

³ Mbɛ an‑na fenɛ n yen yɔ ta man mɛsɛ nu, an fasandenɛ ɛ a ɔ. Mbɛ an fɛn gbɛɛ ni ka nɔ, an fen chɛ n tu‑a wan an na dɔndɔ dɔndɔɛ a.

⁴ Yataa Nyina ni wan gbɛ an gbɛɛ fɛ gban, mbɛ an‑na a kuu sɔ koɔ‑a chɛnyɛ koɛ dɔ mende n dɔ. Yataa Nyina chɛ an ni gbasaya chɛ be an ma, an bai chɛ n sa koe a.

⁵ A tima chɛ a, Chu mɔɛ n sɛsɛ, a ka chɛnyɛ kan kɔ kan dɔ dunya ɔ, an ni wan Chuusaɛn. An ni mɔɛ n fan na, miin ni kooya be Yataa ma.

⁶ An‑na sɔnkɔ sɔnkɔ chɛ kuiɛ a min kɛn, mɔ fanka wa chɛ a kan‑da wan. An sin, an da ɔ gbaa‑a wan gbechee. Koe min na mu, dɔndɔ dɔndɔɛ a, mɔɛ miin kai faen ni ka Chisɔsi a, mɔ ɔ mɔ ni a a min fan, an mbe an nyɔn ta chɛnyɛ koɛ fɔ‑a.

⁷ Chɛ ma‑a wan kamaya koe a mɔɛ chɛ n tena, mbɛ an kɔndɔ fii‑a. Mbɛ an dɔ, “Fen ko e nɛ? Mmɔ ɛ ka mɔɛ miin gbɛɛ koɔ kuiɛ a min tena, Kadidi mɔɛ n fan nɛ.

⁸ Chɛɛ fen ko a mu gbɛ, mmɔ gbɛɛ ɛ an da a kuiɛ ɔ gbɛ‑a, dɔndɔ dɔndɔɛ a mmɔ ta chɛnyɛ koɛ n dɔ?

⁹ Mmɔ ka‑a chɛnyɛ sɛsɛ n fan dɔ. Dɔ n ka‑a Patia, dɔ nu Media, dɔ n sin Ɛdan. Dɔ n ka‑a to Mɛsɔpotemia, dɔ nu Chudia, mbɛ dɔ n ka‑a Kapadosia. Dɔ n bɛɛ ka‑a Pɔndɔsi, an fea Esia a.

¹⁰ Dɔ n ka‑a wan Fichiya, ni Panfidia. An ka‑a Ichipi, a basan Dibia tanda ɔ a, min mbe Sayini duu kɔ. Mmɔ dɔ n sin ka‑a Domi duu ɔ wan,

¹¹ Chu mɔɛ tiki tiki nu, ni chɛ nu miin dɔn‑da bea koe a, Chu n 'na Yataa fai chia fɛ. Mbɛ mmɔ dɔ n sin ka‑a Keti wan, ni Adebia chɛnyɛ n dɔ. Chɛɛ chɛ gbɛɛ ɔ, mmɔ ɛ a a min tena wan an mbe koɔ‑a mmɔ ta chɛnyɛ koɛ n dɔ, a si Yataa 'a wai wa n ma.”

¹² An gbɛɛ kɔndɔ fiienɛ ni, a ɔ benden ba a. An‑na an nyɔn dɔ tisa wan tɔfɛ tɔfɛ, an dɔ te, “Chɛ e na ma ka gbɛ fen na?”

¹³ Chɛɛ mɔɛ dɔ n‑na an ma yɛn fan, an dɔ, “N bɔ ka n ye, mɔɛ chɛ n gbɛɛ gbɛ tɔɛ mu.”

Pita‑a bai miin fɔ an mɔɛ chɛ n ye

¹⁴ Mbɛ Pita sɔ‑a wan, an bɛ a bɔ tan kun ma dɔndɔɛ chɛ n na. Mbɛ a koɔ‑a mɔ fanka wa chɛ tena, a kuiɛ ma sɛenɛ ɛ, a ɔ, “N bɔ Chu mɔɛ nu, ni wo gbɛɛ, wo wɛn mbe nɛ Chuusaɛn duu chɛ ɔ, wo wo too ma sɔ n ma. A sin, n mbe a ɔ yian‑da wan wo a, koe min ma‑a ka.

¹⁵ Mɔɛ chɛ n gbɛ tɔ ma, yɔ wo‑a wo yii na chii buɛ min dɔ an na. Koe min na mu, banda ɔ ka tima ɔ ma yansan bɛ.

¹⁶ Chɛɛ koe min ma‑a ka, Yataa 'a gbonka chɛ mɔɛ Chowɛ‑a bai sa wan tee, a si an ma, Yataa 'a gboo ɔ, a ɔ,

¹⁷ ‘Yataa ɔ te, “N mbe koe chɛ an ma‑a, tee dankama chɛ n kɔɔ, dunya e na to ban‑da.” A ɔ, “N mbe a ma‑a wan n Nyina ni bea mɔ ɔ mɔ fɛ. Chɛ ɛ a ma‑a wan wo 'a denɛ kaima nu, an bɛ a musuma n na, an ni n 'na sakana bai chɛndɛ chɛ ɔ yian mɔɛ n na. Wo 'a kamin tɔngbɔɛ n mbe kamaya koe n dɔ yen‑da wan, wo 'a chenan kai n bɛɛ, an mbe cho‑a wan cho n na.

¹⁸ Tea gbu a, ni dunya ma‑a ban‑da tima min na, n mbe a ma‑a wan, n Nyina ni bea n 'na yɔnɛ n bɛɛ fɛ, a kaima n bɛ a musuma n na, an sin mbe n 'na sakana bai chɛndɛ chɛ ɔ yian‑da wan mɔɛ n na.

¹⁹ N mbe kamaya koe n ma‑a wan banda a, mbɛ n‑na tɔmɔsi n yian dunya ma. Wo e wii yen‑da wan, ni ta, a basan sisi sɛmbɛndenɛ a.

²⁰ Tee ɛ mun‑da wan pimbi a, mbɛ kau wɛɛ yawa‑a, yɔ wii, tee chɛ e na che, Mansa Yataa na tee. Tee wa chɛ, ko chenama n dɔ yen tee chɛ.

²¹ A sin tima chɛ a, mɔ ɔ mɔ, i wɛn mbe Mansa Yataa chee‑a, basan koe a i ma, e bauncha ma sɔn‑da wan.” ’ ”

²² Mbɛ Pita ɔ te to, “N bɔɛ Isɔɛɛ mɔɛ nu, wo wo too ma sɔ bai chɛ n ma, n mbe na tena miin fɔ‑a wo ye. Chisɔsi chɛ, min ka‑a Nasaɛti duu ɔ, a mu Yataa wandi 'a sɔ mɔɛ an na. Kamaya koe nu, a ni miin ma, a ni tɔmɔsi miin yian, kɔndɔ fii koe nu, an fan ni a ɔ yian, mbɛ Yataa 'a gbasaya an mbe a ɔ. Wo wandi gbu, wo e siiya bɔ wan an koe chɛ n ma. Koe min na mu, an gbɛɛ ma‑a nɛ wan wo ya kɔɔɛ ma.

²³ Chɛ e na to ma‑a, Yataa wandi gbu na‑a a ɔ bɛn fan gbae a faa gbɛɛ a, mbɛ tima ɛ che‑a wan Chisɔsi ni be wo ma. A sin, wo e a ma‑a wan, mɔɛ miin mbe ee don Yataa 'a sawa kɔɔ, an ni a gbangban kɔn gbengbandenɛ ma, a ni fa nɔ.

²⁴ Chɛɛ Yataa‑a a bɔ wan saya 'a mɔnɛ boo ɔ, a‑a a ma, Chisɔsi chɛ‑a a kɔɔ sɔ a ka saya ɔ. Koe min na mu, saya nii che gbasaya din‑da a ma ɛnden bɛɛ a.

²⁵ Koe min na mu, Mansa Defidi wandi gbu na‑a chɛ an fɔ, Yataa 'a gboo ɔ, a si Chisɔsi ma, a ɔ, ‘N mbe Mansa Yataa yen fan sɔ ɔ n ya kɔɔ, tima ɔ tima ko a. Ɛ n baima, chɛ an‑na a fɔ, n ma n gbɔsɔ ni.

²⁶ Chɛ‑a a ma wan, n bu ɔ dia‑a, a sin, n mbe a tando wan buɔdia ɔ. Mbɛ n fan, n mu wɛɛ mɔ gbu a, min danka mu saya a, n yii na tɛen fan mu Yataa ma.

²⁷ Koe min na mu, i wan Yataa ee n to‑a saya a boo ma. E ee dɔn‑da i 'a wai chɛ mɔɛ chɛ, n fɛn‑na n fandi be i ma, n su ni tui kamba ɔ.

²⁸ I‑a chia sa n ye, n mbe a sɔ min fɛ, n ni fɔɛ ma sɔn, I sin, e n fɛ, n bu ɔ dia‑a a ɔ benden ba a.’ ”

²⁹ Mbɛ Pita‑a a fɔ to, a ɔ, “N 'na mɔɛ nu, n mbe na tena ka tea bai an fɔ‑a wo ye, a si mmɔ bemba n ta bemba ma, Mansa Defidi. A fa‑a wan, mbɛ a tɔn‑da. A sin, a kamba ɛ wɛ nɛ sanche sa ɔ mmɔ tɛ ɔ.

³⁰ Yataa 'a gbonka chɛ mɔɛ ni a a, a sin na‑a a ɔ sɔn fan, Yataa na‑a tooɔdia min chɛ a a. Yataa na‑a a too ɔ dia wan gbau gbau, mbɛ a wan Defidi gbu cheeya dɔndɔ, ɛ a ma‑a wan mansa chenama a, yɔ Defidi wandi gbu ni buɛ min dɔ.

³¹ Mansa Defidi na‑a a ɔ yen fan, Yataa ni na tena koe min ma‑a ya ɔ ma. Chɛ sin ko a, a wan Defidi‑a bai sa wan, a si kunka mansa chɛ kɔɔ sɔ koe ma saya ɔ. Mansa Defidi‑a a fɔ wan, mbɛ Yataa nii ma Chasi to ni saya a boo ma, a sin ma a ma ni Chasi su ni tui kamba ɔ.

³² Chisɔsi wandi gbu ni, Yataa‑a min na sɔ a ka saya ɔ. Nn gbɛɛ sin mu wan sii n na chɛ ko a.

³³ Yataa‑a Chisɔsi a sɔ, a sɛ banda bu ɔ. Mbɛ Yataa‑a a ma, Chisɔsi ɛ si ɔ kaina ma bɛndenɛ, Yataa boo nyima ɔ. A fa Yataa‑a a Nyina be wan Chisɔsi ma, a na‑a a too ɔ dia tee min be koe a. A sin, Chisɔsi wandi‑a a ma wan, Yataa Nyina bea‑a nn fɛ. Wo e ka gbɛ an dɔ yen tena, wo e a a min tena.

³⁴ Koe min na mu, Mansa Defidi wandi gbu nii ma sɛ ni banda bu ɔ, chɛɛ a na‑a a fɔ wan Yataa 'a gboo ɔ, a ɔ, ‘Mansa‑a a fɔ wan n 'na Mansa ye, a ɔ, “Si nɛ n boo nyima ɔ,

³⁵ aan n ni i chɛɛ ma nyɔɛ n don i kɔɔ, n ni an popoya i ya kɔɔ.” ’ ”

³⁶ Mbɛ Pita a ɔ te gbɛ, “Chɛ an‑na a fɔ, wo gbɛɛ, wo wɛn mbe ka Isɔɛɛ chɛnyɛ chɛ ɔ, wo ni chɛ ɔ sɔn. Mbɛ tea gbu ko a, Chisɔsi chɛ, wo‑a min gbangban ka kɔn gbengbandenɛ ma, Yataa wandi‑a an ma ka kunka mansa a, wo baun mɔɛ.”

³⁷ Mɔɛ chɛ n‑na bai chɛ a min kɛn, an faa mɔnɛ‑a wan. An sin‑na a fɔ wan Pita ye, an bɛ a bɔɛ sɔ mɔɛ n na, an dɔ, “Nn 'na mɔɛ nu, nn mbe fen ma gbɛ?”

³⁸ Mbɛ Pita ɔ, “Wo gbɛɛ wo wo kan kɔ sɔ wo 'a ko yama n na, mbɛ nn‑na yii chɛ wo kunɛ ɔ, Chisɔsi Chasi tɔɛ ɔ, min mbe a ma, Yataa ni a boo bɔ wo 'a ko yama n dɔ. Ni wo‑a chɛ ma, Yataa ɛ a ma‑a wan, a Nyina ni bea wo fɛ.

³⁹ Koe min na mu, Yataa na‑a wo too ɔ dia koe chɛ n fan na, wo bɛ wo 'a denɛ n na, a basan chɛ n gbɛɛ a, miin baa ɔ yansan nɛ a. Mɔɛ n gbɛɛ, mmɔ 'a mansa Yataa‑a miin chee, na koe a a tena.”

⁴⁰ Pita koɔ‑a wan an tena tima ɔ yansama ko a, mbɛ a‑a an na si, a ɔ, “Yataa ɛ na tena wan mɔ bonda chɛ sima n na mɔnɛ‑a, miin yau ka yama yama. Chɛ an fɛ mu, wo ni wo tanka an mɔnɛ chɛ ma.”

⁴¹ Mɔ sɛsɛ dan‑da wan sakana bai chɛndɛ chɛ a, a na‑a min sa ka. An sin‑na yii chɛ wan an kunɛ ɔ, Yataa chia a. A tee chɛ a, mɔ wu sawa an sa‑a chɛ n ma, miin na‑a an kai fa Chisɔsi a.

⁴² Chɛ gbakɔ, mɔɛ chɛ n‑na an too ma sɔ wan kanɛ ma, Chisɔsi 'a sɔ mɔɛ chɛ n ni min chɛ, a si Yataa wakoe ma. Kuiɛ a kanɛ ni wan to an gbɛɛ tɛ ɔ, a sin, an ni daunɛ chɛ wan kaina dɔndɔɛ tima ɔ tima ko a. An ni bɛn fan to tima ɔ tima ko a, samun chɛ koe a. An‑na an 'na tima gbɛɛ be wan, koe chɛ n gbɛɛ ma koe a.

Mɔɛ miin na‑a an kai fa Chisɔsi a, an ni an nyɔn bia buɛ min dɔ

⁴³ Yataa ni wan a ma‑a, Chisɔsi 'a sɔ mɔɛ n mbe kamaya koe sɛsɛ ma, a yɛ to, an ni tɔmɔsi sɛsɛ yian fan. Chɛ‑a a ma wan, mɔ ɔ mɔ da a fa‑a gban, an bakoe a.

⁴⁴ Mbɛ mɔɛ miin gbɛɛ na‑a an kai fa ka Chisɔsi a, an ni wan kuiɛ dɔndɔɛ ɔ. An boo fenɛ gbɛɛ ni boo fen dɔndɔɛ an na.

⁴⁵ An ni an boo fenɛ n ma tachɛ wan, mbɛ an‑na an kɔpɔɛ chɛ du an nyɔn ma, yɔ an ma gbɔsɔɛ ni buɛ min dɔ.

⁴⁶ Tee ɔ tee a, an ni bɛn fan kaina dɔndɔ Yataa 'a kata ɔ. An sin ni daunɛ chɛ wan an nyɔn tɛ ɔ an 'na chenɛ n na. An ni daun chɛ n chɛ faaɔgbɛ an dɔ, ni buɔdia ɔ,

⁴⁷ an mbe ta‑a Yataa tando‑a. A sin, mɔɛ n gbɛɛ‑a an yii na chii wan an na, mbɛ mɔ chɛndɛ mu an na. Tee ɔ tee sin na, Mansa Chisɔsi‑a an ma munda mɔɛ n na, miin ni gbɛ bauncha chia ma.