2 TIMOTI 2 - Yataa 'a Dɔbɛnɛ Nama

Pɔɔ ɛ Timoti a si‑a, a ni bea tɔmɔsi fɛ, Chisɔsi‑a min yian

¹ I tana, n 'na den, Yataa ni i ɔ gbɛa koadia demanɛ chɛ ɔ, mmɔ‑a min ma sɔn kɛn mmɔ ma‑a mɔ dɔndɔɛ a, mmɔ bɛ Chisɔsi Chasi a.

² N na‑a i kan fan koe n sɛsɛ ma, a sin, mɔ sɛsɛ ni wan nɔ siiya a. An kan chɛ a ben mɔ dɔ mende n tena, miin danayaen mu, an ni mɔ dɔ mende n bɛɛ kan.

³ I ta mɔnɛ ɔ bia, yɔ Chisɔsi Chasi 'a soya chɛndɛ.

⁴ Mɔ ɔ mɔ min mbe soya ɔ, a ma bɛnden mu tima ɔ tima don koe an na ya ɔ sɔɛ da a kuiɛ kɔɔ. A ee a boo chɛ koe n dɔ, mɔ gbama n mbe miin ma.

⁵ A yɛ to, ni i ma‑a Yataa 'a wai chɛ‑a, bea a 'a sawa fɛ. A ɛ wan yɔ bui chɛ tɔmbɔɛ, mɔɛ ee a bɔɛ n gbasi, a ni boo ɔ gbasi woo ma sɔn, ni a ma don ni sawa gbɛɛ kɔɔ.

⁶ A sawan bɔɛ mu sɛnɛ sa mɔɛ an na, min sɔɛ donden mu kaka, an pɛn pɛn ta ɛ che a da ma.

⁷ I yii si koe chɛ n ma, n mbe miin fɔ tena, koe min na mu, mansa Chisɔsi ɛ a ma‑a wan, i ni an gbɛɛ ɔ gbɛ.

⁸ I yii ni to Chisɔsi Chasi kɔ, min bɔ‑a Mansa Defidi 'a dambi ɔ, a yɛ to, a wɛn kɔɔ sɔ‑a a ka saya ɔ. Sakana bai chɛndɛ chɛ, n mbe min kan, a‑a a fɔ ka wan.

⁹ Sakana bai chɛndɛ chɛ an fɛ mu n mbe tɔɔ tena ka, n chenɛ ɔ chiienɛ ɛ yɔ sawa yɔn mɔɛ. Chɛɛ Yataa 'a bai chen dɔ ma chii ni.

¹⁰ Chɛ an‑na a ma, n mbe ko ɔ ko ɔ bia tena mɔɛ chɛ n ko a, Yataa‑a miin ya a ta mɔɛ n na. Yataa 'a bai, an bɛɛ ni ma mɔ dɔndɔɛ a, an bɛ Chisɔsi Chasi a, an ni bauncha ma sɔn. An mbe ma‑a wan, an bɛ Yataa a, kuɔ fɔ ko a.

¹¹ Tea bai yen ko. Mmɔ ma min chɛ‑a mɔ dɔndɔɛ a Chasi a, mmɔ sɔn kɔma n bɛɛ, an na‑a fa‑a wan, an bɛ Chasi a, mmɔ bɛ ɛ ma‑a wan to a a banda bu ɔ.

¹² Ni mmɔ‑a mɔnɛ ɔ bia, mmɔ wɛɛ ɛ ma‑a wan mansa a a mmɔ bɛ. Ni mmɔ ban‑da a ɔ, a wɛɛ ɛ ban‑da wan mmɔ ɔ.

¹³ Ni danaya ee mmɔ ɔ a ko a, ɛ a 'a danaya a tun fan, koe min na mu, a ee che a kan kɔ sɔ‑a a wandi a.

Pɔɔ ɛ Timoti a si‑a, a ni a 'a wai bia a boo fea a

¹⁴ Chɛ puin i 'a mɔɛ n yii ma, mbɛ i‑a dasi gbau gbau be an ma Yataa chen kɔɔ, i ɔ an ma koɔ kɔnɔ bai kun ma. Chɛ ee den chɛndɛ suun an ye, chɛɛ ɛ chɛ n fan yɔn gbɔkɔɔ, miin mbe an too ma sɔ‑a a ma.

¹⁵ Butuin chɛ, min mbe a ma, Yataa faa ni chima i a. I ni ma wai chɛ mɔɛ chɛndɛ a, min mbe ee mau, a wandi gba ma, min mbe Yataa 'a bai kan tena teaya buɛ ɔ.

¹⁶ I ma i too ma sɔ wooya bai chɛ n ma, baa ee miin dɔ Yataa ko a, koe min na mu, chɛ ɛ a ma wan mɔɛ n ni ka Yataa chia ma.

¹⁷ A bai chɛ n mbe wan yɔ tɛɛ boo kaenɛ, min mbe fui, mbɛ a‑a gboo daun ta‑a. Imenayɔsi mu mɔ dɔndɔ a, an mɔɛ chɛ n tɛ ɔ, a basan Fidetɔsi a.

¹⁸ An ka‑a tea chia ma, mbɛ an bun‑da an bɔɛ n bɛɛ ɔ chɛ‑a, danaya ɛ miin dɔ Chisɔsi ko a. An mbe kanɛ chɛ‑a, an dɔ, mɔɛ n ban‑da an kɔɔ sɔ‑a saya ɔ.

¹⁹ Chɛɛ Yataa‑a fenɛ min kuu si gban, a ɔ ee ma‑a. A sin, bai chɛ, an nyɛnden mu a si a ma, a ɔ, “Mansa Yataa‑a a ɔ sɔn fan mɔɛ miin mbe a ko a,” a sin to, a ɔ, “Miin mbe a fɔ‑a, mbɛ an mbe Mansa Yataa an ko a, an ni an kan kɔ sɔ an 'na ko yama a.”

²⁰ Chen ba a, feanka sɛsɛ ɛ wan nɔ. Sanu pani n mbe wan nɔ, kain pani n mbe nɔ. Kɔn nɛnɛ n bɛɛ mbe nɔ, a basan boo nɛnɛ n na, baa ɛ wan dɔ n ma, baa ee dɔ n sin ma.

²¹ A chia dɔndɔ gbe chɛ a, mɔɛ min mbe a wandi boo a ko‑a ko yama ma a, baa ɛ ma‑a wan a ma Yataa tena. A mu min na, ɛ tenchen a kun ti an ko a, a sin ma gbɔsɔɛ ɛ wan a ma. A mɔɛ tana, a ma bɛnden fan mu wai chɛndɛ chɛ koe a.

²² Chɛ an‑na a fɔ, i boo bɔ kamin tɔngbɔya fɔɛ ɔ, i ni ma mɔ tandenɛ a, danaya ni ma i ɔ Chisɔsi ko a, koadia wɛɛ ni ma i ɔ, a basan faachima a. Chɛ ma, wo bɛ mɔɛ chɛ n na, wo bɛ ɛ Chisɔsi chee, miin na faa ɔ gbɛenɛ ɔ.

²³ I ma i boo chɛ wooya kɔɔsa bia ɔ, yiimatɛ ee min dɔ. I‑a a ɔ sɔn fan, mbɛ chɛ ɛ na koɛ an na.

²⁴ Mansa Yataa 'a wai chɛ mɔɛ sin ma koɔ yan mɔ a. Chɛɛ mɔ chɛndɛ mu a a mɔɛ gbɛɛ tena, kan chɛndɛ chɛ mɔɛ, a sin mbe koe a bia a ma.

²⁵ A mu mɔɛ an na, min mbe tima ya, a chɛɛ ma nyɔɛ n gba yama yian koe a an na, a faa chimaenɛ ɔ. Koe min na mu, kɔkɔɛ Yataa ɛ a ma‑a wan, an ni an kan kɔ sɔ an 'na ko yama a, mbɛ an‑na an ya a mun tea ma.

²⁶ Mbɛ an mbe yiimatɛ ma sɔn‑da wan, an ni bɔ gbai chɛ a, an na‑a chɛɛ ka Sitana 'a gbai min na, an ni min 'na sawa kɔɔ.