1 TIMOTI 1 - Yataa 'a Dɔbɛnɛ Nama

^1-2 N fan Pɔɔ, n fan mbe ka gboo chɛ nyɛn‑da i tena, i wan Timoti. N 'na denɛ mu gbɛ i a, i 'a danaya ko a Yataa a. Mɔ yii na tɛen mu Chisɔsi Chasi an ma. A sin, a 'a sɔ mɔɛ mu n na, mɔ baun mɔɛ Yataa 'a gbasaya ɔ, an fea a wan Chisɔsi Chasi a. Mmɔ Fa Yataa, an fea mmɔ 'a mansa Chisɔsi Chasi a, an 'na dua ni ma i ma, an 'na chinchimaya ni ma i ma, a basan an 'na faachima a.

Pɔɔ ɛ dasi be‑a, a si fania kan chɛ mɔɛ n ma

³ N toen mu i ni ma Ɛfisɔsi duu ɔ wan. I ma ka nɔ, yɔ n na‑a a fɔ buɛ min dɔ i ye, tima min na ni n mbe ta‑a Masidonia chɛnyɛ ɔ. Mɔɛ chɛ nu Ɛfisɔsi, miin mbe ka fania kan chɛ a, a fɔ an ye an ni sɛmbɛ a a.

⁴ An na si an ni sɛmbɛ tai a bɔɛ a, an mbe ta‑a suunɛ ma dan‑da ta‑a aan. Chɛ ɛ na dechee kɔɔsa an na, an mbe ee deman chɛ, Yataa 'a yiinachii mmɔ ko a, a ni ta ya ɔ ma. Danaya an mbe a ma Yataa 'a yiinachii mmɔ ko a, a ni ta ya ɔ ma.

⁵ Chɛ fɔen mu i ye, min mbe a ma, koadia ni ma nɔ. Koadia min kaen mu faa ɔ gbɛenɛ ɔ, yiima a koenɛ fion, a basan danaya gbau gbau a Yataa a.

⁶ Dɔ n‑na an kan kɔ sɔ dan koe a chɛ n na, mbɛ an‑na an boo chɛ wooya kɔɔsa bia n dɔ.

⁷ An toen mu an ni mɔɛ n kan Mosisi 'a sawa a, an kuiɛ ma sɛenɛ a. Chɛɛ an ma sawa gbu ɔ gbɛ ni, a basan koe chɛ n na, sawa ɛ min fɔ tena.

⁸ Mɔ‑a a ɔ yen gbɛ, mbɛ ni sawa chɛ bia‑a chɛndɛ chɛ, sawa chɛndɛ mu a a.

⁹ Mɔɛ miin mbe don sawa kɔɔ, a ee sa an fan ko a. Chɛɛ ɛ sa mɔ yama n fan ko a, miin mbe ee sawa ya, an mbe ee don a kɔɔ, Yataa sɔn bai nu, miin mbe a gbɛnɛ ma bon. Ɛ chɛ n fan ko a, miin mbe an fa n fa, an ni an de n fa, an bɛ mɔ fa mɔɛ n na.

¹⁰ A yɛ to, ɛ ko tɛ mɔɛ chɛ n fan ko a, mɔɛ miin mbe an bɔ mɔ kaima mun an 'na musu a. Mɔɛ chɛ n bɛɛ, miin mbe fania fɔ, ni miin mbe fania siiya chɛ. Mɔ ma tachɛ mɔɛ nu, ni miin mbe koe n ma, min kaen mu kan chɛndɛ chia ma.

¹¹ Kan chɛ ɛ kamaya sakana bai chɛndɛ an dɔ, Yataa wandi, mmɔ ɛ min tando, a‑a min be n ma.

Pɔɔ ɛ Yataa tando‑a a 'a chinchimaya ko a

¹² N mbe Chisɔsi Chasi wai bɔ tena, mmɔ 'a mansa. An‑na a yii na chii n na, mbɛ n danayaen fan mu wai chɛ koe a a ko a. A‑a gbasaya wɛɛ be n ma a chɛ koe a.

¹³ N na‑a a main fan, mbɛ n‑na ko ma gbaaenɛ si a 'a mɔɛ n na. Chɛɛ Yataa chinchin‑da wan n ma, koe min na mu, danaya nii n dɔ a tima a Chisɔsi Chasi ko a, a sin, n nii ma a ɔ sɔn n ni koe min ma tena.

¹⁴ Mmɔ 'a mansa 'a bauncha koadia yii‑a n kun na. Chɛ‑a danaya chɛ wan n dɔ Chisɔsi Chasi ko a, a basan koadia a. Chɛ an mbe ma mmɔ a, ni mmɔ ma‑a mɔ dɔndɔɛ a, mmɔ bɛ Chisɔsi Chasi a.

¹⁵ Tea bai yen ko, Chisɔsi Chasi na‑a dunya ɔ ko yama ma mɔɛ n baun koe an na. Kɔɔsa bia kan kɔ kan mbe ee chɛ ma, a sin mbe nyan fan mɔ ni dan a a. N fan Pɔɔ, ko yama ma mɔɛ n 'na mansa mu n na.

¹⁶ Chɛɛ Yataa chinchin‑da n ma, min mbe a ma, Chisɔsi Chasi ni kun a ɔ yian‑da mɔɛ n na, ɛ a faa bia buɛ min dɔ ko yama ma mɔɛ n na. A 'a tɔmɔsi ma‑a n fan na, n fan mansa chɛ, ko yama ma mɔɛ n ko a. A 'a tɔmɔsi ma‑a n na, mɔɛ chɛ n gbɛɛ tena, miin mbe an kai fa‑a Chasi a, kuɔ fɔ fɔɛ ko a.

¹⁷ Tando ni ma gbɛ Mansa Wa tɔɛ ma, basɔmaya ni be a ma kuɔ fɔ, mansa min mbe ee fa, mɔ sin mbe ee a yen. Yataa dɔndɔ gbe mu an na. A ni ma ka.

Pɔɔ ɛ dasi be‑a Timoti ma

¹⁸ N 'na den, Timoti, n toen mu n ni chɛ an fɔ i ye a ma koe a. I yii na chii bai chɛ n ma, Yataa 'a gbonka chɛ mɔɛ n na‑a min fɔ tee, a si i ma. An ya i faa a, min mbe a ma, i ni butuinɛ chɛ Chasi ko a, yɔ soya chɛndɛ.

¹⁹ Danaya Chisɔsi Chasi ko a, a fea yiima a koenɛ a, a bia i boo fea a. Mɔɛ dɔ n mbe sɛmbɛ wan dan koe a Chasi a, koe min na mu, an mbe koe ma an yiima ma dɔn ni, min ma koe a.

²⁰ Mɔ dɔndɔ mu Imenayɔsi a, an fea Adɛsanda a. N‑na an be Sitana ma, a ni an na tɔɔya, min mbe a ma, an ni sɛmbɛ Yataa main‑da.