1 CHƆN 1 - Yataa 'a Dɔbɛnɛ Nama

Chɔn ɛ bai sa‑a, a si Chisɔsi Chasi ma

¹ Nn mbe gboo chɛ min nyɛn tena ka, a sien mu mɔɛ chɛ an ma, an mbe min chee, an dɔ, Bai, min tɔ mu to Fɔɛ. A ni wan nɔ dunya a dan‑da tima min na. Nn‑na a yen fan nn ya a pɛnɛnɛ, nn‑na a kuiɛ a min, nn sin tindi tindi‑a wan nn nyɔn ma.

² A wɛn tɔ mu ka Fɔɛ, a na‑a kɛn dunya chɛ ɔ, a ma na ni nun dɔ. Nn gbɛɛ, nn‑na a yen fan, nn sin mbe koe ɔ yian fan, a si a ma. Mbɛ nn‑na a wakoe ɔ yian wo a, a wɛn mu kuɔ fɔ Fɔɛ a. An fea ni mmɔ Fa Yataa a, a sin fan‑na a yian nn na.

³ Nn‑na koe min dɔ yen, nn‑na min na min nn too a, nn mbe ka an dɔ yian‑da wo a. Chɛ ɛ a ma‑a wan, mmɔ ni ma kuiɛ dɔndɔɛ ɔ, yɔ nn mbe buɛ min dɔ kuiɛ dɔndɔya ɔ, nn bɛ mmɔ Fa Yataa a, an fea a 'a denɛ Chisɔsi Chasi a.

⁴ Nn mbe gboo chɛ nyɛn tena wo tena, min mbe a ma, nn 'na buɔdia da ni fa gban.

Chɔn dɔ te, mmɔ ni ma manɛ ɔ

⁵ Nn‑na sakana bai chɛ an na min a a, nn mbe ka min dɔ yian‑da wo a, mbɛ Yataa mu manɛ an na. Ko kan kɔ kan mbe ee an tɛ, an fea pimbi a.

⁶ Ni mmɔ‑a a fɔ, mbɛ mmɔ bɛ an mbe gbɛ a a kuiɛ dɔndɔɛ ɔ, chɛɛ mmɔ ɛ a a tun‑da tachɛ koe a pimbi ɔ, mmɔ ɛ ma‑a ka fania an fɔ‑a. Mmɔ sin mbe ee ma‑a ka tea koe ɔ.

⁷ Chɛɛ Yataa ɛ manɛ an dɔ. An fɛ mu, ni mmɔ wɛɛ tachɛ‑a a 'a man chɛ kɔɔ, mmɔ ɛ ma‑a wan kuiɛ dɔndɔɛ ɔ, mmɔ nyɔn na. A yɛ to, Yataa 'a denɛ Chisɔsi wii min bɔ‑a, ɛ mmɔ ko‑a wan, a bɔ mmɔ 'a ko yama n gbɛɛ n dɔ.

⁸ Chɛɛ ni mmɔ‑a a fɔ, mbɛ mmɔ ma ko yama ma ni, mmɔ‑a fania fɔ mmɔ wandi ma, a sin, tea ee mmɔ ɔ.

⁹ Chɛɛ ni mmɔ dɔn‑da a ma, mbɛ mmɔ‑a ko yama ma wan, Yataa danayaen mu, ɛ na‑a tea koe an ma‑a. Ɛ a boo bɔ‑a wan mmɔ 'a ko yama n dɔ, mbɛ a‑a mmɔ ko mmɔ 'a ko yama n gbɛɛ n dɔ, mmɔ ni gbɛ fo.

¹⁰ Ni mmɔ‑a a fɔ, mbɛ mmɔ ma ko yama kan kɔ kan ma nin bɛ, mmɔ ɛ ma‑a ka a fɔ an na, mbɛ Yataa ma teaya ni. A sin, a da a bai ee si tena sɔn‑da mmɔ faa ɔ.