ZEPHANIAH 3 - LEKHARABU INTHENG (BSI)

Jerusalem Setna leh Huksōtna

¹ Khava akaṭhamak, re indu khōpui khana ami mama hei suk manrimna kanei Jerusalem kha inhmangna achen jo.

² Rōngpu ṭong rangei mak khana ama mansena kha rahlâng mak a kae. Rōngpu hnenga taksenna neimak khana inthōpuina inder mak.

³ Aṭōnpui karônhei kha shabakkai inhrung kapō hei kae; aṭong katanhei kha jîngkâr katlunga sharu dahlon hnōmlo kahne kalôp hei kapō kae.

⁴ Asânkathemhei kha inṭangpuina neilo hei, mikahōnhei kae; thempu he’n a’ntheng kha anmanbōk, anbinga hnemna langa Pathen Dân kha anmahe.

⁵ Tâk-kha Rōngpu kha khōpuia laka-om ṭhak, akadik rōk kha atlo; akadik mak kha tlojen mak. Jîngkâr katai sôilo jen a amihei hnenga akadik kha ahei rôn pek hei. Tâk-kha mikadik mak he’n akadik mak kha antloṭhak khana inzak um manhret mak hei.

⁶ Rōngpu’n ati, “Ke’n jât pumpui kasuk manhmang jo hei; ankhōpuihei kasuk khōia, anbang leh an-inn inshâng hei kamanhmang pek sō hei. Khōpuihei kha dahlon kachang jo hei; hlamlenhei karōk a ka-om hei, tûte om mak jo hei.

⁷ Khana kami he’n anṭit ankaja sik eng, khana antamahngi hêrmak sik a ke’n kalei manthei hei omchen, chôndân kha an-inhlâng sik jo tia kaleimandon. Tâk-kha akaṭhamakpen omchen inrangtak a anheitlo nôk a kae.”

⁸ Rōngpu’n ati, “Ke’n jât-hei demna kapekna sik kani kha leihngâk roh. Kahnuknat inhnak kha anmanhretna sik a jât-hei leh rengramhei manchunna sik a mandonna kanei jo. Kahnuk natna hmei khan raleichung pumpui hi asuk manhmang sik kae.

⁹ “Khava sō rōk leh ke’n jât mihei mandonna hi kathleng pek sik hei, khana anmani’n Pathen hlop-hlop hneng changloa kei hneng rōk derna annei sik eng, ankhenga kaṭong anjui sik. Anmani ankhenga kei anjui sik eng.

¹⁰ Ethiopia ram kahlatak a inchai kathek a ka-om kamihei in kahnenga inthoina tōkna anheichoi sik jo.

¹¹ Khava pha khan, nangni, kami chei in kei chunga nanlei dōina eng jâra khan inzak sik rangei mak jo ning. A’nlensak leh ṭong inngeimak kalosōt sik hei, khana kei hmebung inthenga khan avea kei chunga adōimak jo tin chei.

¹² Khana khan kei inthōpui sik a akahong sik malung innem leh a’nsinsak mihei kha kada sik hei.

¹³ Alakahringa ka-om Israel mihei khan tûte inkhat hnenga dikmak tlomak hei ning, maleisei um hrimak hei ning, mihōnna’m tlomak hei ning. Anmani kakhangsōt sik hei, inhukna annei sik, tûte ṭitmak jo hei ning.”

Inpâkna Hla

¹⁴ Israel mihei, inpâktak a ông una hla sak ruh! Jerusalem, namalung pumpuia inpâk roh!

¹⁵ Rōngpu’n nachunga karâkna kha amanbâng jo; Naka-en kada rakip alosōt pek jo che. Rōngpu, Israelhei reng khan a-ompui che; tûnchu ṭitna sik a ajâr om mak jo.

¹⁶ Jerusalem hneng hinga antina sik pha kha kahong jo, “Zion khōpui, ṭimak roh! Nakut 2 manngōi mak hei roh!

¹⁷ Rōngpu na-Pathen khan a-ompui che! ama rathahrat khan re amantor che. Rōngpu’n nachunga inpâkna anei sik, alungsetna che shunga hringkhōther apek sik che. Nachunga inpâkpuina hla ama’n asak sik,

¹⁸ rehōi inkhat a inpâkna kasip kapōa.” Rōngpu’n ati, “Inhmangna sik a maṭhitna che kha kamanbâng jo khana na’nzakna hei kalosōt jo.

¹⁹ Apha kha kahong jo! Nang inrimna kapek hei kha karâkna kapek sik hei! Ke katlek seng kahuk sik hei, khana rehringa antasur mihei kha inna kaheithōi male sik hei. An-inzakna kha kajana kamanchang pek sik hei, vânhnōi in anmani anmanpâk sik jo hei.

²⁰ Apha kha kahong jo! Inchai kathek a ka-om nanmihei, inna kaheiṭhōi sik hei. Vânhnōia hin rahming inthang kamanchang sik chei khana nangni vōi khat kaman khang sōt hi sik chei.” Rōngpu’n ati jo.