ZEPHANIAH 2 - LEKHARABU INTHENG (BSI)

Malung Thlengna sik Ngekna

¹ Inzak inhret mak jât, hivahi manhret roh

² thli’n asemsōt sâng rasi kapōa atlensōt mak hma che, Rōngpu hnuknat hmei khan nachunga ahong tlung mak hma hin, khana ahnuknat malârna kani kha ahong mak hma hin.

³ Ram shunga malung innem nangni, ama ṭongpek kajuiseng, Rōngpu hneng he’nhe ruh. Akadik kha tlo ruh, Rōngpu hmaikunga insinsak ruh. Rōngpu’n ahnuknat amalâr ninga karâkna inphut nansōk theina sik kae.

Israel Kimvea Jât-hei Khōdeng theina

⁴ Gaza khōpuia tûte indahlon mak ning. Ashkelon dahlonpet a ka-om sik. Ashdod a mihei kani her khat shunga hnongsōt a ka-omsō sik hei, khana Ekrona mihei khōpuia inphut hnongsōt sik hei kae.

⁵ Philisti nangni, tui-ôngpui panga ka-om mihei. Rōngpu’n nanchunga ṭong atan jo. Nangni amanhmang sik jo chei, tûte inkhatbek dahlon mak chei ning.

⁶ Tuipui panga ka-om nanram kha kemōng rōng leh ke rōng kasip ramhâng kachang sik jo.

⁷ Judah mi alakahring hei khan nanram kha anhlō sik. Khava khan ankemōng ankhem sik khana Ashkelon hei innheia kaje sik hei. An-Rōngpu an-Pathen in a-ompui sik hei khana vōi khat amankhang nôk sik hei.

⁸ Chunghnung Rōngpu’n ati, “Moab leh Ammon he’n kamihei inzak anpek heia êngset a antlona hei khana anram kha anhlō sik tia an-inlensakna kha ke’n kathei jo.

⁹ Israelhei Pathen, akahring Rōngpu kachang jâra Sodom leh Gomorrah kapōa Moab leh Ammon suk manhmang sik hei kae tia kei intep jo eng. Anmani kha chikhur kamanchang sik hei, kumsôt a a’nhmang kachang sik jo hei, phi he’n anmakhusi sik. Kami alakahring hei khan anmani ansukset sik hei khana anram kha anhlō sik jo.”

¹⁰ Chunghnung Rōngpu mihei kha inzakna anpek hei jâra leh an-inlensakna, an-êng setna jâra Moab leh Ammonhei kha khang’khan karâkna pek sik hei kae.

¹¹ Rōngpu’n anmani amanpir sik hei. Ama’n ralei pathenhei kha heite manchang mak ning, khana jât rakip in ama kha anram et a ankamuk sik jo.

¹² Rōngpu’n Ethiopia mihei kha athat sik hei.

¹³ Rōngpu’n Assyria mihei thatna sik arathahrat ahmang sik. Nineveh khōpui kha amanram sik, tui ka-om mak nêrdiram amanchang sik.

¹⁴ Khava hmun kha ke rup-hei, serup-hei khana sha rakip hei inbokna leh jena hmun kachang sik. Akatlek inhler hei kâra simbu hei ka-om sik hei, thlikot a inphut inhrâm sik hei. Kot kunga va-âk hei inhrâm sik hei. Inn sakna cedar thing hei inphoisōt sik hei.

¹⁵ Aratha neina chunga abinga a’nlensak khana inhuktor eng tia a’ndon khōpui chunga akasōk sik kha khavakha kae. Ami he’n ankhōpui kha raleichunga akalenpen kae tia anmandon. Ramshahei omna akachang sik hmun kha, heituk a dahlon hmun akachang sik jo mo! Khava hnenga akase akahong rakip in malung natna anneia ankahnung inle sik hei.